ل عه‌فرینێ 150 كه‌سێن ئێزدی دئێنه ناچاركرن ئایینێ خۆ بگهۆرن
باسنيوز:
به‌رپرسێ رێكخراوا جڤین ودیكومێنتكرنا تاوانێن دژى ئێزدیان ل عه‌فرینێ دیاركر: “هه‌تا نۆكه ناڤێن 150 كه‌سێن ئێزدى یێن لایێ من هاتینه تۆماركرن گرۆپێن توند ره‌و ئه‌و نه‌چاركرینه ئایینێ خوه بگهۆرن. رۆژ دووڤ رۆژى ره‌وشا ئێزدیان دخراپیێ دایه ل عه‌فرینێ”.
كاوه عه‌یدو خه‌تارى، به‌رپرسێ رێكخراوا جڤین یا گه‌شه‌پێدانا جڤاكێ و دیكومێنتكرنا تاوانێن دژى ئێزدیان ل عه‌فرینێ بۆ (باسنیوز) دیاركر: “ئێزدى تووشى گه‌له‌ك ئالوزیان بووینه ل عه‌فرینێ. نۆكه گرۆپێن توند ره‌و ئێزدیان نه‌چاردكه‌ن ده‌ستا ژ ئایینێ ئێزدیاتیێ به‌رده‌ن. هه‌تا نۆكه 150 كه‌سێن ئێزدى یێن هاتینه نه‌چاركرن ژلایێ وان گرۆپێن توند ره‌و ڤه ده‌ستا ژ ئێزدیاتیێ به‌رده‌ن وئایینێ وان گهۆرن و رۆژ دووڤ رۆژى ژى ئێزدى دهێنه ره‌ڤاندن. هه‌ر ئێك به‌رامبه‌ر كوژمێ پێنچ هزار دولارێن ئه‌مریكى دهێته رزگاركرن. ئه‌و گرۆپێن توند ره‌و ئێزدیان دره‌ڤینن ب پارە رزگاردكه‌ن. داخازێ ژ ده‌وله‌تێن جیهانێ دكه‌ین ژیانا ئێزدیان ل عه‌فرینێ بهێته پاراستن”.
خویا ژى كر:”گرۆپێن توند ره‌و ل باژێرێ عه‌فرینێ هه‌شت جهێن ئێزدیان هه‌لوه‌شاندن. ئه‌و جه بوون ئێزدیان تێدا رێ و ره‌سمێن خوه دگێران وهه‌لكه‌ڤت تێدا ئه‌نجام دان”.
22 گۆندێن ئێزدیان ل عه‌فرینێ ھەبوون و دۆرێ 200 هزار كه‌سێن ئێزدى تێدا دژیان. گرۆپێن توند ره‌و ل عه‌فریێنى ئێزدى نه‌چاركرینه ئاینى خوه بگۆرن. نۆكه هنده‌ك ژ ئێزدیێن عه‌فرینێ ئاواره‌یێ هه‌رێما كوردستانێ و وه‌لاتێن لوبنان و توركیا وده‌وله‌تیێن جیهانێ بووینه.
تُتاح هذه الصورة أيضا في: کوردی
