تۆرا لالش
ل بيره‌وه‌رييا كۆمكوژيا گرعزێر و سيباشێخدرێ و گوندێ كۆچۆ دا، ميرێ ئێزديان په‌يامه‌ك به‌ڵاڤكر و ڕاگه‌هاند، پێدڤيه ل سه‌ر هه‌موو ئاليێن حكومى و نێڤده‌وڵه‌تى كار بۆ هڵدانا گۆڕێن بكۆم بكه‌ن و ڕووفاتێن قوربانيان ده‌ربێخن.
ل بيره‌وه‌رييا 18ساڵى يا كۆمكوژيا خه‌ڵكێ ناحيا گرعزێر و كۆمه‌ڵگه‌ها سيباشێخدرێ و گوندێ عزێر، و يازده ساڵييا كۆمكوژيا گوندێ كۆچۆ، و گه‌هشتنا ڕووفاتێن 22كه‌سێن مه‌غدور يێن قوربانيێن جينۆسايدا ئێزديان ل شنگالێ بۆ كه‌سوكارێن وان پشتى چاڤه‌ڕێبوونه‌كا دڕێژ.
ئه‌و جينۆسايدا كرێت ژلايێ ڕێكخراوا داعش يا تيرۆرستى ڤه هاته ئه‌نجامدان، هه‌تا كو هه‌يڤا هه‌شت بوويه هه‌يڤا ڕه‌ش ل بيردانكا ئێزديان دا و ژێده‌رێ خه‌مگينى و كۆمكوژيێن به‌رده‌وام ل دژى گه‌لێ مه دا.
دگه‌ڵ ڤان هه‌موو ئێش و ژانێن دناڤ مه‌دا هه‌ين، هێشتا جينۆسايد ل دژى گه‌لێ مه يا به‌رده‌وامه و ئێزدى د ڕه‌وشه‌كا په‌ريشان دا ل كه‌مپان دا دژين و هه‌موو ده‌مان دڵێ وان بۆ ڕه‌ڤانديان دسۆژت يێن تا ئيڕۆ ڕۆژ بێسه‌رشوونن.
دهه‌مان ده‌مدا دووپات دكه‌ينه‌ڤه، كو پێدڤيه ل سه‌ر هه‌موو ئاليێن حكومى و نێڤده‌وڵه‌تى كار بۆ هڵدانا گۆڕێن بكۆم بكه‌ن و ڕووفاتێن قوربانيان ب جاره‌كێ ده‌ربێخن، بێى كو جاره‌كا دى برينێن وان دووباره ببن و خه‌مگين ببنه ڤه ده‌مێ ڕووفاتێن قوربانيان دگه‌هنه شنگالێ.
هه‌روه‌سا ل سه‌ر حكومه‌تا فيدڕاڵ پێدڤيه هه‌موو بزاڤان بكه‌ت بۆ بجهئينانا ياسايا ڕزگاربوويان ل سه‌ر ئه‌ردێ و دادمه‌ندى بۆ رزگاربوويان و دادپه‌روه‌ريێ بۆ وان و كه‌سوكارێن وان دابين بكه‌ن، هه‌روه‌سا لێپرسينێ دگه‌ڵ تيرۆرستێن داعشێ يێن د زيندانان دا بكه‌ن ئه‌وێن ده‌ست ل خوونا ئێزديان دا هه‌ى، زێده‌بارى بزاڤێن ڕژد بكه‌ن به‌رقراربوونا سه‌قامگێرى و ئارامى و دابينكرنا خزمه‌تگۆزاريان ل شنگالێ.
دڤێت ئه‌م ئاماژێ پێ بده‌ين، كو هێشتا جڤاكێ مه يێ خۆڕاگره و گه‌له‌ك به‌رگرى كريه و ده‌م هاتيه دادپه‌روه‌رى ڕێره‌وێ خۆ بگرته‌به‌ر و پتر كار بۆ ڤه‌گه‌ڕيانا ئاواره‌يان بۆ سه‌ر جهـ و وارێن خۆ بێته كرن.
حازم ته‌حسين به‌گ
ميرێ ئێزديان ل كوردستان، عێراق و جيهانێ
تُتاح هذه الصورة أيضا في: کوردی
