د تەڤكوژیا گوندێ كۆچۆ دا 1211كەسێن ئێزدی هاتنە كوشتن و بێ سەروشوونكرن
تۆرا لالش یا راگەهاندنێ/رائد غانم
گوندێ كۆچۆ ب دووراتیا(23)كم دكەفتە باشوورێ رۆژئاڤایێ ناڤەندا قەزا شنگالێ و سەر ب ناوچەداریا بلێج ل قەزا بەعاج ڤەیە،ژمارا خێزانێن گوندی لدوڤ پلێتێن ئاهێن خوارنێ(275)خێزانن و ژمارا ئاكنجیان پتر ژ(1700) كەسایە و هەموو ژ ئێلا( مەندكانی)نە،سەرجەمێ كەسێن ب دەستێ تیرۆرستێن داعشێ ل رۆژا(15/8/2014)ێ هاتینە كوشتن و بێ سەروشوونكرن(1211)كەسن و (400) زەلام ژ وان هاتن كوشتن و(19) كەس ژ تەڤكوژیێ قورتالبوون.
(مەروان جەدعان)ئێك ژ قورتالبوویێن گوندێ كۆچۆیە دیاركر،ئەم دەمژمێر هەفتی سبەیكێ دەركەفتین و (40) زەلام ل گەل من بوون،داعش ئەم گولەبارانكرین و كەفتینە دەستێن وان دا و دەستەسەركرین،بەلێ من و كورێ خۆ ئالای ژ دەستان ئینادەر و ئەم قورتال بووین،دگەل (سوهەیل مەحل،حەمدی موراد،سوها موراد)ئەم بەر ب چیایی ڤە چۆین و پشتی (10) دەمژمێرێن ب ترس گەهشتینە چلمێران هەفت رۆژان ل وێدەرێ ماین بێ كو هیچ هاریكاریەك بگەهتە مە،ئەم دبن گەفا برس و تێهناتیێ دە ماین،پاشی هندەك گەنم ب دەست مە كەفت مە كەلاند و خوار ب رێ ڤە مە جاڤ ب گەلەك زارۆكان كەفت ژ تێهناندا مربوون،یا ئەز دزانم ئەو خەلكێ كەفتیە دەستێ داعشێ هاتە دەستەسەركرن و پشتی كچ ژ مالان ڤەقەتاندین و نێر و مێ ژێك جوداكرین ڤەگوهاستنە باژێرێ تللەعفەر.
هەروەسا(عزەت عەباس)خەلكێ گوندێ كۆچۆیە گۆت:ئەم ژ گوندی دەركەفتین و چۆینە مالا (عەلی جەدعان) ل شنگال بەلێ مە دیت رەوش شەپرزەیە،مە بەرێ خۆ دا چیایی ل نیڤا رێ بابێ من گۆت ڤەگەرە بەلێ من مۆبایلا خۆ گرت و دا رێ ڤە هەر سێ خووشك و چار زارۆك و دەیكا من دگەل من بوون،بەلێ دەمێ قورتالبوون ل نێزیكی یاریگەها شنگال كەفتینە دەستێ داعش ل وێدەرێ داعشەكی ب زمانێ كوردی گازی من كر(بەراز كو دەچی)تژی دەڤێ خۆ كر و گازی هەموویان كر و گۆت ب هێزەكا كێم مە شنگال داگیركر،پاشی لوولییا رەشاشێ كرە دسەرێ مندا و گۆت تە بكوژم بەراز،وی دەمی مالێ هەموویان كرە گری و قیری ژبەر قیری و گریا وان ئەز بەردام،پاشی ئەم شەڤەكێ مانە ل رۆژهەلاتا یاریگەهێ و مە دیت سوهەیل مەحل ژ دەستێن داعشێ یێ رەڤی مە گازی كرێ و ئەو ژی هاتە نك مە،ل رۆژا(4/8/2014)ێ مە بەرێ خۆ دا گەلیێ گەلیزەر و دوو شەڤان ل شكەفتان دا نڤستین پاشی چۆینە سەردەشتی نێزیكی چلمێرا و پێنج رۆژان بێ خوارن ماینە ل وێدەرێ پاشی چۆینە كەرسێ هەتا گەهشتینە سنوورێ رۆژئاڤا.
