په‌یاما سه‌رۆكێ حكومه‌تا هه‌رێمێ د یادا ئه‌نفالكرنا بارزانیان دا
گاڤ
سه‌رۆكێ حكومه‌تا هه‌رێما كوردسانێ د سالیادا جینۆسایدكرنا بارزانیان دا په‌یامه‌ك به‌لاڤكر و راگه‌هاند، ئه‌و تاوانا مه‌زن پشكه‌ك ژ پێلا ره‌گه‌زپه‌رستنا رژێما به‌عس یا ژ ناڤچوویى یا به‌عس بوو دژى گه‌لێ كوردستانێ.
مه‌سروور بارزانى، سه‌رۆكێ حكومه‌تا هه‌رێما كوردستانێ د یادا جینۆسایدكرنا بارزانیان دا په‌یامه‌ك به‌لاڤكر و راگه‌هاند، ئه‌ڤرۆ چل سال ب سه‌ر ئێك ژ درنده‌ترین تاوانێن رژێما به‌عسا ئیراقێ ده‌ربازبزون كو جینۆسایدكرنا هزاران مرۆڤێن بێتاوان یێن بارزانى بوو، بتنێ ژبه‌ركو كورد و بارزانى بوون هاتنه ده‌سته‌سه‌ركرن و پاشى ل بیابانێن ئیراقێ ب ساخى بنئاخكرن.
مه‌سروور بارزانى گۆت: ئه‌ڤ تاوانا مه‌زن پشكه‌ك بوو ژ پێلا ره‌گه‌زپه‌رستنێ یا رژێما به‌عسا ژ ناڤچوویى دژى گه‌لێ كوردستانی كو بیسه‌روشوونكرن و جینۆسایدكرنا كوردێن فه‌یلى و ئه‌نفالكرنا ناوچیێن بارزان، گه‌رمیان و به‌هدینان و كیمابارانكرنا هه‌لبجه و چه‌ندین ده‌ڤه‌رێن دى یێن كوردستانی و زنجیره‌یه‌ك بوو ژ وان تاوانانێن هۆڤانه ل دژى خه‌لكێ كوردستانێ هاتیه‌كرن.
سه‌رۆكێ حكومه‌تا هه‌رێمێ دیاركرن جهێ داخێ یه پشتى ده‌ربازبوونا چل سالان ب سه‌ر ڤێ كاره‌ساتێ دا هیشتا هنده‌ك كه‌س هه‌نه ب هه‌مان عه‌قلیه‌ت و هزرا شۆفێنى و سه‌رده‌مێ ئه‌نفالێ دڤێن مافێن ره‌وا و ده‌ستوورى یێن گه‌لێ كوردستانێ پێشێلبكه‌ن، ل ده‌مه‌كى خه‌لكێ كوردستانێ ب هزاران قوربانى داینه و رووبڕووى چه‌ندین تاوان و كاره‌ساتێن مه‌زن بووینه بۆ به‌ره‌ڤانیكرن ژ ناسنامه‌یا نه‌ته‌وه‌یى و نشتیمانى یا خۆ و چ جاران ده‌ستبه‌ردار نابیت.
بارزانى ئاشكرار، ده‌ڤه‌را بارزان ئێك ژ وان ناوچه‌یێن كوردستانێ یه كو ل سه‌ده‌یا بۆرى ب ده‌هان جاران هاتینه وێرانكرن و كۆمكوژى و جینۆسایدكرن، به‌لێ ئه‌و هه‌موو زولم، سته‌م و تاوانه نه‌شیاینه ئیراده‌یا نه‌ته‌وه‌یى و گیانێ خۆراگرى و به‌رگریێ ل ڤێ ده‌ڤه‌رێ ژ ناڤ ببه‌ت، هه‌رده‌م دژى زولم و سته‌مێ سه‌رهه‌لدایه و ب ئه‌گه‌را خۆراگرى و قوربانیدان و خوینا پاقژا شه‌هیدان ئه‌ڤ قه‌واره‌یێ ده‌ستوورى یێ هه‌رێما كوردستانێ به‌رهه‌م هاتیه و پێدڤیه ب هه‌موو شێوه‌‌یه‌كى داكۆكیێ لێ بكه‌ین و زێده‌تر گه‌شێ پێ بده‌ین.
د سالیادا كاره‌ساتا جینۆسایدكرنا بارزانیان دا سه‌رۆكێ حكومه‌تا هه‌رێمێ دبێژیت: خواست و داخوازیێن هه‌رێما كوردستانێ بۆ قه‌ره‌بووكرنا مافێن دارایى و مه‌عنه‌وه‌ى یێن بنه‌مال و كه‌سوكارێن ئه‌نفالكریان و خه‌لكێ سته‌ملێكرى یێ كوردستانێ ژ ئالیێ حكومه‌تا ئیراقێ و ل گۆره‌یى ده‌ستوورى دوپات دكه‌ین و پێدڤیه هه‌موو كار بۆ نه‌هێلانا هزرا ئه‌نفال و دورباره‌نه‌بوونا وان تاوانان بكه‌ین.
مه‌سوور بارزانى ل دوماهیا په‌یاما خۆ دیاركر، د سالڤه‌گڕا جینۆسایدكرنا بارزانیان دا سه‌ری رێزێ بۆ بارزانیێن ئه‌نفالكرى و هه‌موو شه‌هیدێن كوردستانی دچه‌مینین و هه‌رده‌م ب رێز یادا وان دكه‌ین و هه‌روه‌سا رێز و پێزانین بۆ كه‌سوكار و بنه‌مالێن سه‌ربلندێن ئه‌نفالكریان كو رووبڕووى رۆژێن سه‌خت و دژوار بووینه هنارتن، كو شیاینه ب سه‌ربلندى زاڕۆ و نفشێ خۆ پێ ب گه‌هینن و سوپاسیا جوامێرى و د هاوارچوونا خه‌لكێ قاره‌مان و نشتیمانپه‌روه‌رێ هه‌ولێر و ره‌خودۆرێن وێ بكه‌م كو ل ده‌ما كاره‌ساتێ هاریكارى و هه‌ڤسۆزێ ئه‌نفالكریێن بارزانى بووین.
تُتاح هذه الصورة أيضا في: کوردی
