رێژا 20%بەردان دناڤ جڤاكێ ئێزدیان دا ل ئەلمانیا زێدەبوویە
تۆرا لالش یا راگەهاندنێ
چالاكڤانەكی ئێزدی ل وەلاتێ ئەلمانیا ئاشكەراكر كو ب سەدەما چەندین ئەگەران رێژا بەردانێ دناڤ كچ و كورێن ئێزدی دا پشتی هەڤژینیێ پێك دئینن بۆ (20%) زێدەبوویە،هەڤدەم ئەنجام دانا چالاكیێن جڤاكی بۆ هشیاریا گەنجان لدۆر پرۆسا هەڤژینیێ ژلایێ مالێن ئێزدیان ڤە ل ئاستێ پێتڤی نینە و نكارینە چوو كێشەیان چارەسەر بكن.
دڤی واری دا چالاكڤانێ مەدەنی(حەسەن قەوال رەشید) بۆ رۆژناما دەنگێ لالش راگەهاند،ل وەلاتێ ئەلمانیا ئێزدی دناڤ دجڤاكەكی دیموكراسی دان دڤێت وەك یاسایێ ب رێڤەبچین و كچ و كور دناڤ وی جڤاكی دا یێ دژین و رابووینە،سەبارەت بەردانێ ژلایێ كچ و كوران ڤە یا دئێتە كرن و ب رێژا(20%) زێَدەبوویە و ئەڤ پرۆسە یا بەردەوامە و ئەگەر ژی زۆرن ژ وان ژی چەند نەخت بێتە كێمكرن هنگی دێ رێژا بەردانێ بتر بت،هەروەسا كچ و كورێن مە ئێك و دوو كێم ناس دكن و دوەختەكی زوودا دێ لەزێ ل هەڤژینیێ كن نهۆ دێ بینی دەمێ كچەكێ دخوازن پاشی ئێكسەر دێ دەست ب داوەتێ كن،لەورا دبینم دڤێت ماوێ خوازگینیا درێژ بكن و باشتر هەڤد ناس بكن و دژیانا هەڤژینیێ بگەهن دا ل پاشەرۆژێ تووشی چوو كێشەیان نەبن،دیسان ئەگەر دەمێ هەردوو رەگەز هزر ل بەردانێ دكن ئەگەر ل خوازگینیا دا بت چێترە ل دەمێ پشتی هەڤژینیێ بت یان زارۆكەك هەبت دا كێشا وان مەزنتر لێ نەئێنت،ئەگەرەكی دی ئازادیا تاكەكەسی یە كو كچ و كوری ئازادیا خۆ دڤێت و لسەر هندێ هەردوو ئالی رازی دبن و خێزانێن وان ژی كارتێكرنەكا زۆر ل كوری یان كچێ دكت كو خۆ بدەتە بەردان.
حەسەنی تەكەزكر،چەندین حالەتێن بەردانێ چێبووینە و بەردەوام بەرەف زێدەبوونێ یە و رێگەچارەسەری بۆ ڤێ چەندێ زۆر دكێمنو رۆلێ مالێن ئێزدیان بۆ ئەنجام دانا چالاكیێن جڤاكی بۆ هشیاریا گەنجان لدۆر پرۆسا هەڤژینیێ ل ئاستێ پێتڤی نینە و نكارینە چوو كێشەیان چارەسەر بكن،ئەڤجا ب رۆلێ خۆ دەیك و بابان ژی كاریگەریا خۆ هەیە و دكارن نەهێلن بگەهتە وی رادەی كو بەردان دناڤ كچ و كوران بەری و پشتی هەڤژینیێ چێ بت.
ناڤهاتی دووپاتكر،داخوازێ ل كەسایەتی و رەوشەنبیر و چالاكڤانێن ئێزدی ل ئەلمانیا دكەین هەر ئێك ژ رەخێ خۆ ڤە گەنجان هشیار بكت و هەول بدەن بەردان كێم ببت و نەهێلن جڤاك بەرەف ڤی ئاراستەی ڤە بچت.
تُتاح هذه الصورة أيضا في: کوردی
