شەڤ بەرات ل دەمناسینا ئێزدیان دە
حیدر عربۆ الیوسفانی
شەڤەکە ژ شەڤێن خێر وبەرەکەتێ کو ڤێ روناهیا گەش ل سەر ئەردێ خودێ دا دبەردەت ،شەڤا دوعا و درۆزایە، شەڤا سجودەتێ و عبادەتێ یە ،شەڤا ناز و نەعمەتێ یە ،شەڤا خودێناس و ئولدارایە ، شەڤا ب هەزار شەڤی یە ، شەڤا مللەتێ ئێزدی یە .
ئەڤ شەڤە ، شەڤ بەراتێ ب حسابا قەمەری دهێتە گێران وەك (جەژنا حەجییا )،دکەفتە دناڤبەرا شەڤا (14) لسەر (15)ێ مەها شەعبانێ ب سالناما مشەختی (کۆچی )، هەر سال ئەڤ شەڤ (شەڤ بەرات )دەھ ڕۆژان دهێتە پێش ، شەڤەکا پیرۆزا ل جەم ئێزدیان . ئەڤ هەلکەفتە هەر سال تێتە گوهۆرین ، ئانکو ل هەموو دەمێ ساڵی تێتە گرن و هەر سێ سالان د ئێك هەیڤ دا دئێتە پیرۆزکرن وەکو دڤێ سەبەقا قەولی ژ (قەولێ مەرسوما جەبێر )دا دیار دبە :
شەڤەکا ل ناڤ شەڤانە
ب گۆتنا شێخسنێ ئادیانە
ئەو شەڤ ، شەڤ بەراتە
خەو نا کەفت ل چاڤانە
دگەریێت ل سەر دوازدە مەهانە
خێر و عەبادەتا وێ شەڤێ قاسی هەموو مەهانە
دڤێت هەیڤ یە تەمام بت (بەدر) هەیڤا ل چاردێ بت ، چونکی هەیڤ ل شەڤا (15)ێ دهێتە گرتن (خسوف)، و گەلەک جاران ل شەڤ بەراتێ هەیڤ هاتییە گرتن ، ل دەمێ شەڤ بەراتێ دڤێت هەیڤ و رۆژ ئێک و دوو نەبینن د شەڤا شەڤ بەراتێ دا .
هەر دیسان ئەڤ رێ و رسمە دگرێداینە ب زڤرینا هەیڤێ ڤە لدۆر ئەردێ و زڤرینا هەردووکان پێکڤە لدۆر رۆژێ دکومەلا رۆژێدا و چێبوونا وەرزێن سالێ و شەڤ و رۆژ و چەندین روودانێن دی یێن سروشی .چما ئەڤ هەلکەفتە (شەڤ بەرات ) ل ڤی دەمی دا ، ئانکو ل (15)ێ هەیڤا ئەسمان ب هژمارا کۆچی دا دهێتە گێران ؟
لڤی دەمی هەیڤ ل بلندترین پلە ئارزی یە یێ ب ڕۆناهی دا یە و یا بانە و دڤێت مرۆڤ کاربێ وێ شەڤێ ژ شەڤێ دی یێن هەیڤێ ژێکجودا کەت . وەک تێ زانین پێدڤییە بکڤێت نێڤا هەیڤا شەعبانێ یا کۆچی ، ئانکو ل (14لسەر 15)ێ هەیڤێ ، بو زانین هەیڤێن قەمەری دبنە (28-29)رۆژ ، نە وەکو هەیڤێن سالناما زاینی(30-31)رۆژان . ئایا چما ئەڤ هەلکەفتە (شەڤ بەرات )و (جەژنا حەجیا)ب سالناما کۆچی دئێتە گێران و هەر سال دهێتە گهۆرین؟ بۆ زانین هەموو جەژن و هەلکەفتێن ئێزدیان ب سالناما رۆژێ دئێتە گێران دەمێن خوە دجێگرن و نە گۆرن.
تُتاح هذه الصورة أيضا في: کوردی
