سەرەدانا سەرۆكێ فەرەنسا،سەرەدانەكا دیرۆكی بوو بۆ گەل و حكوومەتا هەرێما كوردستانێ
خالد خدر
لرۆژا 2ی ڤێ هەیڤێ كانوونا دووێ 2017 بەرێز (فەرانسوا ئۆلاند) سەرۆكێ كۆمارا فەرەنسا،سەرەدانا هەرێما كوردستانێ كر،پێشەوازییەكا گەرم و ژهەژی لێ هاتە كرن ژلایێ سەرۆكایەتی و حكوومەتا هەرێما كوردستانێ ڤە ، ب تایبەتی ژلایێ سەرۆك بارزانی ڤە ،كو دگەل جەنابێ وی سەرەدانا بەرۆكێن شەری كر ل چیایێ زەرتەك ، و ژ نێزیك ڤە بەرێخۆدانە ڕەوشا پێشمەرگەیێن قارەمان و سەركەفتنێن وان ل دژی تیرۆرستێن داعش پیرۆز كر و دەست خۆشی ل وان كرن.
ئەڤ سەرەدانە یا ناڤهاتی نەیا ئێكێ بوو ، وەك جەنابێ سەرۆك بارزانی دایی دیار كرن ل دەمێ ب خێرهاتنا وی ، كو بەرێز ئۆلاندی ل نازكترین و دژوارترین بارودۆخ دا وی سەرەدانا هەرێما كوردستانێ كر بوو ،ل دەمێ هێرشا دڕندەیێن چەكدارێن تیرۆرستێن داعش ل سەر هەرێما كوردستانێ ، سەرەدانا سەرۆكێ فەرەنسا سەرەدانەكا دیرۆكی بوو بۆ گەل و حكوومەتا هەرێما كوردستانێ ،و براستێ ژهەژی ئاماژەپێكرنێ یە كو پێشەوازییەكا ژ لایق و شایستەی وی هاتە كرن ، فەرەنسا وەلاتەكی گرنگە و پێگەهێ خۆیێ مەزن هەیە ل سەر ئاستێن وەلاتێن ئەوروپی و جیهانی ژی ،فەرەنسا وەلاتەكی زلهێز و مەزنە وخودان دیرۆكەكا گەش و سەرفەرازە ل بوارێ دیموكراسیێ و ئازادیێن تاكی و گشتی و پاراستنا مافێ مرۆڤی ،كو بێ جێوازی بەرێخۆ ددەتە مرۆڤان ،و ئازادیێن بەرفرەه و رەهایی داینە وەلاتیێن خۆ بێ فەرق و جوداهی ،بۆ نموونە هەركەسەكێ ل فەرەنسا بژیت ئەو دئێتە هژمارتن فەرەنسی بلا بنیاتێ وی ژكور بە یان رەنگی وی چاوابت یان ژی پەرستنا چ ئۆل و باوەریێ بكەت ل دوماهیێ ئەو فەرەنسی یە ،ئەڤە بخۆ خالەكا بهێز و گرنگە بۆ راگرتن وپاراستنا مافێ مرۆڤی و وەرگرتنا یێ دی ، خۆزیكێن وەلاتێن رۆژهەلاتا ناڤین بۆ ڤێ خالێ ، وژئەگەرێ ڤێ چەندێ فەرەنسا باجەكا مەزن پێشكێش كری یە ، و بوویە ئارمانجا تیرۆر و تیرۆرستان ، كو ل ڤان هەردوو سالێن بۆری وەلاتێ فەرەنسا تووشی ژمارەكا مەزن یا هێرشێن تیرۆرستی بوویە ژلایێ كەس و گرۆپێن رادیكال و توخم پەرێس ڤە.
خالا سەرەكی وگرنگ ئەوە كو فەرەنسا ئەندامەكا هەرە كاریگەرە ل هەڤپەیمانییا نێڤ دەولەتی دا یا ل دژی رێكخراوا تیرۆرستییا داعش ، و پێتڤی یە بهێتە گۆتن كو وەلاتێ فەرەنسا دۆستەكێ كەڤنە یێ گەلێ كوردستانێ ، كو ل بەهارا سالا 1991ێ دەمێ كۆچا ملیۆنی یا گەلێ كوردستانێ ، ل دەمێ دەركرنا بڕیارا چێكرنا دەڤەرەكا ئارام ل كوردستانا عێراقێ ژلایێ جڤاتا ئەولەهییا نێڤ دەولەتی ڤە ، فەرەنسا رۆلەكێ سەرەكی هەبوویە ژبۆ دەركرنا بریارا ناڤهاتی ل سەر دەمێ سەرۆكاتیا سەرۆكێ وەغركری (فەرنسوا میتیران )، و نهۆژی وەلاتێ فەرەنسا هیچ درێغی نەكری یە دبیاڤێ هاریكاری و پشتەڤانیا گەلێ كوردستانێ دا، ب تایبەتی ل شەرێ دژی تیرۆرستێن داعش ، و وەك مە دای دیاركرن كو فەرەنسا ئەندامەكا كاریگەر و سەرەكی یە ل هەڤپەیمانییا نێڤ دەولەتی یا ل دژی داعش ،و سەرەدانا سەرۆك ئۆلاند بخۆ بخۆ پشتەڤانیەكا مەزنە بۆ گەل و حكوومەتا هەرێما كوردستانێ ل هەموو بیاڤان دا.
تُتاح هذه الصورة أيضا في: کوردی