خەلكێ شەنگالێ ناكۆكیێن سیاسی قەبوولناكن
سەكار كامل 
دەما پەیڤا شەنگال دئێتە گوهێ من ، دیرۆكەكە پڕ ژ نەهامەتی ، دەردەسەری ، فرمان و گەلكوژیێ دێتە هزرا من ، ئەو دەڤەرا ب سەدان سالانە بەرخودانێ دكت پێخەمەت ئۆل ، نەتەوە و ئاخا خۆ، شنگال هەر ژ كەڤندا ئامانجا دوژمنان بوو و د داگیركاری و شەڕێن بەڕدەوام دا مەیدانا مان و نەمانێ بوو ، مێژوو دیدەڤانەكا چەند فەرمان و گەلكوژی ل شەنگالێ هاتنە ئەنجامدان و كا چاوا هەتا نهۆ ژی پەڕێن دیرۆكێ ب بەرخودانا خۆ تژیكرینە و ئەگەرێ هەموو كوشتار و داگیركاریان ل سەر ئێزیان ئۆل ب پلا ئێكێ و نەتەوە ب پلا دووێ بوون.
ژبەركو ئێزدیاتی هەر ژ دێر زەماندا ئۆلا شەنگالێ بوو لەو دبوو سەدەمەك شنگال بێتە داگیركرن و ئۆلا وان بێتە گهورین و مال وملكێ وان بێتە تالانكرن و وێرانكرن لێ شنگال وەكو كەلهەكا ئاسێ و خودان چیایەكێ ب هێز بەرسڤا گشت داگیركاران ددا و داستانێن پڕ ژ قارەمانی و تەكۆشینێ ب سایا قارەمانێن خۆ تۆماردكرن و هەتا نهۆ ژی ناڤێ وان خەباتكارا د دیرۆكێ دە دەنگ ڤەددەن و ب خودان هەلویست ل قەلەم ددەن ، د بتریا قڕكرن و فرمان و كوشتارێن د شەنگالێ قەومین مێر دهاتنە كوشتن و كچ و ژن دهاتنە لاقەكرن ( ئیختیسابكرن ) ، مال و سامان و قوب و نیشانگەهـ ژی دهاتنە وێرانكرن ، هێش برینێن سەدسالیا فەرمانێن دی ژبیرنەبووین میناك فرمانا ( میرێ كۆرە ) ب هەڤكاریا دەولەتا ئۆسمانییان ، و برینێن نوو یێن پەقینێن تەرۆری ل سیبا شێخ خدر و گڕعزێرێ ، تەرۆریستێن داعشێ و ئەهلێ قەتل و كزب و نیفاقێ ل ژێر دروشم و سلۆگانێن ئەلاهوئەكبەر وئایاتێن نیكاح و قەتلوعامێ ل 3 ی تەباخا 2014 ــان دە ب سەر شنگالێ دە گرتن و كۆمكوژی پێكئانی ب تایبەت ل گوندێ كۆچۆ و كچ ،ژن ، زارۆك و پیر و ئیختیار ڕەڤاندن و هەموو جۆرێن ئەشكەنجەدانێ دگەل بكارئینان میناك سەربڕین ، لێدان ، برسیكرن ، تاوانێن ڕەگەزی و دەروونی ئێن وژدان هەژ و هتد،ل بەر چاڤێن هەموو جیهانا گوهشۆڕ.
لێ نهۆ شەنگال بوویە مەیدانا ناكۆییێن پارت و لایەنان و هەر ژبەر ڤێ چەندێ یە خەلكێ وێ نكارن بچنە شنگال و دناڤ ناكۆكی و دژاتیێن وان دە بژین و ببن پارەك ژ ناكۆكییێن وان ، ل دووڤ مەدیایێن ناڤخۆیی بتر ژ پازدە هێزان ل شەنگالێ هەنە و هەر پارتەك ل دووڤ بەرژەوەندیێن خۆ لێ دمینت و گشت حەزدكن شەنگال ببت پارەك ژ وان ، لێ هەبوونا ڤان هێزێن دژ دێ ئایندەیێ خەلكێ شنگالێ بەر ب ئاقارەكی نادیار ڤە بەت و بێدەرا وێ هەر ئێك ژ ئالیێ خۆڤە دەتە بایی ، لەو خەلك ڤان ناكۆكیان قبوولناكەن و هێش برینا شەنگالێ سارێژنەبوویە و ل هیڤیا ڤەگەڕا كەچ ، ژن و زارۆك و ئیختیارێن خۆیە و هێش شەنگال دایكەك جەگەرسۆتیە و ل بەندا جەگەرێن خۆیە ژ بەر هندێ ئێدی نكارت بارێ ناكۆكیان ژی هەلگرت و ببت هەڤپارێ ناكۆكییێن پارت و هێزێن هەمەجۆر.
ب تەخمینا من پشتی شەنگال ب تەمامی دئێتە ڕزگاركرن فەرە گشتپڕسیەكا تایبەت بۆ خەلكێ وێ بێتە ئەنجام دان و گەل بڕیارێ بدەت كا كی و چاوا شەنگال بێتە بڕێڤەبرن و ژیاندن ، دا ئەنجامێن خڕاپ نەئێنە روودان و نابت ئێزدی ب دەستێ ئێزدیان بێنە كوشتن پێخەمەت ناكۆكیێن وان هێزان ، بلا ژبیرنەكەین شەنگال برینەكە زامدارە و پێتڤی حەكیمانە نەك ناكۆكی و دژبەرییان.
تُتاح هذه الصورة أيضا في: کوردی
