ئەشواق حەجی:لسەر كەیسا خۆ دێ بەردەوام بم بۆ سزادانا تیرۆرستەكی داعشێ ل ئەلمانیا
تۆرا لالش یا راگەهاندنێ
كچا رزگاربوویا ئێزدی(ئەشواق حەجی)پشتی ژ وەلاتێ ئەلمانیا زڤریە كوردستانێ نهۆ ل كەمپا ئێسیان ئاكنجی یە بۆ رۆژناما دەنگێ لالش راگەهاند،ئەگەر ئەلمانیا داخواز كر دێ ڤەگەرمە ڤە و لسەر كەیسا خۆ بەردەوام بم ئەگەر دادوەریا وی وەلاتی هاریكاریا من كر،بۆ دەستەسەركرن و سزادانا تیرۆرستێ داعشێ ئەبو هومامی یێ دەست درێژی كریە سەر من و گرتیم.
ئەشواق حەجی دیاركر،پشتی ژ دەستێ داعش رزگاربوویم بریاردا بچمە وەلاتێ ئەلمانیا لگەل چەند ئەندامێن خێزانا خۆ ل وی وەلاتی ژیانا خۆ دەرباز بكەین،لێ مخابن ل وی وەلاتی من ئەو كەسێ داعشێ دیت ئەوێ ئەز گرتیم و ژیانا من رەشكری و ژ ترسا وی كەسی جارەكا دی هاتمە كوردستانێ ڤە و نهۆ ژی دترسم چنكو مالباتا ئەبو هومامێ داعشێ نهۆ ل باژێرێ بەغدا دژین وئەڤە ژی مەترسیە لسەر خێزانا من،و گۆت:((ئەز دێ جارەكا دی ڤەگەرمە ئەلمانیا ئەگەر داخوازا ڤەگەریانا من كر و لسەر كەیسا خۆ دێ بەردەوام بم ئەگەر دادوەریا وی وەلاتی هاریكاریا من كر ژبۆ دەستەسەركرن و سزادانا وی تیرۆرستی)).هەروەسا دووپاتكر بۆ جارا دووێ ل باژێرێ شتوتگارت ل وەلاتێ ئەلمانیا تیرۆرستێ داعشێ یێ ناسیار ب(ئەبو هومام) دیتیە،داخواز ژ دەستهلاتا ئەلمانی كر ڤی داعشی سزا بدەن لێ مخابن وان بەرێ خۆ نەدا گلی وگازندا من و دادوەریا ئەلمانی گرنگیێ نەدایێ و رەتكر ب بەهانەیا وێ چەندێ ئەو تیرۆرست ژی پەنابەرە ومافێ پەنابەریێ هەیە وەكی هەركەسەكی دی.
هەروەسا تەكەزكر،داخوازێ ژ حكومەتا ئەلمانیا وحكومەتا عێراقێ دكەم وی تیرۆرستێ داعشێ وهەر كەسەكی دی وەكی وی ب زوترین دەم بێتە سزادان و هەموو گرتیێن ئێزدی یێن ماین ددەستێ داعشێ بێنە رزگاركرن.
ئاشكەراكرژی هەتا نهۆ نێزیكی(41) كەس ژ مالباتا من ل دەسێ داعش دا ماینە و نهۆ ل كەمپا ئێسیان دگەل هندەك ئەندامێن خێزانا خۆ دژیم وهندەك ژ خێزانا من ل وەلاتێ ئوسترالیا دژین.
تُتاح هذه الصورة أيضا في: کوردی
