تاك و لڤینا هەستا نەتەوەیی یا وەلاتی
سالح حەكیم
هەر مرۆڤەكی د ژیانێ دا چ پێنەڤێت بزاڤا لڤین و گرنگیا هەست كرنێ ل جەم هەیە، هەر كەسەكی ب شێوە و ئەگەرێن جودا جودا هەستێن وی دلڤیت و دیار دبت،دێ بینی تشتەكێ گەلەك نۆرمالە هەر تاكەك وەكو هزر و دیتنا خۆ ئەو ڕوودانا بڤێت ب ڕێیا كاریگەریا هەست و سۆزان ب سەلمینت ، ب تایبەت ل وی جیێ لێ ژ دایكبووی و مەزن بووی، لەوران پێتڤیە هەر تاكەكێ كوردستانێ ژی د ڤێ قۆناغا هەستیار و نازك دا هەستا نەتەوەیی ل جەم گەرم و گورتر بت، بەرۆڤاژی ئەڤا دئێتە دیتن ب تایبەتی بۆ ڤێ قۆناغێ باشترە بزاڤ و لڤینێن خۆ بددەنە كاری.
ڕاستە خەلك ب تایبەتی تەخا گەنجان ژبەر نەدیتنا دەلیڤێن كاری یێن بێزاربووین، ئەڤەژی ئێك ژ سەدەمانە بێزاری ل جەم گەنجان ئاشكەرا بت، لەوران پەنایێ دبەتە كۆچكرنا ژ دەرڤەیی وەلاتی، ئەڤ هەموو ئەگەرنە بۆ جیێن پەیوەندیدار دزڤرت، لەوران دڤێت چارەسەریەكا بلەز بێتە دیتن چنكو گەنج پاشەرۆژا مللەتانە، لێ نابت هەر تشتەكی ب ڕەشبینی تەماشە بكەین و خۆ تەسلیمی ڤی ژیوارێ ئالۆزێ ئیرۆ هەیی بكەین،پێتڤییە هەر تاكەكێ كوردستانی ب ئیرادەیەكا بهێز ب ئەركێ خوەیێ وەلاتپارێزیێ رابت، ئانكو ڤیانا وەلاتی یا ب هێزتر و خورتتربت ژ ڤینا حزب و لایەنێ ئەو دگەل دا،دڤێت د ئیرۆ ڕۆژ دە پتر ژ هەر دەمەكێ دیتر پتر ب گەرماتییا دلێ خۆ كار بۆ پێشڤەبرنا وەلاتێ خۆ بكەین و هەڤپشك و ڕێكخستن مە هەبن ب ڕێیا كێشان و پیڤانا كارێن جوانتر ئەدابكەین فەرە ژی هەر ئێك د ڕێیا كارێ خۆ دا یێ ڕژد و دلسۆز بت بۆ ئەنجامدانا هەر كریارەكا د خزمەتا وەلاتی دابت نەخاسمە د هەبوونا كاودانێن نۆكە یێ جڤاكێ كوردستانێ تێدا دەرباز دبت.
ئەركێ هەر كەس و لایەنەكی یە ب ڕێیا هەست و سۆزان خەما ڤی وەلاتی ب ستۆیێ خوەڤە بگرت و خۆ ماندی بكەت داكو بكارین ئاخ و نەتەوا خۆ ژ رووبرووبوونا هەر پێشهاتەكا نەخوازیار بپارێزین،چنكو بەرپاكرن و سەپاندنا هەڤدەرێن مە بۆ هەر دەمەكی پیلانێن وان د ئامادەنە و پیلانان بۆ ژ ناڤبرنا ناڤێ كوردان دگێرن،لەوران پێتڤییە هەر تاكەك ژلایێ خۆڤە یێ ڕاستگۆبت وەكو تەرازوویا كێشان و پیڤانێ، هەروەسا پێتڤییە هەموو ئالیێن سیاسی هەڤسەنگیەكا هەڤبەش و تەمام دورست بكەن و ب ڕوومەت و ب وەفاداری ژ پێناڤی گەل و وەلاتی دا خزمەتێ بكەن دەستكەفتێن هەین بپارێزین و بۆ دەستكەفتێن مەزنتر كار بكەن.
تُتاح هذه الصورة أيضا في: کوردی
