پێنج جۆرێن دیاردا دناڤ گەنجێن ئاوارێن شنگالێ ل كەمپان سەرهەلداینە
تۆرا لالش یا راگەهاندنێ/رائد غانم
ئاوارێن ئێزدیێن شنگالێ ئەڤە ماوێ چار سالانە دناڤ خیڤەت و كەمپان دا ل سنوورێ پارێزگەها دهۆكێ درەوشەكا ب زەحمەت و پەریشان دا دژین،ب چەند ئەگەرێن جودا جودا نهۆ پێنج جۆرێن دیاردا دناڤ تەخا گەنجێن ئاوارە دا سەرهەلداینە.
دەربارەی هێلانا خووندنێ(دالیا دەخیل)مامۆستایە ل كەمپا بێرسڤێ ئاشكەراكر،هەر جڤاكەكی سەركەفتی ژ ئەنجامێ وێ چەندێ كو ئەندامێن وی دسەركەفتینە،بەلێ جڤاكێ مە ئەڤ كەسە نینن و ئەگەر هەبن ژی رێژەیەكا كێمە،هێلانا خووندنێ بەلگەیە لسەر هندێ كو جڤاكێ مە هێشتا پێتڤی ب چاڤدێریێ هەیە داكو بگەهتە رێزا جڤاكێن سەركەفتی،ئەو كەسێن پێتڤیە ڤێ دیاردێ نەهێلن دەیك و بابن ژبەركو ئەو بەرپرسیارەتیا ئێكێ یا كچ و كورێن خۆ هەلدگرن و پێتڤیە ئەڤ چەندە بەرچاڤ بێتە وەرگرتن بەلێ دەیك و باب نزانن ئەو زارۆكێن خۆ ب دەستێن خۆ دبەنە سەر رێیا شاش،گەلەك ژ ڤان زارۆكان ب ناچاری خووندنێ دهێلن داكو بۆ خێزانێن خۆ كاربكن و ژیانا خۆ برێڤەببەن ئێكسەر ئەوێن ئێتیم یان ژی ئەوێن بابێن وان نەخۆش یان پەككەفتی دڤی باری دا كەس نكارت گازندێ ژ دەیك و بابان بكن،بەلێ هیڤیێ ژ خەلكێ خۆ دكن هەتا ئەو بكارن زارۆكێن خۆ دووری خووندنێ نەكن و شیرەتا ل وان بكن و ئەوان هانبدەن بۆ خووندنێ،داكو جڤاكەكی سەركەفتی و رەوشەنبیر ژ جڤاكا مە دەركەڤت و ئەم لسەر وان خەلەتیا نەمینن یێن كو دەیك و بابێن مە تێرا دەرباس بووین،هەروەسا مامۆستا نەبەرپرسیارە ژ هێلانا خووندنێ ژلایێ قوتابی ڤە ژبەركو ئەركێ مامۆستای ئەوە قوتابی فێربكت و جۆرە هاندانەكێ بۆ پەیدا بكت.
سەبارەت كێشانا نەرگیلێ كو بوویە دیاردە دناڤ گەنجێن ئاوارێن ئێزدیێن شنگالێ دا(ئەمین خودێدا)خودانێ كافیەكێ یە گۆت: وەك خودانێ كافیەكێ ژیانا خۆ بڤی كاری ب رێڤەدبەین و ئەم نە بەرپرسیارن ژ بەلاڤبوونا ڤێ دیاردێ ل جڤاكی دا،ژبەركو چ چاڤدێریا تەندروستی لسەر كافیتریایێن مە نینە و ئەم تشتێن خۆ دفرۆشن و بۆ مە نەگرنگە ئەڤ كەس مەزن یان كچك بت،بەلێ یا گرنگ بۆ مە بدەستڤە ئینانا داهاتەكی یە،ئەم باش دزانین كو كێشنا نەرگیلێ نەیا باشە و كاریگەریێ ل ساخلەمیا مرۆڤی دكت بەلێ بلا چاڤدێری ژلایێ دەیك و بابێن ڤان زارۆك و گەنجان ڤە بێتە كرن و رێگریێ ل وان بكن داكو نەئێنە كافیان تریان،ئەم نكارین رێگریێ ل چ كەسان بكەین.
