تەرش و تەوالێ پتریا خەلكێ شنگالێ هاتیە تالانكرن
تۆرا لالش یا راگەهاندنێ/رائد غانم
بەری هاتنا تیرۆرستێن داعش بۆ شنگالێ،پتریا خەلكێ ل ناڤ رەز و بیستانێن خۆ كارێ چاندنێ و تەرش و تەوال خودان دكر بۆ بدەستڤە داهاتەكی بۆ ژیانا خۆ یا رۆژانە،پشتی داعش هێرشكری دەست بسەر سامانێ وان دا گرت و تالانكرن و زیانێن ئابوووری یێن مەزن گەهاندنە خەلكێ،كو ژیانا وان ل كەمپان دا پتر ب زەحمەت كەفتیە.
ئاوارەكی شنگالێ ل كەمپەكا ئاواران ل پارێزگەها دهۆكێ دیاركر،بەری هێرشا داعش بۆ سەر شنگالێ دۆرێن(600) سەرێن پەزی و سێ زەڤیێن مەزن و تەرەكتەر و گەلەك تمبێل مە هەبوون،نهۆ مەدراڤێ كرینا جلكێن پچووكێن خۆ نینە،ل شنگال كومرێن رەژوویێ چێ دكرن و بایێ(15) ملیۆن دیناران دارێن رەژوویێ كری بوون دەمێ ئەم چۆینە چیایی من دیت دیكۆل بسەر خانیێ‌َ مە دا كەفت و ب دۆرەبینێ تەماشەكر تیرۆرستێن داعش ئەو دار سۆتن و پاش ئاگر بەردانە گوندی هەموویێ.
هەروەسا(عیدۆ موراد)خەلكێ كۆمەلگەها تلقەسەب گۆت:ل شنگال(44)سەرێن پەزی مە هەبوون پشتی تیرۆرستێن داعش هێرشی دەڤەرا مە كرین هەموو هاتنە تالانكرن و برن.
ژلایەكی دی ڤە(خەلیل جردۆ)خەلكێ كۆمەلگەها سیببا شێخدرێ یە دبێژت:ل دەڤەرا رەبیعە مە كاردكر و گەلەك كەس و كارێن مە ژ خەلكێ شنگالێ رەز و بیستان هەبوون،ل پاش خۆ هێلان و پتریا تەرش و تەوالی هەبوون،بنەمالا مە ژی(40) سەرێن پەزی هەبوون ئەوان ژی هێلان.
ژبال خۆڤە(شێرین خەلەف)خەلكا قەندیل شنگالێ یە ئاشكەراكر،هەڤژینێ من شڤانێ پەزی بوو ل دەڤەرا كەرسێ و (350) سەرێن پەزی مە هەبوون،دەمێ داعش هاتی هەڤژینێ من ل وێدەرێ دەستەسەركرن و كەریێ پەزی تالانكرن و برن دگەل تەركتەر و تانكەرێ ئاڤێ.
ل رۆژا (3/8/2014)ێ رێكخراوا تیرۆرستی یا داعشێ دەست بسەر دەڤەرا شنگالێ دا گرت،ژبلی زیانێن گیانی زیانێن ئابووری یێن زۆر گەهاندنە ئێزدیان و تەرش و تەوال و رەز و بیساتێن وان تالانكرن و ژناڤبرن.
تُتاح هذه الصورة أيضا في: کوردی
