هەڤژینیا پێشوەخت دناڤ گەنجێن ئێزدیان دا بوویە دیاردە
تۆرا لالش یا راگەهاندنێ/لەیت حسێن
ل ڤان چەند سالێن داویێ دیاردا هەڤژینیا پێشوەخت دناڤ گەنجێن ئێزدیان دا زێدەبوویە و هێشتا ل تەمەنێ سنێلەیێ دا هەڤژینیێ پێك دئینن،كو كاریگەریا خۆ لسەر جڤاكی هەیە و گەلەك جاران دبتە ئەگەرێ بەردانێ و نەخۆشی ل پێ پەیدادبن،ڤەكۆلەرەكی جڤاكی ژی دبێژت پێتڤیە یاسا بۆ كەسێن دڤی تەمەنی دا هەڤژینیێ دكن بێنە دانان.
(مەروان دەروێش)گەنجەكە دبێژت:شووكرنا بلەز گەلەك خرابە و ئەڤ دیاردە ب راستی بەر ب زێدەبوونێ یە و كارتێكرنا خۆ ژی لسەر جڤاكی هەیە،گەلەك جاران ژی دبتە ئەگەرێ بەردانێ ل تەمەنەكی كچك دا و دووبارە كور جارەكا دی هەڤژینیێ پێك بینتە ڤە و گەلەك نەخۆشی ژێ پەیدا دبن،لەورا پێتڤیە و ئەركە لسەر دەیك و بابان بتر چاڤدێریا زارۆكێن خۆ بكن.
ژلایەكی دی ڤە (سەلاح سەعدۆ) گەنجەكی دی یە گۆت:گەلەك ژ كور و كچێن نهۆ هێشتا ل تەمەنێ سنێلەیێ دا هەڤژینیێ پێك دئینن و ئەڤ جۆرە هەڤژینی ل دەمەكی زوو دا جاران دبتە ئەگەرێ هندێ ژێكڤەببن،ئەو ژی ژ بەر نەگونجاندنا دەمێ شووكرنێ و نزانن ژیانا هەڤژینیێ برێڤەببەن،ئەڤ دیاردە دناڤ جڤاكێ ئێزدیان دا ل ڤان سالێن داویێ زێدەبوویە و نە ل بەرژەوەندیا كچ و كوران دایە و كارتێكرنا خۆ لسەر مالباتێن وان ژی هەیە،دیسان ل دەمێ ژێكڤەبوونێ هەردوو لا تووشی نەخۆشیێن دەروونی دبن.
لدۆر دیاردا هەڤژینیا پێشوەخت ڤەكۆلەرێ جڤاكی(جەمال عەلی)دیاركر،شووكرنا زوو تێگەهشتنەكا خەلەتە ژلایێ كچ و كوران ڤە كو هەستێن وان تێك دچن و د ئەنجام دا شوو دكن، نەبوونا چاڤدێریێ ژلایێ دەیك و بابان ڤە و كەسانێن تایبەتمەند هۆشداریێ بدەنە كچ و كوران رێیەكا راست نیشا بدەن و زێدەبكارئینانا تۆرێن جڤاكی نهۆ بوویە كێشەیەكا مەزن ژبەركو گەلەك ژڤان حالەتێن شووكرنا زوو ژ ئەنجامێ بكارئینانا تۆرێن جڤاكی چێدبت و گەلەك حالەت ژێ پەیدا دبن،هەتا نهۆ چ سەرەدەری و ڤەكۆلین لسەر نەهاتینە كرن،هەروەسا تێكەلیا پشتی خەلكێ مە ئاوارەبوویی دناڤ كەمپان دا ژی كاریگەریا خۆ لسەر ڤێ دیاردێ هەبوویە و پێتڤی یە لسەر جڤاكێ ئێزدی كو چ چاڤدێری نەهاتیەكرن هندەك یاسایان بدانێن داكو رێگری ل ڤێ دیاردێ بێتەكرن وەك زێدەكرنا نەختی بۆ ئەوێن دتەمەنێ سنێلەیێ دا زوو شوو دكن یان ژی نەبرینا مەهرێ ژلایێ ئۆفیسێن گرێدایی جڤاتا رۆحانی ڤە،گۆتژی كاریگەری نە بتنێ ل كچ و كوران یان مالباتێن وان دبت بەلكو ل جڤاكی ب گشتی ژبەركو گەلەك كەس ژ جڤاكێ مە چاڤ ل ئێك دكن و ئەوی كاری دكن كو نە ژ مێشكێ وان یێ هاتی،بەلكو ژ هەڤالێ خۆ گرتیە و بتریا حالەتێن ڤێ شووكرنێ ب سەركەفتیانە ب داوی نائێن و ژێكڤەدبن چنكو نەگەهشتینە وی رادەی بكارن خێزانێ ئاڤ بكن،ئەڤجا پێتڤیە سمینار بێنە گۆتن و شیرەتكارێن تایبەتمەند ل ناڤا جڤاكی دا زێدەببن و ئەگەر بڤێ چەندێ ژی رێگری لێ نەهاتە كرن پێتڤی یە پلەیێن ئایینی هندەك مەرجان بۆ ڤێ دیاردێ دانێن داكو كێم ببت.
تُتاح هذه الصورة أيضا في: کوردی
