ئەگەرێن بەربەلاڤبوونا دەنگێن ئێزدیان ل هەلبژارتنێن پەرلەمانێ كوردستانێ وعێراقێ ئاشكەرا دبن
تۆرا لالش یا راگەهاندنێ
بریارە هەلبژارتنێن پەرلەمانێ كوردستانێ ل هەیڤا 4و هەلبژارتنێن ئەنجوومەنێ نوونەرێن عێراقێ ل هەیڤا 5یا ئەڤە سالە بێنە ئەنجام دان،ئەگەرێن بەربەلاڤبوونا دەنگێن ئێزدیان دهەلبژارتنان دا ژی ئاشكەرا دبن.
گرنگیپێدەرێ كاروبارێ ئێزدیان(زێدۆ باعەدری)بۆ رۆژناما دەنگێ لالش دیاركر، هەتا نهۆ بارا پتر یا جادا ئێزیدی سیستەمێ هەلبژارتنان نزانن،پەرلەمانێ عێراقێ یاریێن خۆ ب ئێزدیان دكن و ئێك كورسیا كۆتا ددەنێ و وان بەردەنە ئێك دا دەنگێ ئێزدیا بەلاڤ بن،كەس نەمایە كۆتا نەدایێ و پتر ژ مافێ وان دایە توركمانا و كوردێن فەیلی و برایێن مەسیحی و سابئە ئەز نە دژی وانم و دگەل هندێ مە هەر چینەكا بن دەست چ یا ئایینی یان نەتەوەیی بت بێتە كۆتا كرن،لێ نە سەر كیستێ مە مافێ وان بدەنێ و نە ل بەرامبەر یێ مە قوت بكن و عێراق هەتا یا ساخە شەرمەزاری ئێزدیانە،چنكو كۆمكوژیا(74)ل كوكا ئێزدیخانێ ل شنگال چێبوو،هەتا نهۆ ژی ل باژێرێن ئەرەبێن سووننە كچ وكورێن مە تێنە فرۆتن،ئیرۆ پەرلەمان و سەرۆكێ پەرلەمانێ عێراقێ سەلیم جبووری وەكو خانم ڤیان دەخیل ئاماژە پێدایی پتر ژ چار جارا هەولدان كری وان نەڤیا بەحسێ ناڤێ كۆتا ئێزدیا بكن و بەحسێ ئێزدیا بكەفتە دروونشتنا پەرلەمانی دا وئەڤە بخۆ دبتە جینۆسایدەكا بێ خوون و یا ڤەشارتی و تاری دوور ژ راگەهاندنێ ل دژی ئێزدیان و گۆت:((لسەر ئێزدیان پێتڤیە بۆ هەلبژارتنێن ئەنجوومەنێ نوونەرێن عێراقێ و پەرلەمانێ كوردستانێ یێن داهاتی،ژمارەكا كێم یا بەربژێران خۆ هەلبژێرن دا كورسیێن كۆتا ژ مە نەچن و نوونەرێ خۆ هەبت و دەنگێ مە بەربەلاڤ نەبن،سەر دام و دەزگەهێن ئێزدیان یێن فەرمی و نەفەرمی و ئەم هەموو ب ئەركێ خۆ رابن و هەولدانان بكەین كو بەربژێرێن مە كێم بن و هەڤبەشبن و نەهەموو ژ دەڤەرەكێ بن،دا كورسیێن كۆتا ژ مە نەجن و ئاگەه ژئێك هەبت و ئێكگرتی بن و دەنگێ وان لڤێ قۆناغێ دا گەلەك یێ گرنگە)).
باعەدری ئەو چەندە ژی ئاشكەراكر،ل هەلبژارتنێن چووی یێن پەرلەمانێ عێراقێ(74)كەسێن ئێزدی خۆ بەربژێر كربوو،بڤێ چەندێ زەرەكا مەزن ل بەلاڤكرنا دەنگێن مە ئێزدیان بوو.
تُتاح هذه الصورة أيضا في: کوردی
