پێتڤیە حكومەتا نوو یا عێراقێ كەیسا ئێزدیان ب جینۆساید بناسینت
ئەمین شەمۆ
پشتی هەلبژارتنێن(12/5/2018)ێ یێن پەرلەمانی ل عێراقێ هاتینە ئەنجام دان هەلبەت وەكو ئاشكەرایە دێ كابینەیا حكومەتەكا نوو ل عێراقێ ئێتە دانان،ئەڤجا حكومەتەكا زۆرینەیا سیاسی بت یان لسەر بنەمایێ رێككەفتنەكا سیاسی بت …هتد،وەكو یادیار لڤی سەردەمێ نهۆ دا مللەتێ زەرەر و زیانڤێكەفتین وقوربانیەكا مەزن داین مللەتێ ئێزدی یە،ئەڤجا پێتڤیە لسەر حكومەتا نوو یا عێراقێ ئێكەمین پێنگاڤ بهاڤێژت ئەوە باوەریێ لجەم مللەتێ ئێزدی پەیدا بكت و پێتڤیە مافێن ئێزدیان یێن سیاسی و ئایینی و كۆمەلایەتی بدەتێ.
دیسان ئەگەر ئەم بەرێ خۆ بدەینە مللەتێ ئێزدی دێ بینین دەڤەرێن وان پێش هاتنا داعش ئانكو ل پێش(3/8/2014)ێ خالێن ناكۆك بووینە دناڤبەرا حكومەتا عێراقێ و حكومەتا هەرێما كوردستانێ دا و هەردیسان ب هاتنا داعش بۆ دەڤەرێ و هێرشكرنا سەر دەڤەرێن ئێزدیان،بارودۆخێ ئێزدیان ئالۆزتر لێكر و داعشێ مەزنترین تاوانێن ل دژی مرۆڤایەتیێ بەرامبەری ئێزدیان ئەنجام دان و ژمارەكا ئێزدیان كەفتنە دەستێ داعشێ دا وەكو ئێخسیر و ژمارەكا هەرە زۆرا ئێزدیان ئاوارە و دەربەدەربوون،لەورا پێتڤیە لسەر كابینەیا نوو یا حكومەتا عێراقێ بزاڤان بكت ژبۆ رزگاركرنا وان ئێخسیرێن ئێزدی یێن لبن دەستێ داعش دا،هەروەسا ئەركە لسەر ملێن حكومەتا نوو یا عێراقێ بزاڤان بكت ژبۆ كەیسا ئێزدیان لسەر ئاستێ ناڤخۆی و دەرڤە و لسەر ئاستێ نێڤ دەولەتی كەیسا ئێزدیان ب جینۆساید بێتە ناساندن،دیسان پێتڤیە قەرەبوویا خەلكێ زیانڤێكەفتی بێتە كرن و پرۆژێن خزمەتكاری ل دەڤەرێن ئێزدیان بێنە جێبەجێكرن وەكو(ئاڤ _كارەب _نەخۆشخانە _قوتابخانە _رێ _ زانكۆ و پەیمانگەهـ _ دام و دەزگەهێن میری و حكومی …..هتد ) و پێڤیە گرانیا ڤان پرۆژەیان ل دەڤەرا شنگالێ بن،ئەڤ چەندە نابتە واتایا وێ یەكێ كو دەڤەرێن دی یێن ئێزدیان ژبلی شنگالێ د تێر خزمەتكاری نە بەلكو یا فەرە پرۆژە ل هەموو دەڤەرێن ئێزدیان بێ جێوازی بێنە ئەنجام دان.
هەروەسان پێتڤیە ژلایێ ئەمنی و ئاساییشێ ڤە حكومەتا عێراقێ رێككەفتنەكێ دگەل وەلاتێن نێڤ دەولەتی و زلهێز ل جیهانێ بكت،ژبۆ پاراستنا دەڤەرێن كێمنەتەوەیان و ئێزدی ژی دناڤ دا،دیسان ئەركێ حكومەت و كابینەیا نوو یا عێراقێ یە پلانەك هەبت ژبۆ ڤەگەراندنا خەلكێ ئێزدی بۆ سەر مال و حالێن وان بەروڤاژی ڤێ چەندێ ئەگەر حكومەتا عێراقێ چەندین ژڤان پێنگاڤێن مە گۆتین ل چەند سالێن كابینەیا حكومەتێ دا ئەنجام نەدەت بێگومانە جڤاكا ئێزدی پتر باوەری ب حكومەت وگەلێ عێراقێ نەمینت و هزر ل چەند بژاردەیێن دیتردا بكن كو بژاردەیا ژهەموویان بەرئاقل چۆنا ژدەرڤەی وەلاتی و هێلانا عێراقێ یە.
تُتاح هذه الصورة أيضا في: کوردی
