بنگەهێ لالش یێ ڕەوشەنبیری و كۆمەلاِیەتی ل دهۆكێ بەیاننامەیەك بۆ رایا گشتی و ڕێكخراو و دەزگەهـێن نێڤدەوڵەتی و بالیۆزخانە و كۆنسولخانێن وەلاتێن باوەرپێكری ل عێراقا فیدڕاڵ و هەرێما كوردستانێ بەڵاڤكر.
دەقێ بەیاننامەیا بنگەهێ لالش:
وەكی هوون دزانن پێكهاتەیا ئێزدی ل سەردەمێ هەڤچەرخ دا تووشی قركرنەكا هۆڤانە هات و سالڤەگەڕا یازدێ یا وێ جینۆسایدێ بەری چەند ڕۆژان بەری نهۆ بوو. هەتا نهۆ ئێزدی د ناڤ ئازارێن ب سەر دا هاتین د ناڵن و هێشتا برینێن مە خوین ژێ دئێت.
ل شوونا وێ چەندێ حكومەتا عێراقێ پێنگاڤێن پێدڤی بهاڤێژت بۆ دەرمانكرنا برینان وەك ئەركەكێ نیشتیمانی و مرۆڤی. كارئاسانیێ بۆ دادگەها تاوانێن نێڤدەوڵەتی بكەت بۆ ئێكلاكرنا كەیسا جینۆسایدا ئێزدیان تا دادپەوەری بكارت ریَِرەوا خۆ یا راست بگرتەبەر. ل شوونا وێ چەندێ رێ خۆش بكەت بۆ ئاساییكرنا ڕەوشا شنگالێ و ڤەگەریانا ئاوارەیان ب سەربڵندی،ئەم دبینین پەنایێ بۆ شێوازێ گۆمانكری دبەت ب ڕێیا وەزارەتا كۆچ و كۆچبەران. ئەوا كو هەر ژ ڕۆژا ئێكێ یا جینۆسایدێ هەتا ئیڕۆ ئەركێ خۆ بەرامبەر ئاواران جێبەجێنەكریە. وەزارەتا ناڤبری جار بۆ جارێ بڕیارێن ئیستفزازی دەردئێخت كو ئازارێن ئاواران زێدەتر لێدكەت و بێزار دبن. و بڕیارا ڤێ داویێ بۆ دائێخستنا كەیسا ئاوارەبوونێ ل داویا ئیسالە و نەچاركرنا ئاوارەیێن ماین كو ب دەهان هەزار خێزان ل كەمپێن ئاوارەبوونێ دا ل هەرێما كوردستانێ دژین كو خۆگونجاندینە و وان نەچار دكەن كو وەك ئاكنجیێن دەرڤەی زێدێ خۆ بمینن و ژ دەڤەرێن خۆ یێن ڕەسەن ل شنگالێ ڤەقەتینن.
ئەم ل بنگەهێ لالش نەررازیبوونا خۆ بۆ ڤێ بڕیارا نەڕەوا دەردبڕین، بیێ لبەرچاڤ وەگرتنا كارڤەدانێن جددی و پێدڤی یێن گوهۆڕینێن دیمۆگرافی و دەربازبوون ل بڕگەیێن دەستووری دا، ب تایبەتی ماددا ١٤٠ سەبارەت ب دەڤەرێن ڤەقەتیایی، ژوانژی شنگال. لەورا داخوازێ لایەنێن پەیوەندیدار ل حكومەتا فیدراڵ و حكومەتا هەرێما كوردستانێ و جڤاكێ نێڤدەوڵەتی دكەین هەر بڕیارەك كو بەروڤاژی مافێن ڕەوایێن خەڵكێ مە بت ڕەت بكەن و پێكڤە كاربكەن بۆ دروستكرنا ژینگەهەكا ساخلەم و سەقامگیر كو ژیانەكا ئازاد و شكۆمەندانە بۆ ئێزدیان و پێكهاتەیێن دی یێن دەشتا نەینەوا دابین بكەت.
ل داویێ سوپاسی و پێزانینێن خۆ ئاراستەی حكومەتا هەرێما كوردستانێ دكەین بۆ پێكۆلێن مەزن یێن كرین بۆ دابینكرنا پێدڤیێن خەڵكێ مە یێ ئاوارە،پشتی كو وەزارەتا كۆچ و كۆچبەران ل حكومەتا فیدراڵ پێدڤیێن ئاوارەیان، كو ئەڤە ژی ئەركێ وان یێن نیشتمانی و مرۆڤی ب خۆیە.
بنگەهێ لالش یێ ڕەوشەنبیری و كۆمەڵایەتی/دهۆك
21/8/2025
تُتاح هذه الصورة أيضا في: کوردی
