هەبوونا هێزێن نەیاسایی ل شنگالێ ئەگەرێ ڤەنەگەریانە خەلكێ یە بۆ سەر ملك ومالێن خۆ 
تۆرا لالش یا راگەهاندنێ/عەزیز شەركانی
پشتی بۆرینا دوو سالان ل سەر بیرەوەریا كارەساتا شنگالێ را،هەتا نۆكە پتر ژسێ هەزار كەسێن ئێزدی ل دەستێ داعشێ دانە وهەموو گۆرێن بكۆم هێشتا نەهاتینە دیتن وڤەكرن،چەند گوند وكۆمەلگەه ژی ل بن دەستێ داعشێ دانە،حكوومەتا عێراقێ چ هاریكاریەك پێشكێش نەكریە وكۆمەلگەها نێڤ دەولەتی ژی كێمتر خەمبوویە هەمبەر قەزایێ،هەبوونا هێزێن نەیاسایی ژی بوویە ئەگەرێ ڤەنەگەریانە خەلكێ بۆ سەر ملك ومالێن خۆ،داخواز دئێتە كرن شنگال بێتە ئاڤاكرن و ژیان وەك بەرێ ڤەگەرت.
رۆژنامەڤانا ئێزدی (رۆنزا سالم)دبێژت:جهێ داخێیە ئەڤە دوو سال ب سەر كارەساتا شنگالێ رە دەرباس دبن،لێ هەتا نۆكە پتر ژسێ هەزار كەسێن ئێزدی ل دەستێ داعشێ دانە وهەموو گۆرێن بكۆم هێشتا نەهاتینە دیتن وڤەكرن،ب مخابنی ڤە ئەڤە دووسالە خەلك یئ دەربەردەربوویی و وارێن خۆ ب جی هشتینە و خزمەت ژێرە وەك پێتڤی نائێنە پێشكێشكرن،شنگال ژی نەهاتیە ئافڤاكرن،داخوازێ ژحكوومەتا كوردستانێ وعێراقێ دكەین هاریكارییان پتر پێشكێشی خەلكێ بكن،داكو خەلك بكارت ڤەگەرتە سەر ملك ومالێن خۆ.
مامۆستایێ زمانێ كوردیێ(موراد شنگالی)دیاركر،پێتڤییە د ڤێ بیرەوەریێ دا دوو پێنگاڤ بهێن هاڤێتن ،ئێك رزگاركرنا ئەو گوند وكۆمەلگەهێن ل بن دەستێ داعشێ دا و رزگاركرنا وان كچ وژنێن وەك دیل ل دەستێ هۆف ودرندەیێن داعشێ دا، یا دووێ ژی هاریكارییا پتر ژ 300 هەزار ئاوارەیێن ئێزدی یێن كو دژیانەكا سەخت ودژوار دا دژین دبن خیڤەتێن ئاوارەبوونێ دا بێتە كرن،هەروەسا پێتڤیە شنگال بێتە ئاڤاكرن و پشتی ئەو پێتڤیێن سەرەكی بۆ ژیانێ دئێن بەردەستكرن دەست ب ئاڤاكرنا قوتابخانەیان بێتە كرن و گرنگی ب كەرتێ پەروەردێ بێتە دان ل شنگالێ،ژبەركو شنگال كۆكا مللەتێ ئێزدیانە.
رۆژنامەڤان (راید غانم)خویاكر،هیڤی دكەین دڤێ بیرەوەریێ دا نە ب تنێ چالاكی بهێن ئەنجام دان و وەك بیرەوەریەك بێت نووكرن،بەلێ ئەم دخوازن دڤێ بیرەوەریێ دا وەك دیاری بۆ خەلكێ شنگالێ ئەو گوند وكۆمەلگەه بێنە رزگاركرن وخەلك ب سەر فەرازی ڤەگەرنە سەر ملك ومالێن خۆ،هەروەسا لایەنێن پەیوەندیدار هەلویستەكی وەرگرن بەرامبەر كارەساتا شنگالێ وخەلكێ وێ،دیسان پێتڤیە شنگال بێتە ئاڤاكرن و ژیان وەك بەرێ ڤەگەرت ل شنگالێ.
قایممقامێ شنگالێ(مەحما خەلیل)دیاركر،داخوازێ ژ هەردوو حكومەتێن هەرێما كوردستانێ وعێراقێ و كۆمەلگەها نێڤ دەولەتی دكەین،كو ب ئەركێ خۆ رابن بەرامبەر شنگالێ،ژبەركو حكوومەتا عێراقێ چ هاریكاریەك پێشكێش نەكریە وكۆمەلگەها نێڤ دەولەتی ژی یا كێمتر خەمبوویە،هەروەسا سەرەرای كو حكوومەتا هەرێمێ دقەیرانەكا دارای رە دەرباس دبت و تەخسیری نەكریە،بەلێ ئەم داخوازا پتر هاریكاریێ ژێ دكەین،گۆتژی دوو ئەگەر بووینە بەربەست بۆ ڤەگەرا خەلكێ ئەگەرا سەرەكی هەبوونا هێزێن نەیاسایی یە كو خەلك ژبەر وان نكارت ڤەگەرتە سەر ملك ومالێن خۆ،لەوما ئەم داخواز دكن ژوان هێزان شنگالێ ب جی بهێلن وڤەگەرن وەلاتێ خۆ،داكو خەلكێ مە بكارت بزڤرتە سەر ملك ومالێن خۆ،مە پلان داناینە بۆ كارەبێ داكو خەلك ڤەگەرت و خزمەتكاری ژی دێ ئێنە پێشكێشككرن و هیڤی دكەین ل دەمەكێ نێزیك ئەوگوند وكۆمەلگەهێن ماین دبن دەستێ داعشێ دا بێنە رزگاركرن،داكو خەلك بزڤرت و ل سەر ئاستێ نێڤ دەولەتی هاریكاریا خەلكێ شنگالێ بێتە كرن و باژێر بێتە ئاڤاكرن.
تُتاح هذه الصورة أيضا في: کوردی
