هەڤژینیا پێش وەخت دجڤاكێ ئێزدیان دا بەرەف زێدەبوونێ یە
تۆرا لالش یا راگەهاندنێ/خێرهات بێدرڤان 
هزرەكا چاڤلێكری یا كەڤن تا نهۆ دناڤا جڤاكێ ئێزدی و رۆژهەلاتا ناڤین دا هەیە كو دبتە ئەگەر و كارتێكرنێ ل كچ و كورا دكن دتەمەنێ سنێلەیێ دا هەڤژینیا پێش وەخت پێك بینن،پتریا ڤی جۆرێ شووكرنێ دناڤ ئێزدیان دا ب تایبەت خەلكێ شنگالێ دزێدەبوونێ دا بوویە تا نهۆ ژی یێ بەردەوامە بارا پتر رڤانە ژ خاستنێ،نۆژدار و دەروونناس ژی دبێژن هەڤژینیا پێش وەخت ژئالیێ ساخلەمی و دەروونی ڤە كاریگەریا خۆ لسەر سنێلان هەیە.
لدۆر هەڤژینیا پێش وەخت(دلشاد سەلیم)مامۆستایە دبێژت:تۆرێن راگەهاندنێ گەلەك كارتێكرنا خۆ لسەر كچ و كورا هەیە كو هێشتا ئەو زارۆكا نەگەهشتیا قۆناغا(18)سالیێ خۆ بالغ دبینت هەولا هەڤژینیێ دكت و پەیوەندیا دگەل گەلەك لایەنا چێ دكت و هەتا دگەهتە هندێ گەلە ك جارا كور یان كچ دبێژنە خێزانێن خۆ ئەگەر هون رازی نەبن ئەم دێ خۆ كوژن،ئەڤە ڤەدگێرت بۆ دەیك و بابا دڤێت دڤی تەمەنی دا چاڤدێریەكا باش ل زارۆكێ خۆ بكن كا ئەو زارۆك چ تۆرا كۆمەلایەتی بكاردئینت و بەرێ خۆ ددەتە چ بەرنامان.
هەروەسا ژلایێ كاریگەریا ساخلەمیێ ڤە نۆژدار(سەعید شنگالی)خویاكر،دڤی حالەتێ هەڤژینیێ دا نەخۆشیا نەزیفێ چێ دبت ژ وان كەسان را ئەوێ هەڤژینیێ دڤی تەمەنێ نەگونجای دا پێك دئینن،دڤی تەمەنی دا هەڤژینیا سنێلا تێنەگەهشتی نە و نكارن مالا خۆ ب رێڤەببەن چ كارەك دروست نزانن و ژیانا وێ ژ هەموو لایان ڤە دمەترسیێ دایە هندەك دبتە ئەگەرێ خۆ سۆتنێ،ژبەركو تشتەكی ژ خۆ نزانن و نەگەهشتینە رێگە چارەیەكا دروست بۆ ئاڤەدانكرنا ژیانێ و مێشك تەمام نەبوویە و لاشێ وێ بەرهەڤ نەبوویە ژبۆ هەڤژینیێ یانكو ب شێوەكی گشتی ژیانا وان دێ شكەستنێ ئینت ژبۆ هەردوو رەگەزان،ئانكو دڤێت دتەمەنێ(18)سالیێ وسەرا ژنوو هەڤژینی بێتە پێكئینان،لێ یا هەرە دروست دتەمەنێ(25)سالیێ دا داكو كچ و كور تشتەكی ژ ژیانا خۆ بزانن و شارەزابن دئاڤاكرنا خێزانێ دا.
