هەتا نۆكە چوو گرتیێن ئێزدی دئۆپەراسیۆنا رزگاركرنا مووسلێ دا نەهاتینە ئازادكرن
تۆرا لالش یا راگەهاندنێ/كــاروان باعەدری
دگەل دەستپێكرنا ئۆپەراسیۆنا رزگاركرنا مووسلێ ژ دەستێ تیرۆرسێن داعشێ،چەندین دەڤەرێن وێ پارێزگەهێ هاتینە ئازادكرن،هەڤدەم هەتا نۆكە چوو گرتیێن ئێزدی د ئۆپەراسیۆنێ دا نەهاتینە رزگاركرن،كەس و كارێن گرتییان و رزگاربووی داخوازێ ژ هێزێن پشكدار دكن گیانێ كەسێن ئێزدی بێتە پاراستن.
ئێك ژ زارۆكێن شنگالێ”حسێن عەلی”خێزان و كەس وكارێن وی ددەستێ رێكخراوا تیرۆرستی یا داعشێ دانە دیاركر:”دگەل ئۆپەراسیۆنا رزگاركرنا مووسلێ ئەم دخوازین ژ هێزێن پشكدار گیانێ وان كچ و خوشك و دایكێن مە یێن گرتی بێنە پاراستن،ژبەركو هەر جهێ ئەڤ رێكخراوا تیرۆرستی گەهشتبتێ ئەڤ گرتینە لگەل خۆ برینە و هیڤیدارم ل دەمێ هێرشا پاراستنا گیانێ وان ل بەر چاڤ بێتە وەرگرتن”.
رزگاربوویا دەستێ داعشێ”كۆچەر عەلی”گۆت:”رێكخراوا داعش یا تیرۆرستی كچ و خوشكێن مە برینە هەموو جهان و زارۆكێن مە ل سەربازگەهێن وان دئێنە مەشقكرن،ژبۆ كارێن تیرۆرستی،دخوازین ژ هێزین پشكدار وان كچ ژنێن مە رزگاربكن و داخوازێ ژ خەلكێ ب شەرەف دكەین وان ب پارێزت د مالێن خۆدا”.
ژبال خۆ ڤە بەرپرسێ راگەهاندنا نڤسینگەها كاروبارێن رەڤاندیان ل پارێزگەها دهۆكێ دبێژت:”هەتا نۆكە چوو كچێن ئێزدی د ئۆپەراسیۆنا رزگاركرنا مووسلێ دا نەهاتینە رزگاركرن،بتنێ مە ئاگەهی هەینە نها هندەك كچ و ژن هاتینە ڤەگوهاستن بۆ چەندین دەڤەرێن دی یێن كو داعش كۆنترۆل لێ هەی و هندەكێن دی هێشتا ماینە و چاڤەرێنە ئەو ژی بێنە رزگاركرن”.
هەروەسا مەرجەعیەتا ئاینێ گشتیا ئێزدیان د بەیاننامەكێ دا بەلاڤكربوو، داخواز ژ وان هێزێن پشكدار كربوو گیانێ وان كچ و ژنێن ئێزدی یێن ددەستێ داعشێ دا رزگاربكن و هاریكاریا وان بكن ژبۆ رزگاركرنێ،دیسان هەتا نۆكە پتری سێ هەزار گرتیێن ئێزدی ددەستێ داعشێ دانە و چەندین كەس ب چەندین رێیێن جێواز هاتینە رزگاركرن.
تُتاح هذه الصورة أيضا في: کوردی
