وەلاتیێن كۆمەلگەها شاریا داخوازا چێكرن و سەخبێركرنا جاددەیان دكن
تۆرا لالش:
كۆمەلگەها شاریا رۆژ ب رۆژێ بەرەف بەرفرەهبوونێ ڤە دچت،د نۆكەدا هژمارا روونشتڤانێن وێ زێدەبووینە ژ خەلكێ خوەجهـ و ئاواران پێكهاتیە،بتریا جاددەیێن ناڤا كۆمەلگەهێ تێكچووینە،ئەڤێ یەكێ وەلاتی دلگرانكرینە و داخواز دكن جاددە بێنە چێكرن و سەخبێركرن.
نێچیرڤان فواد،گەنجەكێ كۆمەلگەها شاریایە بۆ رۆژناما دەنگێ لالش دبێژت:شاریا كۆمەلگەهەكا مەزنە و د نۆكەدا هژمارا روونشتڤانێن وێ گەلەكن ژ خەلكێ خوەجهـ و ئاواران پێكهاتیە،ئەگەر بەرێ خۆ بدەینە جاددەیان گەلەك ژ وان تێكچووینە و بووینە تەسە و پێتڤی ب سەخبێركرنێ نە،ئەڤێ چەندێ كاریگەریا خۆ ل سەر شوفێران كریە كو رۆژانە هاتن و چوونێ دكن،ئەڤجا ئەم داخواز دكەین ئەڤ جاددە بێنە سەخبێركرن،هەروەسا پرۆژەیێن خزمەتگۆزاری ژی بۆ گەنجان بێنە ڤەكرن.
هەروەسا بەنگین فەهمی گەنجەكە بۆ رۆژناما دەنگێ لالش دیاركر،هژمارا خەلكێ شاریا ژبلی ئاواران نێزیكی شازدە هەزار كەسانە،ئەگەر بەحسێ كەرتێ رێك و پران بكەین جادێن مە گەلەك د بێ سەروبەرن بتریا وان بووینە تەسە ژ هەیڤا نەهـ دا بریار هاتبوودان جادە بێنە چێكرن و هەیڤا سێ گرێبەستا وان ب داوی بێت،لێ هەتا نهۆ چ نەهاتینە تمامكرن، هەروەسا پارك و جیێن گەشتیاری بتنێ پاركەكا بچووك بۆ زارۆكان هاتیە چێكرن،هیڤیدارن ژ جیێن پەیوەندیدار و ب تایبەت باژێرڤانیا شاریا ئەڤ جادەیێن ناڤا كۆمەلگەهێ یێن تێكچووین دووبارە بێنە سەخبێركرن و بكەڤنە دخزمەتا خەلكێ كۆمەلگەهێ دا.
ژلایەكێ دی ڤە ئازاد موراد وەكو مامۆستایەك بۆ رۆژناما دەنگێ لالش گۆت:هەر كەسەكێ پسیارێ ژێ بكەی كو شاریا پێتڤی ب چی یە ئێكەم ئاخفتن دێ بێژت شاریا پێتڤی ب نەخۆشخانەیەكا مەزنە و جادێن وێ بتر بێنە سەخبێریكرن یان چێكرن،هەروەسا ڤەكرنا سەنتەرێن هۆنەری و وەرزشی بۆ گەنجان،چنكو گەنجێن مە ب مخابنی ڤە وەختێن خۆ ل دەمبەلێ و چایخانە و كافیان ڤە دبۆرینن.
تُتاح هذه الصورة أيضا في: کوردی
