پاشمایێن داعش مەترسینە لسەر ژیانا خەلكێ شنگالێ
تۆرا لالش یا راگەهاندنێ
چالاكڤانەكی مەدەنی یێ خەلكێ قەزا شنگالێ ئاشكەراكر كو ژبەر پاشمایێن داعش ب تایبەت مینێن چاندی رۆژانە دبهیزین هندەك كەس دبنە قوربانی و یا چاڤەرێ كریە هەتا دەه سالێن بێت ژی هندەك ژڤان مینا بمینن و مەترسینە لسەر ژیانا خەلكێ،ئەگەر حكومەتا عێراقێ تشتەكی بۆ ئاسایكرنا ژیانێ ل شنگال نەكت خەلك دێ بەرەف دەرڤەی وەلاتی چن.
چالاكڤانێ مەدەنی(برزان شقو)بۆ رۆژناما دەنگێ لالش ئاشكەراكر،هەرچەندە كارەسات هەموو دنیگەتیڤن ئەڤجا مسۆگەر دێ ئەنجامێن خراب لدوڤ هەر كارەساتەكێ هەبن،ل هێرشا رێكخراوا داعش بۆ سەر شنگالێ ژبلی كەسێن ئێزدی یێن هاتینە كوشتن یان ژ تێهن و برسا دا گیانێ خۆ ژ دەست داین ب هەزاران كەس هاتنە ئێخسیركرن و بۆ ماوەیەكی درێژ هۆڤانەیا داعشێ دیتن هەتا نهۆ ژی دبینن چ ژلایێ دەروونی و جەستەیی ڤە و ڤێ چەندێ دكەسایەتیێن وان رزگاربوویێن دەستێ داعشێ دا دبینن و هندەك حالەت ژ وانا چارەسەركرنا وان گەلەك یا ب زەحمەتە،هەروەسا ب سەدان زارۆك ئێتیم ماینە و ژمارەكا مەزن ژ ژن و زەلامان ماینە كو هەڤژین یان هەڤژینا خۆ ژ دەست داینە ئەڤە هەموو شوونوارێن بەرچاڤن ژبلی زەرەرا دەروونی و ماددی یا ب خەلكێ مە كەفتی و ب دەهان گۆڕێن بكۆم هەنە و هاتینە پشتگوه هاڤێتن و نائێنە پاراستن مەحالە ئەڤ گۆڕ ژ دەروونێ مە بێنە لادان،ژبەركو هەر بۆستەك ژ ئاخا شنگال ب خوونا وان جانگۆریا هاتیە خووندان داكو بێتە پاراستن و گۆت:((ژبەر پاشمایێن داعش ل شنگال و ب تایبەت مینێن چاندی رۆژانە دبهیزین هندەك كەس دبنە قوربانی و یا چاڤەرێ كریە هەتا دەه سالێن بێت ژی هندەك ژڤان مینا بمینن و مەترسینە لسەر ژیانا خەلكێ)).
شقو گۆتژی چ كەس نكارن ڤان پاشڤەمایا ونداكن و ژێ ببەن ژبەركو نە تشتەكی ب ساناهی یە گیان نائێنە قەرەبووكرن و هەر مالەكێ ژیێن شنگال عەزیزەك ژ دەست دایە،ژلایێ دەروونی ڤە ئەگەر هات و هندەك كەسێن تایبەت دڤی بواری دا هەبن ئەگەر هەیە چارەسەریا دەروونی بێتە كرن،بەلێ كەس گەشبین نینە ئەڤ كەس و ڤەكولەر هەبن ژبەر شنگال هاتیە پشت گوه هاڤێتن.
هەروەسا دیاركر،ژلایێ ماددی ڤە پێتڤیە خەلكێ شنگال بێتە قەرەبووكرن داكو وان زەرەریێن ماددی ژێ ببەن و بێنە ونداكرن،دخوازین جیێن شۆلەژێ چاڤدێریێ ل زارۆكێن ئێتیم و ژن و زەلامان بكت داكو ببتە وەك هاندانەكێ بۆ وان دەست ژ ژیانێ بەرنەدەن.
ل داویێ خویاكر،ئەگەر حكومەتا عێراقێ تشتەكی بۆ شنگالێ نەكت كو جارەكا دی دووبارە ژیان ئاسایی ببتە ڤە خەلكێ مە دێ بەرەف دەرڤەی وەلاتی چن،ژبەر ئەو بەرهەڤ نینن دووبارە خۆ بكەنە دمەترسیێ دا.
تُتاح هذه الصورة أيضا في: کوردی
