كچەكا رزگاربووی:داعش كریارێن هۆڤانە دگەل كچێن ئێزدی ئەنجام دان
تۆرا لالش یا راگەهاندنێ
كچا رزگاربوویا ئێزدی(فریال موسی) خەلكا كۆمەلگەها دوگرێ یە ل قەزا شنگالێ بەحسێ هێرشا داعش بۆ سەر شنگالێ و چیرۆكا خۆ دكت دەمێ هاتیە گرتن و دبێژت،داعش كریارێن هۆڤانە دگەل كچێن ئێزدی ئەنجام دان ب زۆرێ و لێدان فێری قورئانێ و نڤێژێ دكرن،ب زۆرێ ب شەڤ دهاتن ل پێش چاڤێن مە دەستدرێژی ل كچان دكرن و حەبك و ماددێن بێ هۆشكەر ددانێ.
كچا رزگاربوویا ئێزدی(فریال موسی) بۆ رۆژناما دەنگێ لالش گۆت:ئەز و خەسو و زەلامێ خۆ و برایێ زەلامێ من و شەش زارۆك كەفتینە دەستێ داعش هنگی پشتی دوو مەهان من داوەتا خۆ كربوو،هەتا نهۆ هێشتا هەفت كەسێن مە ل دەستێ وان دانە و بتنێ ئەم شەش قورتال بووینە،كو ئەم ل دووگرێ گرتن و برنە خانەسۆرێ و پاشی برنە زالگەها (سیگرە) شلو و لقا 17 یا pdk شنگال،پشتی هنگێ ئەم چار رۆژا برنە گرتیخانا تەلەعفەر و پشتی وی دەمی ب سێ رۆژان برینە گرتیخانا بادوش كو هەفتیەكێ ل وێدەرێ هێلاین،پاشی دیسان ئیناینە قوتابخانەكێ ل تەلەعفەر ئەم (10) ل وێ قوتابخانێ بوون و پاش برینە گوندەكی ژ قەزا تەلەعفەر ناڤێ گوندی (كسر محراب) بوو چار مەها ل وی گوندی بوون و پاشی برنە باژێرێ مووسل هەیڤەكێ ل وێدەرێ ژی هێلان،دیسان ژ مووسل ڤەگێرانە گوندەكی تەلەعفەر ناڤێ وی (حی الخچرا‌و) بوو،كو نێزیكی سێ هەیڤان لێ بووین،پاشی ل (14/4/2015)برینە باژێرێ رەققە ل وەلاتێ سووریا ئەم هەفتیەكێ ل گرتیخانەكا بن ئەردێ دا بووین،پشتی وێ چەندێ ئەم لبەر ببستانەكی بووین كو قوتابخانەك ل وێدەرێ بوو ئەم بیست كچ و ژن ل وێ قوتابخانێ دا بوون و پشتی سێ مەها ئەم ل وێدەرێ بووین هەر ژ چەندەكێ ترومبێلان وان دهات كچەك یان ژنەك ژ مە بۆ خۆ دبر و هەر جارەكێ دهاتن هندەك بۆ خۆ دبرن پتریا وان چەكدارێن دهاتن ژ رەققە بوون و پشتی كو ئەم ژمارەك ل وێدەرێ ڤەگوهاستینە جیەكی دی،ل وێدەرێ فرۆكێ سێ موشەك ل جیێ مە دان لەوما ژی هەموو رەڤین و بازدان و هیچ چەكدارەكی داعش ل نك مە نەما و ژ ئەنجامێ وێ بوردۆمانێ(129ژ وان هاتنە برینداركرن و دیتنا تشتا ل نك من ژی پچەكێ ب زەحمەت كەفتبوو و پشتی فرۆكێ ل مە دای ئەم ڤەگوهاستنە گرتیخانەكا بن ئەردێ و ژبەر بوردۆمانا فرۆكان مە نەدكاری ل وێ گرتیخانێ بنڤن.
