ئافرەتێن شنگالێ بۆ چارەسەریا نەخۆشیان قەستا هۆلێن وەرزشێ دكن
تۆرا لالش یا راگەهاندنێ/شاما شنگالی
ژمارەكا ئافرەتێن شنگالێ یێن ژ نەخۆشیێن جۆراو جۆر دنالن ب مەرەما چارەسەریێ،قەستا هۆلێن وەرزشێ كرینە و پشتی ئەنجام دانا وەرزشێ چارەسەربووینە.
(دلڤین ئبراهیم)خودانا هۆلەكا وەرزشێ و راهێنەرا وەرزشا لەش جوانیێ یە ل شنگال دیاركر،نێزیكی(50)ئافرەتێن شنگالێ قەستا هۆلا لەش جوانیێ دكن و سوپاسیا رێكخراوا(Whh) دكەین بۆ هاریكاریێ كو بكارن ڤێ خزمەتێ پێشكێشی خەلكێ خۆ بكن،نهۆ راهێنانا دەمە وان لسەر چەند جۆرێن وەرزشێ و مفا ژێ وەرگرتینە و ئێك ژ وان ئافرەتێن پشكدار گۆت وێ پێشتر نەخۆشیەك هەبوو لێ پشتی رۆژانە وەرزش كری ئەو ژی ژ نەساخیا خۆ قورتالبوویە،دیسان دخوازین هۆلێن ڤی جۆرێ وەرزشێ ل هەموو دڤەرێن شنگالێ بێنە ڤەكرن ژبەركو گەلەك ژ خەلكێ مە تووشی نەخۆشیێن دەروونی بووینە پشتی وان نەخۆشی و نەهامەتیێن دیتین.
(گولێ ئسماعیل)ئافرەتەك تەمەن (40)سالی یە رۆژانە وەرزشێ دكت دبێژت:ئەڤە ماوێ هەیڤەكێ یە قەستا هۆلا وەرزشێ كری ژبەركو نەخۆشم و پشتا من دئیشا،بەلێ پشتی وەرزش كری ئەو نەخۆشی نەمایە و ژ گەلەك جۆرێن دەرمانان ژی قورتالبووم بووم كو زیان دگەهاندە ساخلەمیا من دەما دخوارن بۆ چارەسەریێ.
هەروەسا(غالیا خدر) كچەك(17)سالی یە گۆت:ژبۆ كێمكرنا سەنگا لەشێ خۆ ئەڤە ماوێ دوو هەیڤایە رۆژانە تێمە وەرزشێ ل ڤێ هۆلێ و رۆژانە دوو دەمژمێران وەرزشێ دكەم،هەتا نهۆ ژ ئالیێ دەروونی ڤە گەلەك مفا گەهاندیە من و فێری گەلەك جۆرێن دی یێن وەرزشێ بوویمە،دبینم خەلكێ مە یێ شنگال پێتڤی ڤان جۆرە هۆلێن وەرزشی نە ل كۆمەلگەهان بێنە ڤەكرن.
تُتاح هذه الصورة أيضا في: کوردی
