بنگەهێ لالش: خەلاتکرنا دوو ڕزگاربوویێن ئێزدى ب خەلاتەکێ ئەوروپی سەرکەفتنا بن دەستیێ و ئاشتیێ یە ل سەر توندڕەوی و تیرۆرێ
ب شانازی و سەرفرازیڤە دەنگوباسێ خەلاتکرنا هەردوو ڕزگاربوویێن ئیزدی (نادیە مراد)و (لەمیا بشار حجی) ب خەلاتێ “ساخاڕۆڤ) ژبۆ ئازادیا ڕادەربرینێ و هزرێ یێ سالا ۲۰۱٦ یێ کو سالانە تیتە پێشکێشکرن ژلایێ پەرلەمانێ ئەوروپیڤە . وئەم پیرۆزباهیێ ل هەردوو کەچێن خۆ نادیە و لەمیایێ دکەن ژبۆ ڤێ سەرکەفتنێ ، ئەم دبینن کو ئەڤ خەلاتکرنە سەرکەفتنە بۆ بن دەستی و ئاشتیێ ل سەر توندڕەوی و تیرۆرێ ، و ئەو پەیامەکە ئاشکرایە بۆ هەمیان کو وژدانا جیهانێ یە هەڤخەمە دگەل وان کەسێن زولم لێکری ل هەر جهەکی ل دژی تیرۆرێ و چەتەیێن سەرژێکرنێ و کوشتن و ڕەڤاندنێ و سەرداگرتن و تالانکرنێ.
بێ گومان ئەو هەولێن هاتینە کرن و هەتا نهۆ ژی دبەردەوامن ژلایێ سەرکردایەتی و حکوومەتا هەریما کوردستانێ ژبۆ گەهاندنا ئازارێن کوردێن ئیزدی ب تایبەتی ئەوێن ڕزگاربووین ژبن دەستێ داعش بۆ ناڤەندێن نیڤ دەولەتی کو دەست پێکرنا بەرهەمێ وێ چەندێ لێ دیاردبیت ئەم دبینن گرنگیدانا ڕاگەهاندنا جیهانی ب دۆزا ئیزدیان ب ڕەنگەکی گشتی وا دیاردبت، ئەم ل وێ باوەریێ نە کو ل دیدارێن جودا جودایێن دئینە کرن ل هەولێرێ دناڤبەرا بلندترین هەرەمێن سەرۆکاتیێن کوردستانێ وکەسایەتیێن نیڤ نەتەوەیی و نیڤ دەولەتی یێن پووتەپیکەر ب کاروبارێن مرۆڤایەتی ، بەحس ل سەر وێ چەندێ تیتەکرن ئەوا ب سەرێ ئیزدیان هاتی ل ۳تەباخا ۲۰۱٤ پشتی داگێرکرنا قەزا شنگال ژلایێ ڕێکخستیا داعش یا تیڕۆڕستی و ئەو کارو کریارێن دڕندەو هۆڤانە یێن هاتینە ئەنجامدان ل هەمبەر خەلکێ مە ژ سەرژێکرن و کوشتن و ڕەڤاندن و گهۆڕینا ب خورتی یا ئاینێ وان و زیدەباری دەست دڕێژیا جەستەی ل سەر کەچ و ژنان .
سەرەڕای کو ڤان خەلاتا بهایێ خۆیێ مەعنەوی گرنگ هەیە ، ئەو جهێ سەربلندی و ڕیزگرتنا مەیە ، ئەم گرنگ دبینن وێ بەردەوامیا ل سەر پشتەڤانیا بادەکا (جینۆسایدا ئیزدیان) ئەوا کو سەرکردایەتی و حکوومەتا هەرێمێ ب خۆڤە گرتی ، وەک گرنگیەکا مەزنە بۆ مە هەمیان ، ژبەرکو ئەو دێ مافێ هەمی خەلکێ مە دیارکەت ژ قوربانیا و هندابوویا و گرتیا و ڕزگاربوویا و یێن دیتر ژی . هەروەسا ئەم هۆشداریێ دن ژ ب کارئینانا پرسا خەلاتکرنا هەردوو ڕزگاربوویێن ئیزدی نادیە مراد و لەمیا بشار حجی ، ژبەرکو دۆزەکا مرۆڤایەتیا خۆسەرە و دێ گەلەک ژ ڕامانا خۆ ژدەست هەکە بکەڤیتە دچارچۆڤێ سیاسی وپارتایەتیا دبەرتەنگ دا.
دەستەکا بلندا بنگەهێ لالش /دهۆک
27/10/2016
تُتاح هذه الصورة أيضا في: کوردی
