ل شنگال بۆ ناسینا روفاتێن گۆرێن ب كۆم سەمپلێن خوونێ دئێنە وەرگرتن
باسنيوز:
ئەندامەكێ دەستەیا ڤەكۆلین و كۆمكرنا بەلگەنامەیان ل پارێزگەها دهوكێ دیار كر كو ئەڤرۆ 26/10/2020ێ كار ل سەر ڤەكرنا گۆرێن ب كۆم یێن ژنان ل شنگال ل گوندێ سولاخێ دهێتە كرن دڤێ گۆری بكۆمدا ژن هاتینە گولەبارانكرن و بن ئاخكرن.
فەلاح حەسەن، ئەندامێ دەستەیا ڤەكۆلین و كۆمكرنا بەلگەنامەیان ل پارێزگەها دهوكێ بۆ (باسنیوز) راگەهاند كو: “نۆكە ل شنگال دەست ب وەرگرتنا سەمپلێن خوینێ هاتیە كرن ژ كەسوكارێن قوربانیان بۆ وێ چەندێ دەمێ روفاتێن ژناڤ گۆرێن ب كۆم دهێنە دەرخستن ئاشكرا بیت یێ كینە وكەس و كارێن قوربانیان روفاتێن خۆ ببینن، ئەوژی پشتی روفات بۆ نۆژداریا داد ل بەغدا دهێنە رەوانەكرن و پشكنین ل سەر دهێنە ئەنجامدان. دێ دووڤدا ئەنجامێن پشكنینێ دگەل سەمپلێن كەسوكارێن وان هێنە هەمبەركرن داكو روفات ئاشكرا بن”.
ئاشكەرا كر كو: “نۆكە كار ل سەر ڤەكرنا گۆرێن بكۆم یێن ژنان ل گوندێ سولاخێ دهێتە كرن ئەڤرۆ دێ بەردەوامی ب ڤەكرنا گۆرێن ب كۆم یێ ژنان ل سولاخێ هێتە دان. هێشتا دیار نینە چەند روفاتیێن دایك و خوشكێن مە دناڤ گۆرێن ب كۆمدا هەنە ل سولاخێ”.
ل شنگال 80 گۆرێن ب كۆم هەتا نۆكە یێن هاتینە دیتن. بەرێ نۆكە17 گۆرێن ب كۆم یێن هاتینە ڤەكرن. پتر ژ 200 روفاتان ناڤ یێن هاتینە دەرئێخستن. هەتا نۆكە ناسنامەیێن پتر ژ 60 قوربانیێن ناڤ گۆرێن بكۆمدا ئاشكرا بووینە.
تُتاح هذه الصورة أيضا في: کوردی
