ته‌مموز 14, 2024

Lalish Media Network

صحيفة إلكترونية يومية تصدر باشراف الهيئة العليا لمركز لالش الثقافي والاجتماعي في دهوك - كوردستان العراق

سه‌رۆك نێچیرڤان بارزانى په‌یامه‌كێ د یادا جینۆسایدكرنا بارزانیان دا به‌لاڤ دكه‌ت

سه‌رۆك نێچیرڤان بارزانى په‌یامه‌كێ د یادا جینۆسایدكرنا بارزانیان دا به‌لاڤ دكه‌ت
گاڤ

سه‌رۆك نێچیرڤان بارزانى، سه‌رۆكێ هه‌رێما كوردستانێ راگه‌هاند، ئه‌ڤرۆ ب رێز و خه‌مگینى یادا چل سالیا ئه‌نفالكرن و بێسه‌رچوونكرنا هه‌شت هزار سنێله‌ و گه‌نج و زه‌لام و پیرین بارزانى دكه‌ین كو ژ دوماهیا ته‌مووزێ تا ناڤه‌ڕاستا ئابا سالا 1983یێ ل كۆمه‌لگه‌هێن زۆره‌ملێ، بوونه‌ قوربانى تاوانه‌كا دڕاندانه‌ و هه‌وه‌كا ره‌ش یا ده‌سهه‌لاتا وى ده‌مى یا ئیراقێ و ئێدى چ جاران ڤه‌ناگه‌ڕیت.

سه‌رۆك بارزانى د دریژاهیا په‌یاما خۆ دا دبیژیت: ب هزاران خێزانێن بارزانى بێ ده‌سهه‌لات ل كۆمه‌لگه‌ها قۆشته‌په‌، به‌حركێ، هه‌ریر، سۆران و هنده‌ك جهێن دى بێ باب و برا و ب هزاران خانمێن بارزانى بێ زه‌لام كرن و نه‌چار بوون ب تنێ رووبڕووى چاره‌نڤیسه‌كێ نه‌دیار و سه‌خت ببن و خۆ ل به‌ر ده‌هان ده‌رده‌سه‌رى و نه‌هامه‌تیان بگرن و بمینن.

هه‌ر د په‌یاما خۆ دا نێچیرڤان بارزانى گۆت: ئه‌و بۆ زاڕۆیێن خۆ بوونه‌ باب، بۆ په‌یداكرنا بژێویا ژیانێ و په‌روه‌رده‌كرن، ئازار و سه‌ختى و نه‌خۆشیێن مه‌زن دیتن، خۆ ل به‌ر نه‌بوون، هه‌ژارى و بێكه‌سیێ گرتن و ب گیانه‌كێ پڕى گوهۆڕین یێن بلند به‌رهنگارى ژیانێ بوون و ب لێهاتن نفشه‌كی نشتیمان په‌روه‌ر په‌روه‌رده‌كر، ده‌ستێ ئێك ب ئێك یێ وان دایكێن میهره‌بان و دلسۆز ماچ دكه‌م.

سه‌رۆكێ هه‌رێما كوردستانێ ئاشكردكه‌ت، ئه‌نفالكرنا بارزانیان وه‌ك هه‌موو وان تاوانایه‌ یێن د ده‌رحه‌ق گه‌لێ كوردستانێ دا هاتینه‌ كرن، نه‌ كو هه‌ر هێز و تێهنا گه‌لێ مه‌ بۆ به‌رهنگاربوونا سته‌م و دكتاتۆریێ خاڤ نه‌كریه‌، به‌لكو گیانێ به‌رهنگاربوون و ئیراده‌یا سه‌ركه‌فتن و ئازادیێ ل ده‌ف ته‌ماما گه‌لێ كوردستانێ ب گورتر كریه‌ و ب باوه‌ركا بهێزتر به‌رده‌وامى ب تێكۆشینێ دا.

نێچیرڤان بارزانى ل دوماهیا په‌یاما خۆ دا سلاڤ و دروود بۆ قوربانیێن ئه‌نفالان و ته‌ماما شه‌هیدێن كوردستانێ هنارتن و سه‌رێ رێز و نه‌وازشێ ل هه‌مبه‌رى گیانێ پاكێ وان د چه‌مینن و سلاڤ و سوپاسى و پێزانێن خۆ بۆ هه‌موو وان جوامێرێن ل هه‌ولێرێ و ره‌خودۆران و ل هه‌ریر، باتاس، سۆران و ل هه‌ر جهه‌كى بن یێن هاریكاریا خێزان و كه‌سوكارێن ئه‌نفالكرى یێن بارزانیان كرى و بووینه‌ په‌ناگه‌ها وان هنارتن.

هه‌ر د ڤێ یادێ دا سه‌رۆكێ هه‌رێما كوردستانی دیاركر، هه‌رێما كوردستانێ دره‌وشه‌كا هه‌ستیار دا ده‌رباز دبیت و دوپاتى ل ئێكریزى و ته‌بایى و پێكڤه‌ییا هه‌موو ئالى و پێكهاتێن هه‌رێما كوردستانێ دكه‌ین كو تاكه‌ رێكا سه‌رفه‌رازیێ و سه‌ركه‌فتنا مه‌یه‌.

تُتاح هذه الصورة أيضا في: کوردی

مقالات ذات صله

الرد

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Copyright © 2021 by Lalish Media Network .   Developed by Ayman qaidi