دیسان لدۆر كارتێكرنا دەروونی لسەر كچ و كوران مامۆستایێ دەروونی(عزەت برو)دیاركر،گەلەك ئەگەر هەنە كارتێكرنێ ل كچ و كورا دكن كو دتەمەنێ سنێلەیێ دا هەڤژینیێ پێك بینن،ئێك ژ وان هزرەكا چاڤلێكری كەڤنە تا نهۆ دناڤا جڤاكێ ئێزدی ورۆژهەلاتا ناڤین دا هەیە هزر دكن ئەگەر كچ و كور زوو هەڤژینیێ بكن زارۆكێ وان ئێ ب وانرا مەزن ببن،دیسان ژی ژلایێ ئابووری ڤە ئەگەر هاتوو مالا كچكێ بارێ وانێ ئابووری نەی باش بت كچا خۆ دەنە ئێكی بۆ هندێ هندەك دراڤی ب دەست خۆڤە بینن یان كچا خۆ ددەنە كەسەكی ژ وێ مەستر،لێ نهۆ ئەڤ جۆرە هزرە نەمانە،هەڤژینیا دتەمەنێ سنێلەیێ دا نهۆ بەرەف زێدەبوونێ دچت و تا رادەیەكی گەلەك مەزن كارتێكرنێ ل دەروونێ وان كەسا دكت یێ دڤی تەمەنی دا هەڤژینیێ دكن،ژبەركو هەڤژینیێ هندەك سالوخەت هەنە ئێك ژ وان یا فەرە هزر دهندێ دا بكن كو پشتی هەڤژینیێ وێ بكارن خێزانەكێ ئاڤا بكن و دیسان كا وێ چاوا بكارن ئەركێ پەروەردەیا زارۆكا،دوو خودانكرنا زارۆكا ب رێڤەببن و كارتێكرنەكا مەزن لسەر ژیانا كچێ هەیە تایبەت دەما دووگیان بوونێ و پشتی دوو گیانیێ گەلەك جارا دبتە ئەگەرێ ژدەست دانا دەیكێ یە،هندەك پشتی ماوێ هەڤژینیێ بەردان چێ دبت و دبتە ئەگەرێ هندێ كو ڤان هند شارەزای دپێك ئینانا خێزانێ دا نەبوویە بەری ئاڤاكن وهزر نەكریە كا چاوا سەرەدەریێ گەل مال و خەسو و كەسێن بەرامبەری خۆ بكت،ئاماژەكر دناڤا قوتابخانان دا پرۆگرامێ مە گرنگی نەدایە ڤی لایەنێ گرنگ،بتنێ هندەك قوتابخانا ماموستایێن دەروونی یان ڤەكۆلەرێ جڤاكی هەنە،ئەڤە تشتەكێ باشە كو قوتابخانە دكارت ب رێیا وان مامۆستایا هاریكاریا قوتابیا بكت،پێتڤیە گرنگی بڤی بابەتی بێتە دان،ژبەركو ل پاشەرۆژێ كارتێكرنەكا خراب وێ لسەر جڤاكێ مە هەبت.
ژبال خۆڤە بەرپرسا رێكخراوا داك بۆ گەشەپێدانا ژنا ئێزدی(سوزان سەفەر)ئاشكەراكر،وەك ریكخراوا داك دماوێ كاركرنێ دا مە گەلەك گرنگی بڤی بابەتی دایە،مە هەولدایە وان كەسێن دبن تەمەنێ(18)سالیێ دا هشیار بكن،ژبەركو دناڤا كۆمەلگەها مەدا ئەڤ بابەت بەردەوام یێ زێدە دبت ،لەوما مە هەولدا چەندین ووركشۆب و خۆلا و سمینارا ژبۆ هشیاركرنا وان ڤەكن،ئاماژەكر دناڤبەرا كچ و كوران دا جێوازی هەیە ژ دەڤەرەكێ بۆ دەڤەرەكا دی،بۆ نموونە دناڤا هندەك گوندا دا كچ ناچنە قوتابخانێ و هندەكێن دی ژی گرێداینە ب كۆمەلگەهێ وداب و نەریتێن عەشایری ڤە و پتریا ڤی جۆرێ شووكرنێ پتر دناڤ ئێزدیان دا ب تایبەت خەلكێ شنگالێ دزێدەبوونێ دا بوویە تا نهۆ ژی یێ بەردەوامە بارا پتر رڤانە پتر ژ خاستنێ،ژبەركو ئەو كارەساتا بسەرێ وان هاتی كژ وژن بوونە قوربانی،لەوا ڤیان كچێن خۆ بدەنە شوو بۆ هندێ بەرپرسیاریا كچێ بكەڤتە دستۆیێ زەلامێ وێ دا،لێ ئەم وەك ریكخراوا داك مەسەنتەرەكێ تایبەت بۆ وان حالاتا دەمێ بەردان دناڤبەرا وان كچ وكوران دا چێ بت و ئەم بكارن چارەسەریا وان بكن،لێ مە ب هەڤكاری دگەل چەندین رێكخراوا هندەك جارا حالەتێن وەسا رادەستی هندەك رێكخراوێن دیتر كرینە.
هەروەسا ئەنداما ئەنجوومەنێ ئافرەتێن كوردستانێ لقێ دهۆك(دلڤین رەشید)گۆت:دڤێت یاسا رۆلێ خۆ ببینت دڤێ چەندێ دا كو چاڤدێری هەبت لسەر ڤان كەسان ژهەموو لایاڤا،داكو ئەڤ خێزانە نەبتە خێزانەكا هەلوەشیایی دیسان ژی نەبتە بارگرانیەك لسەر جڤاك و كەسێن نە رەوشەنبیر ژێ پەیدا ببن،لەوما گرنك ئەوە كەسێ خێزانێ پێك دئینت هزرا خۆ دگەلەك خالادا بكت،ژ وان خالا ژی دڤێت تەمەنێ وان گونجایی بت ژبۆ هندێ وان ئاقلیەتەكا تایبەت هەبت داكو بكارن خێزانێ پێك بینن و دوبارە ئەڤ خێزانا پێشوەخت دەمێ تێتە پیكئینان داكو سەرنەكەفتن تێدا نەبت و ئەڤ خێزان ژی ببتە خێزانەكا سەركەفتی،كو دوی تەمەنێ تەمام دا ئەوێ هاتیە دەست نیشان كرن ژلایێ زانستی ڤە.
تُتاح هذه الصورة أيضا في: کوردی
