رێڤەبەرێ ناحیا باشیكێ: 95% خەلكێ ڤەگەریاینە سەر مالێن خۆ
باسنيوز:
رێڤەبەرێ ناحیا باشیكێ دیار كر گەلەك ئەرد ل باشیك و بەحزانێ مایە هێشتا ژ بەرمایكێن تیرۆرستێن داعش نەهاتیە پاقژكرن.
زنون یونس، رێڤەبەرێ ناحیا باشیكێ بۆ (باسنیوز) راگەهاند كو: “هەتا نۆكە شوونوارێن تیرۆرستێن داعش ب تەمامێ ژ باشیكێ دووماهی نەهاتینە. داعش سالا 2014ێ گەلەك ئەردێ باشیكێ مینرێژ كربوو. هەتا ئەڤرۆكە ژی هێشتا هەموو ئەرد نەهاتیە پاقژكرن ب تایبەتی ژی لایێ چیایێ باشیك وبەحزانێ هێشتا نەهاتیە پاقژكرن ژ مین وتەقەمەنی وبەرمایكێن تیرۆرستێن داعش. ب رێژا 95% خەلكێ باشیك ڤەگەریاینە سەر مالێن خۆ هێشتا 5% ژ خەلكێ نەڤەگەریاینە باشیك”.
ئاشكەرا كر:” ئەو خانیێن داعش ژی پەقاندن هەتا 250 خانیان بوون، هێشتا بۆ خەلكێ نەهاتینە ئاڤاكرن لێ ژلایێ رێكخراوان ڤە هندەك خانیێن داعش زیان گەهاندیێ، یێن هاتینە نوژەنكرن. هەتا هژمارەكا زۆر یا مەزارگەهێن ئێزدیان هاتبوونە پەقاندن و تێكدان هەموو ژلایێ خێرخواز و خەلكێ باشیك وبەحزانێ ڤە دووبارە هاتینە چێكرن”.
زنون یونس، گۆتژی: “پرۆژەیێن خزمەتگوزارێ ل باشیكێ ئاستێ پێدڤی دا نینن ب تایبەتی ژی ئاریشا ئاڤا ڤەخارنێ هەیە. ئەم چاڤەرێنە پرۆژەكێ ئاڤێ بۆ باشیكێ بهێتە دروستكرن. نۆكە پشت بەستنا مە ل سەر بیرێن ئەرتوازییە”.
تُتاح هذه الصورة أيضا في: کوردی