لدۆر دیاردا ڤەخوارنا ڤەخوارنێن كحولی(حسێن ئیسماعیل)گەنجەكی ئاوارەیێ كەمپا قادیایە دیاركر،ب راستی ئەڤە دیاردەیەكا نە شارستانی یە و ژبلی زیانێ چ ناگەهینتە جڤاكی،چنكو ڤەخوارنا ڤان جۆرە ڤەخوارنان ئەنجامێن خراب یێن جۆرا و جۆر لدوڤدا دئێن و گەلەك كەس بێ هش دكەڤن و دكارن هەر كارەكی بكن،ژبەركو نە بخۆنە ژ ئەگەرێ زێدەیا ڤەخوارنان و ب دیتنا من جڤاكێ مە بەرەف پاش دكەڤت،گۆتژی ئەو گەنج و زارۆكێن نەگەهشتینە تەمەنێ سنێلەیێ پێتڤیە خێزانێن وان چاڤدێریێ لێ بكن و ئەگەر نە كەس نكارت كۆنترۆلێ لسەر بەلاڤبوونا ڤێ دیاردێ بكت ل ناڤا ڤێ تەخێ دا،دیسان پێتڤیە دوكاندار ژی ڤان ڤەخوارنێن كحولی نەفرۆشنە كەسێن نە تێگەهشتی.
هەر لدۆر دیاردێن كێشانا نەرگیلێ و ڤەخوارنا ڤەخوارنێن كحولی نۆژدار(شەمۆ رەشۆ)رۆنكر،كێشا نەرگیلێ و جگارێ زیانێ ل بۆریێن هەوایی دكن و ئەگەرێ تووشبوونێ ب نەخۆشیێن دلی و شێرەپەنجێ زێدە،لەوما ئەم دخوازین كێشانا وان بێتە كێمكرن،هەروەسا ڤەخوارنا ڤەخوارنێن كحولی كاریگەریا خۆ یا تایبەت هەیە و گەلەك جاران دبتە ئەگەرێ پەقینا گەدەیێ و دەملدەست گیانێ خۆ ژ دەست ددەن و هەروەسا بلندبوونا پەستانا خوونێ و ژ هەش كەفتنا مرۆڤی ژ ئەگەرێ زێدە ڤەخوارنێ،دووپاتكر ژی ئەو گەنج و زارۆكێن دبن تەمەنێ سنێلەیێ دا پێتڤیە چاڤدێریا وان باش بێتە كرن ژلایێ خێزانێن وان ڤە و ژ ڤان تشتێن زەرەرمەند دووركەڤن داكو ل پاشەرۆژێ دا ئەڤ دیاردە نەمینن و مە جڤاكەكی ساخلەم هەبت، گەلەك یا ب زەحمەتە ئەو كەسێن ڤەدخۆن ڤان دیاردا بهێلن،پێتڤیە سمینار و وانەگۆتنێن لسەر ڤان تشتان بێنە زێدەكرن داكو جۆرە هشیاریەكێ بدەنە خێزانێن ڤان كەسان.
ژلایەكی دی ڤە لسەر دیاردا شووكرنا پێش وەخت ڤەكۆلەرێ جڤاكی(جەمال عەلی)راگەهاند،هەرچەندە ئەو كەسێن نەگەهشتینە تەمەنێ سنێلەیێ شیانێن پێكئینانا خێزانەكێ نینن و چ تشت نینن كو شوویكرنا پێش وەخت هاندابن،ژبەركو ژلایێ ساخلەمی و جڤاكی ڤە یا زەرەرمەندە،ئەڤ جۆرێ شووكرنێ دیاردەیەكا دناڤبەرا دوو كەسان دا چێدبت كو هێش نەگەهشتینە تەمەنێ هەژدە سالیێ و ئەوان چ شیان بۆ شووكرنێ نینن و چ تشتا ژێ نزانن و هزر دبەرپرسیارەتیێ دا نەكرینە و بتنێ لدوڤ حەزا دلێ خۆ ڤێ چەندێ دكن،لەوما پێتڤی یە سەردەری دگەل ڤێ دیاردێ بێتە كرن ب رێیا هۆشداریكرنا جڤاكی ب گشتی،هەرچەندە ئەڤ دیاردە زۆر یا بەربەلاڤە دجڤاكێ مەدا و ئەڤە ژی ژ ئەنجامێ پشت گوه هاڤێتنا دەیك و بابا بۆ زارۆكێن خۆیە و نە چاڤدێریكرنێ لسەر وان یە،لدۆر رێیێن چارەسەریێ دزۆرن بەلێ جڤاك وان شیرەت و رێیێن نەهێلانا ڤێ دیاردێ بەرچاڤ وەرناگرت و سەردەریێ دگەل ناكت،ژبەركو جڤاكێ مە نە دئاستێ وان جڤاكێن پێشكەفتی دایە،زێدەباری خەلەت بكارئینانا ئنترنێتێ ئەو ژی بخۆ دیاردەیەكا دی یە دناڤ جڤاكی دا پەیدابوویی.
تُتاح هذه الصورة أيضا في: کوردی
