Afreteka rizgarbûyîa Êzidî: Tevî Rewşên Dijwar, Îradeya Me ya ji bo Edaletê Qet Nayê Şikandin
Tora Laliş ya Ragehandinê
Li ser derbasbûna deh salan piştî komkujiya ku rêxistina DAIŞê li dijî civaka Êzidî pêk anî, êş û azarên rizgarbûyan û malbatên qurbaniyan berdewamin u Ev yek ji aliyê Sureya Ezîz, afreteke Êzidî ya rizgarbûyî ji gundê Koco ve hat piştrast kirin. Wê di destpêka axaftina xwe de diyar kir ku pirsgirêkên wan ji aliyê aliyên têkildaran ve bi qasî pêwîst nehatine girtin. Sureyya nerazîbûna xwe ji kêmbûna piştgiriyê û paşguhkirina edaletê anî ziman, lê tekez kir ku îradeya wan a xurte û ji bo bidestxistina edaletê her berdewamîn.
Di daxuyaniya xwe ya ji bo “Sama”yê de, Sureyya Ezîz nerazîbûna xwe ji piştgiriya kêm a ku ji bo rizgarbûyiyan tê dayîn anî ziman. Wê bal kişand ser wê yekê ku dadgehên navneteweyî û herêmî tu gavên berbiçav ji bo darizandina tawanbaran neavêtine.
Wê got: “Me hêvî dikir ku DAIŞiyên ku hovîtiyên herî mezin li dijî civaka Êzidî kirine bên darizandin, lê me heta niha tu pêşveçûneke girîng nedît.”
Sureyya Ezîz behsa êş û azara xwe ya şexsî jî kir û got: “Şeş sal derbas bûn ser rizgarbûna me ji destê DAIŞê, lê hê jî çar endamên malbata min winda ne. Em hêvî dikin ku ew sax bin, lê em ji qedera wan tu tiştî nizanin. Di heman demê de, termên nêzî 20 kesên malbata min li Teba Dadî ya Bexdayê ne û me hê ew negirtine. Em hêvî dikin ku em wan bigirin da ku em bikarin bi merasîmeke layiqî wan li goristana Koco veşêrin.”
Sureyya Ezîz tekez kir ku gelek jin hîn jî di rewşên dijwar de dijîn û got: “Tevî hemû zehmetiyan, em bi saya îradeya xurt a ku em tev xwedî lê ne dijîn. Îradeya me ji hemû astengiyan xurtir e û em ê qet teslîm nebin. Em ê têkoşîna xwe ya ji bo bidestxistina edaletê û edaletkirina malbatên qurbaniyan û darizandina tawanbaran bidomînin.”
Di dawiya axaftina xwe de, Sureyya Ezîz bang li civaka navneteweyî û hikûmetên Bexda û Hewlêrê kir ku dadgeheke taybet ji bo darizandina tawanbarên DAIŞê yên ku komkujiya Êzidiyan pêk anîne ava bikin. Wê tekez kir ku “Dem hatiye ku edalet pêk were û mafên malbatên qurbaniyan bên dayîn.”
تُتاح هذه الصورة أيضا في: Kurdî
