میرحازم ته‌حسین به‌گ، میرێ ئێزدیان ل كوردستانێ و جیهانێ ڕادگه‌هینت: ئێزدی ژ بڕیارا وه‌زاره‌تا كۆچ و كۆچبه‌ران نه‌دڕازینه و تێكه‌ڵكرنا ب زۆره‌ملێ ڕه‌ت دكه‌ن.
سپێده‌هيا ئیرۆ دووشه‌مبوويێ 25ـی ته‌باخا 2025، ب ئاماده‌بوونا نێچیرڤان بارزانی، سه‌رۆكێ هه‌رێما كوردستانێ، كۆنفرانسێ ئه‌كادیمیێ نێڤده‌وڵه‌تی يێ جينۆسایدا ئێزدیان ل هه‌ولێرێ ده‌ستپێكر، ژماره‌یه‌كا ڤه‌كۆله‌رێن ناڤخۆ و جیهانی بۆ ماوێ دوو ڕۆژان دێ پشكداریێ كه‌ن و ڤه‌كۆلینێن زانستی ل دۆر جینۆسایدا ئێزدیان و كێشه و گرفتێن وان دێ پێشكێش كه‌ن.
د چارچووڤێ كۆنفرانسی دا، میر حازم ته‌حسین به‌گ، میرێ ئێزدیان گۆتاره‌ك پێشكێشكر و تێدا گۆت: ئه‌و كاره‌ساتا ل سالا 2014ێ بسه‌رێ ئێزدیان دا هاتی، ئازاره‌كا مه‌زن ل پشت خۆ هێلا و هه‌تا نهۆ خوین ژێ درژیێت،ژ ئه‌نجامێ وێ هێرشێ، هه‌تا نهۆ كارتێكرنا وێ بسه‌ر ئێزدیان دا یا مایی، گۆتژى: ب سه‌دان هزار ئێزدی هه‌تا نهۆ دناڤ خیڤه‌تان دا دژین، ب هزاران كچ و ژن و زارۆك هه‌تا نهۆ د بێسه‌روشوونن.
ميرێ ئێزديان ئاماژه ب وێ چه‌ندێ دا، ناڤچه‌یێن شنگالێ پێتڤی ب دووباره ئاڤه‌دانكرنێ هه‌یه و دگه‌ڵ ڤه‌گه‌ریانه‌كا شه‌ره‌فمه‌ندانه یا ئێزدیان، گۆتژی: ل دارخستنا ڤان جۆرێن كۆنفرانسان د گرنگن، بۆ وێ چه‌ندێ دۆسه‌یا ئێزدیان ب زندی بمینت د وژدانێ مرۆڤایه‌تیێ دا، ئۆمێده‌وارم هه‌موو ڤه‌كۆلین ببنه ئه‌گه‌ره‌ك بۆ به‌رجه‌سته‌كرنا دادپه‌روه‌ریێ و قه‌ره‌بووكرنا قوربانیان.
ده‌ربارەی بڕيارێن وەزارەتا کۆچ و کۆچبەرێن عێراقێ، میر حازم ته‌حسین به‌گ، میرێ ئێزدیان گۆت: ئه‌م ژ بڕیارا وه‌زاره‌تا كۆچ و كۆچبه‌ران ل حكومه‌تا عێراقێ د دڵگرانین كو د بڕیارا وان دا هاتیه ئێزدی تێكه‌ڵی كۆمه‌لگه‌هێن ئاكنجيبوونێ ببن، ل گه‌ڵ وێ چه‌ندێ هه‌تا نهۆ چ مه‌رجه‌كێ ڤه‌گه‌ریانێ بۆ ئێزدیان نینه، ئه‌ڤ بریاره دێ كێشه‌یێن ئێزدیان دێ كوورتر كه‌ت، هه‌ڤده‌م دێ بته ئه‌گه‌رێ لاوازكرنا دانپێدانێن نێڤده‌وڵه‌تی بۆ ناساندنا كۆمه‌لكووژیا ئێزدیان وه‌كو جێنوساید، گۆتژى: ئه‌م تێكه‌ڵكرنا زۆره‌ملێ ڕه‌ت دكه‌ین.
دبێژت: سوپاسیا هه‌رێما كوردستانێ دكه‌ین بۆ پێشوازیا وان ل ئێزدیان كری، ب تایبه‌تی خه‌ڵكێ شنگالێ، سوپاسیا نێچیرڤان بارزانی دكه‌ین بۆ ڕزگاركرنا ژماره‌یه‌كا مه‌زن یا ئێزدیان.
تُتاح هذه الصورة أيضا في: کوردی
