هەلبژارتن وهزركرن دئایندەیی دا
خالد ئەحمەد بادی 
هەلبژارتن ئێك ژ سیمایێن شارستانی نە ل جیهانێ وپیڤەرەكێ خورستی وئێكلاكەرە بو هەر دوژمنكاری ودكتاتوریەكێ .و دانانا سنورانە بو هەر زێدە گاڤیەكێ . من دڤێت ئاماژێ ب گرنگی ونەرێنی و مێژویا هەلبژارتنا بدەم . هەلبەت سیستەمێ هەلبژارتن ودەنگدانێ ژی مینا هەر یاسایەك وپەیرەوەك و سیستەمەكی وەرار وپێشكەفتن بخوڤە دیتی یەو لناڤ كومەلگەه ومللەتێن جیهانێ دا هاتیە پەیرەو كرن وبەربەلاڤ بویە وكومەلگەه و وەلاتێن جیهانێ مفا ژێ وەرگرتیە. بێ گومان سیستەمێ هەلبژارتن ودەنگدانێ ئەرێنی ونەرێنی یێن خو هەنە ئەگەر كارێن ئەرێنی بن دبیتە جهێ خوشحالیا وەلاتیان وئەگەر دنەرێنی بن بێ گومان دبنە جهێ پوسیدەیی وپەریشانیا وەلاتیان . زور بوچونێن جودا جودا هەنەدپروسە وبانگەشەیا هەلبژارتنا دا . پروسا هەلبژارتنا ئامرازەك بوو دكەڤندا كو وەلاتێن جیهانێ پشت بەستی یا خو ددا سەر وبتایبەت ل ئەسینا ویونان وروما لێ رهێن ڤی كاری دزڤرن دجیهانا هەڤچەرخ دا بو پەیدا بونا وێ یا پەیتا پەیتا (تەدریجی) و پەیدا بونا حكوماتێن نوینەرایەتی ل ئەوروپا وئەمریكا ولڤی سەردەمی دا دانپێدان ب دەنگدانا گشتی تێتە كرن ژلایێ كومەلا نێڤدەولی ڤە كو مافەكێ رەوایێ جیهانی یەو بو سەرجەم مللەتانە و سەرەرای كو تا نوكە هندەك مللەت ل جیهانێ هەنە و نە گەهشتینە ڤێ باوەریێ . رامانا دەنگدانا گشتی ئانكو نەبونا ئاستەنگێن مەزن دپروسا هەلبژارتنا دا یێن گرێدای وەلاتی وژبو بەرپاكرن وپەیداكرنا ڤێ پروسێ ڤە هندەك وەلات دەنگدانێ دكەنە ئەركەكێ نەتەوەیی وكریارا دەنگدان وهەلبژارتنا ب یەك جار نە پەیدا بویە بەلكو ب كریارەكێ كو بدرێژیا چەرخان پێشكەفتی یە. وبەلكو بو زەلامان دوو خوشی تێدا بون ئەوژی كو مافێ دەنگدان ومافێ خو هەلبژارتنێ هەبویە لێ بو ئافرەتێ ل دەست پێكێ چ ماف نەبون نەدەنگدان ونە خو هەلبژارتن .لدەمێ هەلبژارتن تێنە ئەنجام دان پێش هەیڤەكێ هەوێن بانگەشەیا هەلبژارتنان تێنە ئەنجام دان كوژمێن مەزنێن پارەی لێ دهێنە مەزاختن وبەرنامە وگوروپ بو كارێ ناڤبری تێنە داناندن ودەست نیشان كرن ژبو برێڤە برنا ڤی كاری .ل وەلاتێ مە كوردستانێ ژی پروسەیا بانگەشەیا هەوێن هەلبژارتنان تێنە كرن وب هەمی شێوازان ئەڤ هەوە تێنە برێڤە برن وتشتەكێ نوی یە بو مە پێش وەلاتێن دی یێن جیهانێ ڤە چونكە چ جاران دوژمنێن كوردا رێك نەدایە كو هەلبژارتن ودەنگدان هاتبانە ئەنجام دان ئەگەر هاتبانە كرن ژی دا هندەك نوینەرێن كارتونی بو كوردان دانن و دڤێت رێژا سەركەفتنێ بو دوژمنان گەهەشتبا (99%) ژ سەدێ .نوكە هەر تشتەكی گهورین بخوڤە گرتینە وسایەسەرێ دەستهەلاتا كوردی وحكومەتا هەرێما كوردستانێ ئازادی وفرەحیزبی ورادەربرین وفرەهزری هەیە ویێ چ خزمەت وخەبات ژی نەبیت یان چ شیان ورابردەو نەبیت دشێت خو بەربژێر وكاندید بكەت وبچیتە دناڤ پروسەیا سیاسی وهەروەسا بەژداریێ دهەلبژارتنان دا بكەت .پێش سالێن بوری ڤە ل كوردستانێ بانگەشەیا هەلبژارتنا باشیەك رێژەیی بخوڤە دیتی یە ودێ بیتی ل پتریا باژێرو باژَێركێن كوردستانێ هەر لایەنەك ب ئازادانە ولدیڤ حەز وشیانێن خو پروپاگندێ بو لیستا خو یان كەسەكی دكەت ودبیت دەنگان ژی بدەستڤە بینیت وببیتە دەستهەلاتدار .دەمێ باژێرێن خو دبینین جادەو كولانێن وێ مینا باخچەك یان گولخانەكێ نە هەمی رەنگێن دناڤ دا زەر و سور وكەسك مور وسپی وقەهوایی وپرتەقالی وشین یان ژی هەمی قەبارە وبالا دناڤ دا ب راستی ئەڤە مزگینیەكا دلخوشكەرە كو هەمی لایەن دبەشدار وهەر ئێك دكێبركا خو دا دێ هەول دەت كو پتر باشی یا بكەت دا كو خەلك متمانە وباوەریێ بدەتێ دا كو دەستهەلات بكەڤیتە دەست . خوزی ئەڤ ئێمناهی وئازادی وسەرفەرازی وپێشكەفتنا نوكە مە ل كوردستانێ هەی بمینیت وبەرەڤ باشتر ڤە بچیت وهەردەم كوردستانی ددەستێن كەسانێن ئەمین وخودان خزمەت وخەبات ومێژویەكا پاك وسەربور دابیت نەكەڤیتە دەستێ هندەك لایەن وكەسان كو بازرگانیێ ب مللەتێ مە بكەن وئەوا مە هەی ژی ژدەست بچیت. پێكڤە بەرەڤ كوردستانەكا گەشتر.
تُتاح هذه الصورة أيضا في: کوردی
