بنگەهێ لالش..31سالێن كەد و خزمەتا بەردەوام
بەختیار قادر
دامەزراندنا بنگەهێ لالش ل 1993/5/12 وەرچەرخانەكا مەزن بوو ل ناڤ جڤاكا كوردستانی ب گشتی و یا ئێزدی ب تایبەت ژ ڕوویێن ڕەوشەنبیری وجڤاكی و بگرە ڕامیاری ژی دەما هەر بوویەرەكێ هەلویست خواستبا،ئەڤ بنگەهە دئێتە هژمارتن ب یەك ژبەرهەمێن خوونا هەزارەها جانگۆریێن كورد وكوردستانێ سەرەڕایی وان هەموو بەربەستێن هاتینە پێشیا كاروانێ وی ب درێژاهیا ڤان هەموو سالا دلسۆز و وەفادارێن ئەندام لێ ژ دەستەیێن بلند بگرە وهەتا ب تایی ونڤیسنگەهێن ب سەرڤە و دیسان دەستەیا گشتی ب حەز وڤیانەكا ژدڵ وئیرادەیەكا بێ دەست دانین بەردەوامی ب كار وخەباتا بنگەهێ لالش داینە ودروشمێ(لالش كانیەكا زەلالە دهورتە درووبارێ ڕەوشەنبیریا كوردی دە ) ب كریار جێ بەجێكرینە.
وەكو هەموو جاران دئێتە خویاكرن بنگەهێ لالش هاتە ئاڤاكرن ل سەر دەستێ ژمارەیەكا ڕەوشەنبیرێن ئێزدیان ڤە ب پشتەڤانیا حكومەتا هەرێما كوردستانێ،هزرەكا مەزن بوو و ئێكگرتنەكا هەرە باشبوو ژبۆ مللەتێ ئێزدی و ئێزدیاتیێ د چارچۆڤێ كوردی و كوردستانێ دا،ل دەمێ بنگەهێ لالش ل دهۆكا داسنیا هاتیە دامەزراندن بۆ ئێزدیان د چارچۆڤێ ڕەوشەنبیریا كوردی دا پێتڤیەكا مەزن بوو ل سەردەمەكێ سەخت و دژوار دا،پشتی حكومەتا گۆڕب گۆڕ ژ ناڤچۆیی ژمارەیەكا زۆر باش یا تایی و نڤیسینگەهێن لالش ل دەڤەڕێن ڤەقەتیایی ژ هەرێما كوردستانێ هاتنە ڤەكرن ب مەرەما پێشكێشكرنا خزمەتا ڕەوشەنبیری و جڤاكی بۆ خەلكێ وان دەڤەران و ژبۆ ئەنجام دانا چالاكیێن هەمەجۆر.
نائێتە ڤەشارتن كوئەڤە ماوێ 31 سالانە بنگەهێ لالش یێ ڕەوشەنبیری و جڤاكی بەردەوام كار و خەباتا خۆ دكەت ژبۆگەهاندنا وێ پەیاما پیرۆز،ب ئارمانجا نرخاندن وتۆماركرنا مێژوو وداب ونەریت وكەلتۆرێ ڕەسەنێ ئێزدیاتیێ،هەرچەندە ئەم نكارین ب درێژی بەحسێ چالاكی ودەستكەفتێن ڤی بنگەهی بكەین،بەلێ دچەند سالێن بۆری دا كاریە ڕۆلەكێ ئێكجار بەرچاڤ ببینت ئەوژی دبوارێ دانەنیاسینا ڕێورەسمێن ئێزدیان ژبۆ وان ڤەكۆلەر و رۆژنامەڤان وچالاكڤانێن بیانی،ژبلی تۆماركرن ودیكیۆمێنتكرنا ئەرشیفەكێ باش ژوان بوویەرێن جینۆسایدا ئێزدیان ئەوا ل 3/8/2014روودایی وتا نهۆ ژی خەلكێ مە یێ قوربانیێ ددەت.
هەروەسا هەر ژ ڕۆژا دامەزراندنا بنگەهێ لالش وهەتا نها پووتەكا مەزن ب تۆر وچاندێ دێرین یێ جڤاكێ ئێزدی ب تایبەت هاتیە دان كو تێدە هەموو دابونەریتێن كوردەواری یێن دیرۆكی ل درێژاهیا دیرۆكێ ژلایێ باب وكالان ڤە هاتینە پاراستن جهێ خۆ دگرن وبەردەوام پێگیریەكا گرنگ پێ هاتیە كرن،هەروەسا ئەو بوویە جهێ خەمخۆریەكا مەزن لناڤ تەڤایا پێكهاتەیێن كوردستانێ وهەردەم ب ڕێیا ڤی بنگەهی بزاڤ ژبۆ ساخكرنا كەلتۆرێ كەڤنار یێ مللەتێ كورد هاتیە كرن،ل سەر ئاستێ سەركردایەتیا سیاسی یا كوردستانێ ژی هەموو جاران پالپشتی ل كار وچالاكیێن ڤی بنگەهی هاتینە كرن وپووتەكا مەزن ب گرنگیا هەبوونا وی هاتیە دان وپشتەڤانێ بیروبۆچوونێ وی بووینە،دیسان نایێ ژبیركرن كو دئەڤان كاودانێن خراب یێن دەڤەرا مە پێرە دەربازبووین بنگەهێ لالش ڕۆلەكێ بەرچاڤ وباش هەبوویە وخۆ ل خەلكێ خۆ كریە خودان و ل بەر بارێ وان ڕابوویە دهەموو بواراندە و ب تایبەت دگەل خەلكێ شنگالێ پشتی ڕەوشا ئاوارەبوونێ و ژیانا ناڤ كەمپان،هەر دیسان بابەتێ هاریكاریا قوتابیێن ئێزدی ل زانكۆ وپەیمانگەهێن سەر ب حكومەتا فیدرال ڤە وڤەگوهاستنا وان بۆ هەرێما كوردستانێ،و هاریكاریا وان دگەل نڤیسەرێن كورد ب گشتی و ئێزدی ب تایبەت ومەزاختنا چاپكرنا ژمارەكا مەزن ژبەرهەمێن وان یێن هزری و ڕەوشەنبیری ل سەر ئەركێ خۆ گرتین.
دووبارە پیرۆزبت 31 سالیا دامەزراندنا بنگەهێ لالش ل تەڤایا گەلێ كورد و كوردستانێ ب گشتی و ئێزدیخانێ ب تایبەت،هیڤیدارین بەردەوام ئەڤ خزمەت و خەبات بێتەكرن بۆ بدەستڤەئینانا دروشمێ لالش،ژبەركو بەرەڤانیكرن ژ كوردستانێ ئەركەكێ ئۆلی و نەتەوەیی یە و ئەردەك ل جیهانێ نینە بناڤێ ئێزدیخانێ تەنها كوردستان نەبت ئاڤەدان و ئارامیا كوردستانێ دێ ئێزدیاتی د گەشەكرنێ دابت و دێ ب هەموو مرازێن خۆ شادبت.
تُتاح هذه الصورة أيضا في: کوردی
