ب بریارا جڤاتا رۆحانی گێرانا رێورەسمێن جەژنا ل پەرستگەها لالش هاتیە راگرتن
تۆرا لالش یا راگەهاندنێ
بۆ ماوێ پتر ژ سێ سالانە ب بریارا جڤاتا رۆحانی یا ئێزدیان گێرانا رێورەسمێن جەژن و هەلكەفتا ل پەرستگەها لالش هاتیە راگرتن،داخواز دئێتە كرن بۆ دەمەكی درێژ ئەڤ بریار ڤەنەكێشت و رێورەسم بێنە گێران بۆ مانا ئێزدیاتیێ.
لدۆر ڤێ چەندێ وەلاتی(ئەحمەد هافانی)دبێژت:ئەم رێز گرتنێ ل بریارا جڤاتا رۆحانی دگرین و ب بریارەكا هەرە باش ددانین كو رێورەسمێن جەژنا نەئێنە گێران ژبەر بارودۆخێ نهۆ كوردێن ئێزدی تێرا دەرباز دبن،لێ ژ ئالیەكی دیڤە پێتڤیە ئەركێن ئایینی نەئێنە پشت گوه هاڤێتن و پوتەیەكا مەزن پێ بێتە دان،ژبەركو نەحەزێن مە گەلەكن و بڤێ چەندێ شادبن كو ئەم تالمایێن دوژمن بووینە و رێورەسمێن ئایینی نائێنە گێران و ژ برینەكێ دبنە دوو برین ،سال بۆ سالێ ژمارا خەلكێ كو سەرەدانا پەرستگەها لالش دكن بەرەف كێم بوونێیە و ئەگەرێ وێ ژی نەگێرانا رێورەسمایە ل جەژن و هەلكەفتا،ئەم رێزەكا هەری مەزن ل جانگۆریێن رێیا ئێزدیاتیێ دگرن و گرتیێن مە ژ خوشك و دەیك و باب و برا دێ مینن كولەكا مەزن لسەر دلێ مە،ژ خودێ دخوازن ل حالێ مە بێیە رەحمێ و وان ژ ڤی حالی دەرێخت و ئەم ژی وەكی هەموو جیهانێ بسەر بلندی و ئازادانە بژین و رێورەسمێن جەژنێن خۆ ب دلەكێ خۆش بگێرن.
ژلایەكێ دی ڤە بەرپرسێ نڤیسینگەها لالش ل پەرستگەها لالش (لوقمان سلێمان)دیاركر،ئەم وەك ئێزدی تووشی گەلەك كۆمكوژیا بووینە و ئێك ژ یا دی گرانترە بەلێ چ ب دەست نینە و بریارا راگرتنا گێرانا رێورەسمان ل جەژن و هەلكەفتا ب بریارەكا ل جیێ خۆدا دئێتە دانان،لێ پێتڤیە بۆ دەمەكی درێژ ڤەنەكێشت،گۆتژی هەزار سلاڤ ل گیانێ وان جانگۆریا بت و ئازادی بۆ وان دەیك و خوشك و برایێن مە یێن ل دەستێ داعشێ دا و خودێ دەریەكێ خێرێ ل خەلكێ مە یێن ل بن خیڤەتا دا ژیانێ دبنە سەر ڤەكە و هاریكاریا وان بكت،بەلێ ئێزدیاتی ژ مە هەموویان مەزنترە و یێ چووی چوو و یێن مایین پێتڤیە ئەم ببنە نەخشەیەك و یەكبوون و تفاق و تەبای ببیە ناڤ و نیشانێ مە،داكو ئێزدیاتی بمینت و پێتڤیە رێورەسم بێنە گێران داكو زارۆك ببینن كا ئێزدیاتی چیە و رەهێن وێ بۆ چ دووریێ دچن.
ژبال خۆڤە ئەندامێ جڤاتا رۆحانی یا ئێزدیان(شێخێ وەزیر)خویاكر،ئەم وەكو جڤاتا رۆحانی ئەڤێ چەندێ بەرچاڤ وەردگرن و ئەڤ كارێ مەیە و هەرچەندە نەگێرانا رێورەسمان ل پەرستگەها لالش ئەگەرێ خۆ یێ هەی،ئەم دزانن كو ئەركە لسەر ملێ مە ئەم ئەڤان رێورەسمان بگێرن نەخاسمە خەلكێ مە شەپرزە بوو و دیل كەفتنە د دەستێ دوژمنی دا و گیانێ خۆ كرنە قوربانی سەرا ئێزدیاتیێ و ڤان رێورەسمان و ئاوارەبوونا بسەدان هەزاران ژ خەلكێ مە،ئەڤە بوو دەمێ سێ سال و نیڤان مە رێزگرتن بۆ ڤێ چەندێ كر،لێ ب راستی پێتڤیە ئەڤ رێورەسمێن جەژنان بێنە گێران ژبەركو نە ئیرۆ و دوهی ئەڤ رێورەسمە دئێنە گێران و ئەڤە نە جارا ئێكێ یە كو ئێزدی تووشی ڤان جۆرە كۆمكوژیا دبن لێ سەرەرای ڤێ چەندێ بەردەوامی ب ڤان رێورەسمان هاتیە دان،داكو نەئێنە ژبیركرن و چینێن جڤاكی هەموو ببینن و بزانن كا ئێزدیاتی چیە، هەرچەندە و ئەگەر بۆ چەند دەمی ئەڤ رێورەسمە نەئێنە گێران نائێنە ژبیركرن ژبەركو ئەو كۆمكوژیێن بەرێ نەك كێمی ڤێ كۆمكوژیێ بوون،بەلێ نەهاتینە ژبیركرن و بەردەوامی پێ هاتیە دان،هەروەسا ئەڤ رێورەسم دێ بەردەوام بن و دێ زارۆكێن مە بینن و نائێنە ونداكرن و وەكی هاتیە گۆتن (ئێزدی تای ب رەزیل تای”،بەلێ چ تشت كاریگەریێ ل ئێزدیاتیێ ناكن و بەردەوام بت هندی ئەم لڤێ دنیایێ نە و ب هیڤینە ل جەژن و هەلكەفتێن بێت دا رێورەسمێن جەژنێن خۆ ب دلەكی خۆش بگێرن.
تُتاح هذه الصورة أيضا في: کوردی
