پتری حەفت هزار روفاتێن بارزانیان ل گۆڕێن ب كۆم ل باشوورێ ئیراقێ ماینە
ئه‌ڤرۆ نيوز:
پشتی بۆرینا 40 سالان ل سەر جینۆسایدكرنا هەشت هزار بارزانیان ژ لایێ رژێما بەعس ڤە، هەتا نوكە ب تنێ روفاتێن 696 جینۆسایدكریان بۆ بارزان هاتینە زڤڕاندن و ل گورستانەكا تایبەت هاتینە ڤەشارتن و سالانە بیرەوەریا وان دهێتە ساخكرن، بەلێ ئەڤ سالە چو رێورەسمێن فەرمی ناهێنە كرن.
رێبوار رەمەزان، رێڤەبەری شەهید و ئەنفالكریان ل بارزان بۆ ئەڤرۆ خویا كر، ل سالا 1983 رژێما بەعس ب چەند قووناغان هەشت هزار بارزانی جینۆسایدكرن و ب ساخی بن ئاخكرن و گۆت: «ژ سەر جەمێ وان هەشت هزار بارزانیێن جینۆسایدكری ب تنێ روفاتێن 696 جینۆسایدكریان ل باشوورێ ئیراقێ بۆ بارزان هاتینە زڤڕاندن».
گۆتژی: «هەتا نوكە روفاتێن حەفت هزار و 304 كەسێن بارزانی ل گۆڕێن ب كۆم یێن باشوورێ ئیراقێ ماینە و پێدڤیە حوكمەتا ئیراقێ ئەمنیەتا وان دەڤەران بۆ لژنێن ئینانەدەرا گۆڕێن ب كۆم بكەت، دیسا پرسا جینۆسایدا بارزانیان ل سالا 2009 بۆ 2011 هەتا 40 روونشتنێن داگەهێ ل سەر هاتنە كرن و ل دادگەها بلندا تاوانێن ئیراقێ ب جینۆساید هاتە نیاسین».
تُتاح هذه الصورة أيضا في: کوردی
