ئاوارە داخوازا دەرێخستنا حەشدا شەعبی و پەكەكێ ژ شنگال دكن
تۆرا لالش یا راگەهاندنێ
پشتی هاتنا حەشدا شەعبی و سوپایێ عێراقێ بۆ قەزا شنگال پرۆسا ڤەگەریانا ئاواران بۆ سەر مال و حالێ خۆ گەلەك كێمبوویە،ئاوارە دخوازن حەشد و پەكەكە ژ شنگالێ دەركەڤن و هێزێن پێشمەرگەیێ كوردستانێ ڤەگەرنە دەڤەرێ ڤە.
چالاكڤان(سەعید حەسەن)دیاركر،ڤەگەریان بۆ شنگال دڤی دەمی دا گەلەك ب زەحمەتە ژبەركو نهۆ درەوشەكا خراب و نەباش را دەربازدبت و خزمەتكاریێن ژیانێ نینن،لەوا رێژا ڤەگەریانا ئاواران بۆ سەر مال و حالێ خۆ یا كێمە و ئەو ئەرەبێن دەست ل كۆمكوژیا ئێزدیان دا هەی یێن ڤەگەریاینە جیێن خۆ ل دەوروبەرێن شنگالێ و هندەك هێز و ئالیێن سیاسی ل دەڤەرێ رێگرن و نەڤێن ئاوارە ڤەگەرنە ڤە ژبەر بەرژەوەندیێن خۆ یێن حزبی و كەسایەتی.
رۆژنامەڤانێ ئێزدی(قائد شنگالی) ئاشكەراكر،ڤەگەریانا ئاوارێن ئێزدی بۆ شنگال پێتڤی ب سیستەمەكی كاری یە بۆ پێشكێشكرنا خزمەتكاریێن ژیانێ و دابینكرنا ئێمناهی و ئاسایشێ و دووبارە پاقژكرنا ئاڤاهی و جادەیان ژ پاشمایێن داعش،هەروەسا ڤەگەریانا خەلكێ گوندێن ئەرەبان بۆ دەوروبەرێن شنگال دلتەنگی بۆ ئێزدیان چێكریە تایبەت كەسوكارێن قوربانیان،ژبەركو دەما داعش دەڤەرێن ئێزدیان داگیركرین گەلەك ژ وان گوندان دەست د كۆمكوژیا ئێزدیان دا هەبوو، لسەر رێژا ڤەگەرا ئاواران بۆ باشوورێ چیایێ شنگالێ(0%)،بەلێ ل باكوور ئانكو ل سنوونێ و گوند و كۆمەلگەهێن بسەرڤە دگەهتە نێزیكی(20%)ێ.
ژئالیەكی دی ڤە رێڤەبەرێ كەمپا دەركارێ(عدنان فارس ئسماعیل) گۆت:پرۆسا ڤەگەریانا ئاواران ل كەمپێ بۆ شنگالێ بەری هاتنا حەشدا شەعبی و سوپایێ عێراقێ بۆ شنگال و دەوروبەران هەتا رادەیەكی یا باشبوو رۆژانە خەلك ژ كەمپێن سنوورێ پارێزگەها دهۆكێ ڤەدگەریانە سەر جی و وارێن خۆ ل شنگالێ،لێ پشتی حەشد هاتیە دەڤەرێ زڤرین گەلەك كێمبوویە،وەك ئاوارە ل كەمپان دبێژن هەتا حەشد و پەكەكە ژ شنگالێ دەرنەكەڤن و جارەكا دی هێزێن پێشمەرگەیێ كوردستانێ ڤەنەگەرن دەڤەرێ ئەو نكارن ڤەگەرنە جیێن خۆ ڤە.
ژبەر هاتنا حەشدا شەعبی و ڤەگەریانا ئەرەبێن گوندێن دەوروبەرێن شنگالێ،پرۆسا ڤەگەریانا ئاواران ل كەمپێن سنوورێ پارێزگەها دهۆكێ بۆ شنگالێ كێمبوویە.
تُتاح هذه الصورة أيضا في: کوردی
