هێزێن نەیاسایی ل شنگالێ تاوان دەرهەقێ خەلكێ سڤیل ئەنجام داینە
تۆرا لالش یا راگەهاندنێ
ل سەر هەبوونا هێزێن نەیاسایی ل دەڤەرێ،كارگێرێ لقێ هەڤدە یێ پارتی ل شنگالێ”سەعید جردو”د دیدارەكێ دە بۆ رۆژناما دەنگێ لالش دیاركر،دخوازین ئەو هێز ڤەگەرنە قادا خەبات و تێكۆشینا خۆ یا دروست ل باكوور و رۆژئاڤا هەتا كو ئاریشا ڤان دەڤەرێن مە یێن ڤەقەتیایی ژ كوردستانێ ئالۆز تر نەكن و نەبنە بەربەست ل پێشیا خەلكێ مە كو جارەكا دی بزڤرنە سەر ئاخ و وارێن خۆ،ئاماژەكر كو ل سەر دەستێن وان هێزان چەند تاوانەك دەرهەق خەلكێ مەیێ سڤیل هاتینە ئەنجام دان،ئاشكەراكر ژی بۆ ڤەگەریانا شنگالێ بۆ هەمبێزا كوردستانێ ئیرۆ ژ هەر دەمەكا دی گرنگترە كو شنگال ببیە پارێزگەهەكا سەر ب هەرێما كوردستانێ ڤە و ب پاراستنەكا موكوم بێتە پاراستن و هەڤكار دگەل جڤاكێ نێڤ دەولەتی بێتە ئاڤەدانكرن و خەلكێ وێ بێتە قەرەبووكرن و هەموو پێتڤیێن ژیانەكا مۆدرن بۆ بێتە دابینكرن.
سەبارەت هەبوونا هێزێن نەیاسایی و كارتێكرنا وان ل سەر ڤەگەریانا خەلكێ شنگالێ”سەعید جردو”كارگێرێ لقێ هەڤدە یێ پارتی گۆت:”هەلبەت پشتی هێرشا تیرۆرستێن داعش بۆ سەر شنگالێ دەلیڤە رەخسا ،كو هندەك هێز لژێر ناڤ و نیشانێن جودا جودا پەیدا بن،ل دەما ئەم سوپاسیا هاریكاری و بەرخودانا وان هێزان دكن نەخاسما برادەرێن(k.k.p) یێن وەكو ئەركەكێ نەتەوەیی ل هانا خەلكێ مە هاتین ،پشتی ئەركێ وان ب جیه هاتی نەخاسمە پشتی شكەستنا داعش ل سەر دەستێن پێشمەرگەی و كۆنترۆلكرنا شنگال ئێدی دخوازین ئەو هێز ڤەگەرنە قادا خەبات و تێكۆشینا خۆ یا دروست ل باكوور و رۆژئاڤا هەتا كو ئاریشا ڤان دەڤەرێن مە یێن ڤەقەتیایی ژ كوردستانێ ئالۆز تر نەكن و نەبنە بەربەست ل پێشیا خەلكێ مە كو جارەكا دی بزڤرنە سەر ئاخ و وارێن خۆ”.
ل دۆر نێرینا خەلكێ شنگال ب تایبەت ناوچەدارییا سنوونێ بۆ هێزێن جودا جودا”سەعیدی” دیاركر:”خەلكێ مە ب دیتنا من و وانژی دڤێ پشتی شكەستنا داعش و كۆنترۆلكرنا دەڤەرێ ژ ئالیێ پێشمەرگەیێن قەهرەمانڤە ب سەركرداتیا سەرۆك بارزانی ئێدی ئەو هێزێن ئەركێ وان تەمام بوویی ڤەگەرینە جیێن ژێ هاتین چاوا پێشمەرگەی ئەركێ خۆ یێ نەتەوایەتی ل كۆبانێ ب جیه ئانی و ڤەگەریا كوردستانێ دڤێ ئەو هێز ژی ڤەگەرنە جیێن خۆ،داكو خەلكێ مە ب ئارامی دووری ململانێیا نا تەندورست دەست ب ژیانا خۆ ژ نووڤە بكن”.
دەربارەی خەلكێ شنكالێ تووشی چ روودانا هاتی یە ل سەر دەستێن وان هێزان،كارگێرێ لقێ هەڤدە خویاكر:”دەمێ یاسا نە بەر قەرار بێ و هێز نە ل ژێر كۆنترۆلا یاسایێ دا كار بكن هەلبەت وێ جۆرە ئاژاوەیەك پەیدا بێ و ئەو ژی وێ بیە ئەگەرا پەیدابوونا ئاریشا و بگەرە ئەنجام دانا تاوانا ژی،بەلێ چەند تاوانەك دەرهەق خەلكێ مەیێ سڤیل هاتینە ئەنجام دان هەر چەندا تاوانبار نەهاتینە خویاكرن،لێ هەبوونا وان هێزا و نە پێگیریا وان ب یاسایێ دبیە هاریكار كول گەلەك روودانا تاوانبار بێنە نخمتن”.
هەروەسا ل دۆر ڤەگەریانا شنگالێ بۆ هەمبێزا كوردستانێ تا چ رادەیەكی گرنگە،ناڤهاتی دبێژت:”تاوانێن دژە مرۆڤایەتیێ یێن دەرهەق خەلكێ مە هاتینە ئەنجام دان ژئالیێ تیرۆرستێن داعش ڤە ژ كۆمكوژی و گرتنا دەیك و خوشكێن مە بگرە و هەتا ب تالانكرن و وێرانكرنا مال و ملكێ مە خوەیا كرن كو ئێدی زەحمەتە ژیانا مە ب ئارامی دگەل وان تاوانبارا چ سەرا،لەوما ژ هەر دەمەكا دی گرنگترە كو ئیرۆ شنگال ببیە پارێزگەهەكا سەر ب هەرێما كوردستانێ ڤە و ب پاراستنەكا موكوم بێتە پاراستن و هەڤكار دگەل جڤاكێ نێڤ دەولەتی بێتە ئاڤەدانكرن و خەلكێ وێ بێتە قەرەبووكرن و هەموو پێتڤیێن ژیانەكا مۆدرن بۆ بێتە دابینكرن،دخوازم هەموو لایەنێن كاریگەر كار بكێ ژبۆ لەزكرنێ ل رزگاركرنا گرتیێن مە یێن دەستێ داعش دا”.
ل داویێ كارگێرێ لقێ هەڤدە دیاركر:”ئەم ژ برادەرێن پەكەكێ ب هەموو ناڤ و نیشانێن خۆ ڤە دخوازین پشتی ب سوپاسی ڤە وەكو ئەركەكێ نەتەوایەتی هاریكاریا مە كرین ئێدی ڤەگەرنە مەیدانا خۆ یا دروست و ببنە بەرگریكەر ژ مافێ رەوایێ مللەتێ كورد ل كوردستانا باكوور و رۆژئاڤا ب تفاق و تەبایی دگەل هێز و پارتێن دی یێن كوردی ل هەردوو پشكێن كوردستانێ هەتا كو مللەتێ كورد ب مافێ خۆ شاد ببێ و ژبن زولم و زۆرداریێ دەركەڤە”.
تُتاح هذه الصورة أيضا في: کوردی
