كەسوكارێن قوربانیێن دەستێ داعش داخوازا دروستكرنا گۆرستانەكێ بۆ جانگۆریان دكن
تۆرا لالش یا راگەهاندنێ
ل رۆژا(3/8/2014)ێ رێكخراوا داعش هێرشی قەزا شنگال كر و كارێن هۆڤانا بەرامبەر خەلكێ بێ گونەه ئەنجام دان،د ئەنجاما وێ هێرشێ دا ب سەدان ئێزدی بوونە قوربانی،كەسوكارێن قوربانیان دخوازن گۆرستانەك بۆ جانگۆریان بێتە دروستكرن داكو كەیسا جینۆسایدا ئێزدیان بتر بەرچاڤ ببت.
(خالد تەعلۆ)ئێك ژ كەسوكارێن قوربانیێن دەستێ داعش بۆ رۆژناما دەنگێ لالش خویاكر،پشتی ڤەكرنا گۆڕێن بكۆم چاوا دێ سەرەدەری دگەل ئێتە كرن یان هەر گوندەك دێ جانگۆریێن خۆ بەنە گوندێ یان ژی ئەڤ قوربانی هەموو ل جیەكی تایبەت ئێنە ڤەشارتن،گرنگە رێككەفتنەك دگەل خودانێن قوربانیێن جینۆسایدا شنگال بێتە كرن كو گۆرستانەكا رەمزی ل پێ پیڤەرێن نێڤ دەولەتی و دەستور و قانوونی بێتە دروستكرن،داكو بتر كەیسا جینۆسایدا ئێزدیان بەرچاڤ بت.
ژلایەكی دی ڤە(نەشوان سەیدۆ) كەسوكارەكی قوربانیێن دەستێ داعشێ یە بۆ رۆژناما دەنگێ لالش راگەهاند، ئەم درازی نە گۆرستانەك ژبۆ كەسوكارێن مە یێن بووینە قوربانیێن جینۆسایدا شنگال بێتە دروستكرن،داكو كەیسا ئێزدیان ب هەروە نەچت و نەئێتە هنداكرن و مافێ جانگۆریان پاراستی بت، د هەمان دەم دا دێ بتە دیرۆكەك ل شنگال و بتر ئێتە ناسكرن،دەما هەر شاندەكی ناڤخۆ و نێڤ دەولەتی سەرەدانا شنگال دكن دێ ئێكسەر سەرەدانا وێ گۆرستانێ كن و دخوازن ب جدی كار لسەر بێتە كرن.
دیسان سەرۆكێ جڤاتا قەزا شنگال(وەیس نایف)بۆ رۆژناما دەنگێ لالش دیاركر،ل رۆژا(3/8/2014)ێ رێكخراوا داعش هەموو كارێن هۆڤانا بەرامبەر خەلكێ بێ گونەهێ شنگال ئەنجام دان و د ئەنجاما وێ هێرشێ دا ب سەدان شنگالی بوونە قوربانی،ئەم ژی لگەل خواست و داخوازێن كەسوكارێن قوربانیێن جینۆسایدا شنگالێ نە،ل سالا (2015)ێ دەمێ شنگال هاتیە رزگاركرن داخواز كر گۆرستانەك بۆ ڤان قوربانیان بێتە دروستكرن داكو وەك دیرۆك بمینت و خەلك و جیهان ب زانت چ بسەرێ شنگال و شنگالیا هات،هەروەسا داخوازێ ژ تیمێن ڤەكرنا گۆڕێن بكۆم دكەین بتر خەمێ ژڤان گۆڕان بخۆن دا ل دەمەكی نێزیك ڤەكرنا گۆڕان تەمام ببت.
تُتاح هذه الصورة أيضا في: کوردی