دەربارەی كریارێن داعش فریالێ خویاكر،هەر رۆژ و شەڤ جارنا هەتا دەمژمێر(12)ی شەڤێ ژی دوو جاران ل مە ددان و ب زۆرێ و لێدان فێری قورئانێ و نڤێژێ دكرن و دهاتن ب هەڤرا نڤێژێ بكن و ب زۆرێ ب شەڤ دهاتن ل پێش چاڤێن مە دەستدرێژی ل یێن جەم مە را دكرن و ب رۆژێ دبرن یان حەبك و ماددێن بێ هۆشكەر ددانێ و ب ناڤ چاڤان دا دكرن،لەومان ژی حالەتێن دەروونی ل نك من پەیدابوون و ئەز گەلەك دكەفتم و پشتی دەمەكی ژ نوو رادبووم.
ئەو چەندە ژی دیاركر، پشتی هنگێ هندەك ژنێن دانعەمر ژ نك مە ب گەران بۆ كوردستانێ دهاتنە هنارتن و ئازادكرن و و ژبەركو گلی ل من و دوو كچان ژ كۆچۆ هاتبوو كرن،لەوما ئەم هەر سێ ژ رەقفە برنە باژێرێ مەیادین و ئەم سێ رۆژا كرنە مالەكێ دا بێی ئاگەهیا داعش كەسەكی بناڤێ ئەبو بشر شامی ئەم كربوونە وێ مالێ دا،ڤێجا خودانێ مالێ هات گۆت كێ هوون ئینانە ڤێ مالێ چنكو ئەڤ مال یا منە من گۆتێ ئەبو بشر كرینە ڤر دا،وی گۆت دێ دەركەڤن ژ مالا من ڤێجا من گۆتە وان هەرسێ كچێن دی یێن ب من را من گۆت ئەڤە بوو دەرفەت دا بچن و ئەم دەركەفتن و چۆنە مالەكا دی كو هەموو ژی هەڤژینێن وان چەكدارێن داعش بوون یێن كو ل شەری دا پشكداری دكرن،ڤێجا من داخواز ژ ئێكێ ژ وان كر كو تێلەفونێ بدە من و ئەز ب هەڤالا خۆ را ئاخڤیم و گۆت هەرە نڤیسینگەها ئەنتەرنێتی داكو تو ژ مامۆستا حەسەن را تێلەفونێ بكەی ڤێجا مە ژی تێلەفون كر و مامۆستا حەسەن گۆت هەتا سبەی بسەكنن و سبەی دەمژمێر(7)ئەم چۆین نڤیسینگەها ئەنتەرنێتی و جارەكا دی ب وی را ئاخفتن و گۆت هەموو لبەر دەرگەهێ نڤیسینگەها ئەنتەرنێتی بگەهنە ئێك ژبەر نهۆ كەسەك دێ ئێت ب وە ڤە گۆت تنێ نیشانەكێ بدێ،داكو بزانت هوونن و پاشی ئەو كەس هاتە نك مە پشتی نیشان ل نك مە دیتین وی گۆت هوون ئەو كەسێن حەسەن گۆتین من گۆت بەلێ پاشی ئەم هاتن دوو دەمژمێرا ترومبێلا مە كار نەكر ل بیابانەكێ،لەومان ژی فرۆكە بمە ڤە هات و ئەم پر ماندی بوون،ژبەركو دەمژمێر هەفتی شەڤێ ل مەها چار ئەم گەهشتینە باژێرێ حەسەكێ ل سووریا و سێ شەڤا ئەم ل جەم pkk بوون و ل11 مەهێ pkkئەم برنە سەردەشتێ ل شنگال و پاشی خێزانێن مە هاتنە نك مە و ئەم چۆینە سنوونێ و پاشی چۆینە دەڤەرێن هەرێما كوردستانێ.
ڤێ كچا رزگاربووی داخوازكر،هەموو كچ و ژنێن ئێزدی یێن هەتا نهۆ د دەستێ داعشێ دا ماین بێنە رزگاركرن و ب دیتنا كەس و كارێن خۆ شادببن.
تُتاح هذه الصورة أيضا في: کوردی