(ئیدریس بەشار سلۆ)رزگاربوویەكی گوندێ كۆچۆیە ئاشكەراكر،ل رۆژا(3/8/2014)ێ هندەك خەلك ژ گوندی دەركەفتن ل رۆژا دووێ داعش هاتە دناڤ گوندی دا و چەك ژ مە ستاند،رۆژا سێیێ نەهاتن ل رۆژا چارێ هاتنە ڤە شڤانەكی گوندی دەستەسەركربوون لگەل خۆ ئینان و بەردان،خەلكەك پشتراستكر و دلنیاكر چوو ل وان ناكن،رۆژا پێنجێ خالەكا زێرەڤانیێ ل ئامادەیا كۆچۆ یا تێكەل دانا پاشی بۆ دەمێ دوو رۆژان داعشان خۆ هنداكرن،ل رۆژا(11/8/2014)ێ هاتنە گوندی ڤە،دوو رۆژان مۆلەت دانە مە ئۆلا خۆ بگهۆرین و ببنە موسلمان و بەری مۆلەت ب داوی بێت ژمارەكا مەزن ژ داعشان هاتنە گوندی و تنێ بشەڤێ هاتن و چۆن دكرن،ل دەمژمێر(11)ی سبەیكێ ئەم ئاگەهداركرین و مزگینیا لێبۆرینێ گەهاندنە مە و ل رۆژا (15/8/2014)ێ شەفەلەك ئینان و هەموو رێ داخستن و ل دەمژمێر یازدە و نیڤی بەری نیڤرۆ گوند ژ هەر چار ئالیان ڤە دووررپێچكرن،موختار ئاگەهداركرن و گۆتنێ خەلكێ ل قوتابخانا گوندی دا بۆ مە كۆم بكن،كەیفا مە گەلەك هات مە گۆت ئەم دێ چینە چیایی و دێ مە ئازاد كن پاشی گۆتنە خەلكێ ترومبێلێن خۆ ژی دگەل خۆ بیننە قوتابخانێ و داعش ژی هەموو هێزا خۆ ل وێدەرێ خرڤەكر خێزانێن گوندی زارۆك و ژن ل ناڤلیوانك و ژۆر و قاتێ سەری بژالەبوون،زەلام مانە ل هۆلێ و باخچەیێ قوتابخانێ دا موختارێ گوندی ئەحمەد جاسۆ ل وێدەرێ بوو هات و گۆت مۆبایل و دراڤ و زێرێ هەوە هەی بینن،مە بۆ وان كۆمكرن و كرنە د چانتەكی مەزن دا پاشی ئێك هات و دەبانجەیەك د دەستێ وی دا بوو گۆت كی شێخێ وەیە مە گۆتێ(ئەحمەد جاسۆ)یە ئینا گۆتێ هوون دێ بنە بوسلمان هەموویان گۆتێ نەخێر ئەو زەلام چۆ،پاشی دوو پیكەم ئینان ئێك (كەیا)و یا دی (دێر) بوون هەر دوو ترومبێل ژ زەلامان تژیكرن و هەر ئێكێ (18) كەس لێ باركرن و ترومبێلا سێیێ(16)كەس لێ باركرن بەرێ وان ترومبێلا ب دووراتیا(350)مەتران،دانە رۆژهەلاتێ گوندی بەر ب رێیا بلێج ل ناڤ بیستانەكی بەرامبەر حەودا ئاڤێ من دەستێ گەرا ئێكێ دیتن هەموو رێزكربوون ئەم ژی ئیناینە وێدەرێ و(30)مەتران ژ وان دووربووین،پشتی ژ ترومبێلان ئیناینە خوارێ گۆتنە مە بلەز بازدەن و بگەهنە گەرا ئێكێ ئەوێن رێزكرین و بەرهەڤكرین بۆ كوشتنێ پاشی ل مە رەشاندن و سێ كەس ژ مە كوشتن بەری ئەم بگەهینە وان،بەرامبەری مە هندەك كەس لسەر گرەكی بوون ئێكی كامیرەكا ڤیدیۆیێ د دەستی دا بوو ئەم وێنەدكرین دەمێ گولەبارانكرین وان دكرنە قیری و دگۆتن ئەللاهوئەكبر سێ گولە ب لنگێن من كەفتن من هاژێ هەبوو دەمێ گۆتن هەرنە خودانێ دشداشێ گەور یێ ساخە وی دەمی دەنگێ فرۆكەیەكێ هات من هاژێ هەبوو گۆتن جیێ خۆ بگهۆرن فرۆكە هات دسێ خۆلەكان دا گولەبارانكرن ب داوی هات چوو كەس نەمان ئەز رابوومە سەر خۆ من(6)بریندار دیتن بەلێ برینێن وان كوور بوون و د رەوشەكا خرابدابوون داخوازا ئاڤێ دكرن و وان ئەز هێلام و ب تنێ مام دەمژمێر سێ و نیڤی هێڤاری چار كەسێن دی ژ تەڤكوژیێ رەڤین داعشان ئەو دیتن و لێ رەشاندن و سێ ژێ كوشتن تنێ ئێك ژێ قورتال بوو،من خۆ لسەر زكی دخوشاند ئەز مامە ل ناڤ بیستانەكێ هەتا رۆژ ئاڤا بووی گەلەك خوون ژ برینێن من دچۆ و پاشی من خۆ گەهاندە گوندەكی ئەرەبان و پەیوەندی ب كەسەكی كر گەهاندمە نەخۆشخانا جەمهوری ل مووسلێ پشتی نۆژداران نكاری گولەیان ژ لەشێ من بیننە دەرێ دەرمان بۆ من نڤیسین و ژ نەخۆشخانێ دەركەفتین،هەتا رۆژا(23/9/2014)ێ ل مالا هەڤالێ خۆ مام و پاشی گەهشتمە ناڤ كەس و كارێن خۆ ل كوردستانێ.
تُتاح هذه الصورة أيضا في: کوردی
