هەڤپەیمانییا سێ قۆلی !!!
خالد خدر 
ل ڤی ماوێ داوی گەلەك گۆرانكاری پەیدا بوون لدەڤەرا رۆژهەلاتا ناڤین هەر ژ كۆدەتایا سەرنەگرتی ل توركیا تاكو دگەهشتییە لهەڤنێزك بوونا توركیا و رووسیا ، نهۆ گۆتگۆتكەك هەیە دبێژیت كو هەڤپەیمانییەكا سێ قۆلی دێ هێتە دروست كرن دناڤبەرا رووسیا و ئیرانێ و توركیا دا ، ب تایبەتی پشتی سەرەدانا سەرۆك كۆمارێ توركیا ( رەجەب تەیب ئەردۆگان ) بۆ باژێرێ بترس بۆرگ یێ رووسی ، و هەڤدیتنا وی دگەل سەرۆكێ رووسی (فلادیمێر بۆتین ) ، ئەڤێ سەرەدانێ خالەكا ڤەگوهاستی یا ترسناك ئێخستە دەڤەرێ وهەر وەسا پێنگاڤەكا جۆری بوو لسەر ئاستێ پەیوەندیێن توركیا و رووسیا.
نەخاسمە پشتی بلندبوونا ناكۆكییان دناڤبەرا ئەنقەرا و مۆسكۆ دا ب سەدەما ئێخستنا فرۆكا رووسی و شەرێ ل سووریا ، كو رووسیا پشتەڤانەكا هەرە مەزنە بۆ رژێما بەشار ئەسەدی ، ئەوژی ئێك ژ دژمنێت توركیا یە ،هەڤنێزیك بوونا رووسیا وتوركیا هەڤسەنگیێن سیاسی وەرگەراندن ل دەڤەرێ ، و ژ ئەنجامێ ڤێ چەندێ كۆمارا ئیسلامیا ئیرانی و توركیا پەیوەندیێن وان ئاسایی بوون كو ئیرانی هەڤپەیمانەكی ئیستراتیژی یە سەبارەت رووسیا ، لەورا لسەر ڤی شەنگستی دهێتە چاڤەری َكرن ئەڤ هەڤپەیمانییا سێ قۆلی بهێتە چێكرن ، تێە زانین كو گەلەك ناكۆكی بەریا نهۆ هەبوون دناڤبەرا ئیرانێ توركیا دا ،ژبلی هەڤركیێن مەزهەبی وتائیفەگەری كو ئیران نوونەرا مەزهەبێ شیعەیا نە و توركیا نوونەرا سوننەیا نە ، زێدەباری هەڤپەیمانییا توركیا دگەل وەلاتێن عەربیێن سوننە مەزهەب ب تایبەتی سعوودی یە و قەتەر كو ئیران دوژمنا وان یا كەڤنارە ، ئەو نەچارن ناكۆكیێن خۆ بدەنە رەخەكێ ب كێماتی ل ڤێ قۆناخێ دا ، چێدبیت هندەك هۆسا هزر بكەن كو توركیا ئەڤ هەلویستە كریە بەر ژبەر كو ترسیایە پشتی وێ كۆدەتایا لەشكەری یا سەرنەگرتی ل توركیا ، بەلێ ئەڤ بۆچوونە گەلەك یا لاوازە ، بەلكو توركیا هندەك ئەگەرێت دی هەنە لسەر ڤێ هەڤ نێزیك بوونا وێ دگەل وەلاتێن ناڤهاتی .
لگۆر چاڤدێر و شرۆڤەكارێت سیاسی و ئابووری ، ئەڤ نەرمی و ئاسایكرنا پەیوەندیێن توركیا دگەل رووسیا و ئیرانێ پتر پەرژەوەندیێت ئابووری لپێ هەنە ، كو دهێتە چاڤەرێ كرن رێككەفتنێت ئابووری و گەشتیاری دناڤبەرا هەردوو لایەنان دا بهێنە كرن ، كو بەریا نهۆ توركیا ئابووریا وێ پاشڤە چۆبوو ژ سەدەما تێكچوونا پەیوەندیێن وێ دگەل هەر ئێك ژ رووسیا و ئیرانێ ، چنكو سالانە ب ملیونا گەشتیارا قەستا توركیا دكرن ، بەلێ ل ڤان سالێت داویێ رێژەیا وان ل كێمیێ دابوو لەورا توركیا هەست ب مەترسیێ كر ، ژلایەكی دیڤە ئەڤ هەڤنێزیك بوونە یان هەڤپەیمانیا سێ قۆلی یا تێتە چاڤەرێ كرن دناڤبەرا (توركیا ،ئیران ، رووسیا ) دا ، نە دوورە زیانێ بگەهینتە پرسا كوردی ل دەڤەرێ ب تایبەتی ل باكوور و رۆژهەلات و رۆژئاڤا، چنكو ل ڤان هەردوو وەلاتێن ناڤهاتی هێشتا گەلێ كورد نەگەهشتینە مافێت خۆ یێن ڕەوا و دبن دەستن ، و توركیا مەرەمەكا دی هەیە ب ڤێ هەڤپەیمانیێ ئەوژی بهێز كرنا دەستێوەردانا خۆ ل سووریا و ئێخستنا گڤاشتنا لسەر گەلێ مەیێ كورد ل رۆژئاڤا ، وهەر وەسا توركیا نیاز هەیە ئاراستەیا خۆ بگهۆرت ئانكو پاش كشینێ ژ سیاسەتا خۆ بكەت دگەل ئەمریكا و ئەورپا ، كو ئەڤە چەندین سالە هەولدانێ دكەت داكو دچتە دناڤ ئێكەتییا ئەورپی ، و ئەڤ خەونا وێ ناهێتە ب جیكرن بۆ هەتا هەتایێ.
تُتاح هذه الصورة أيضا في: کوردی
