بێكاریێ بەرێ گەنجێن ئێزدی دایە ژ دەرڤەی وەلاتی
تۆرا لالش یا راگەهاندنێ/سەلام_ناڤین
چەند گەنجێن ئێزدی ئاماژێ ب وێ چەندێ ددەن كو ژبەر بێكاریێ و كێمیا دەلیڤێن كاری گەنجان بەرێ خۆ دایە ژ دەرڤەی وەلاتی،دخوازین حكومەتا هەرێما كوردستانێ دەلیڤێن كاری بۆ ڤێ تەخا جڤاكی پەیدابكن و دەرچۆی بێنە دامەزراندن و پرۆژە و خۆلێن فێركرنێ بۆ دیتنان كاران بێنە ڤەكرن.
(ئەیمن شەمۆ ئلیاس)گەنجەكە دیاركر،ئیرۆ گەنجێن مە یێن ئێزدی دبێكارن و پتریا وان دەمێ خۆ لناڤ كافیتریا و ب تۆرێن كۆمەلایەتی ڤە دبۆرینن،ژبەر بێكاریێ و كێمیا دەلیڤێن كاری گەنجێن نهۆ تووشی چەندین ئاریشان بووینە،داخوازا من ئەوە دەلیڤێن كاری بۆ گەنجان بێنە دابینكرن داكو ژیانا خۆ رێڤەببەن و هەست ب هەبوونا خۆ بكن.
هەروەسا(مەسعود عیدۆ)خودانێ سەرتراشخانەكێ یە ل كۆمەلگەها خانكێ دبێژت:ب شێوەیەكی گشتی كار یێ لاواز و ب زەحمەت كەفتی و پتریا گەنجان بێكارن هەڤدەم ژی نەبوونا كاری مە هانددەت كۆچبەری دەرڤەی وەلاتی ببین و ژیانا خۆ بكەینە دمەترسیێ دا،دیسان ژبەر بێكاریێ رۆژانە ئاریشێن مرۆڤی وخێزانێ دروست دبن،تشتێ گرنك ومەندەهۆش گەنج خودان باوەرنامەنە وبێكارن،هیڤیا من ژ حكومەتا هەرێما كوردستانێ ئەوە دەلیڤێن كاری بۆ تەخا گەنجان پەیدابكن و خۆلێن فێركرنێ بۆ دیتنان كاران بێنە ڤەكرن.
ژلایەكی دی ڤە(ئوسامە سلێمان)قوتابیەكە خویاكر،وەك گەنج و قوتابیەك ژ پاشەرۆژا خۆ دترسم دەمێ خووندنا خۆ ب داوی دئینم وی دەمی وەك گەنجێن نهۆ بێكار بمینم، دیسان كۆچبەربوونا گەنجێن مە و ب تایبەت یێن ئێزدی بۆ دەرڤەی وەلاتی ژ ئەگەرێ بێكاریێ و قەیرانایە،ژلایەكی دی ڤە ئینانا كرێكارێن بیانی ئاریشە بۆ گەنجێن كوردستانێ ب گشتی پەیدا كرینە كو بێكار بمینن ژبەركو ئەو كاردكن ئەم بێكارن،گەنج ژێدەرێ ژیانێ یە پێتڤیە گرنگی پێ بێتە دان و پرۆژێن كاری بۆ وان بێنە ڤەكرن یان ئەوێن خووندنا خۆ ب داوی ئیناین بێنە دامەزراندن.
تُتاح هذه الصورة أيضا في: کوردی
