شنگال دناڤبەرا ژیانەكە سادە وساكار بۆ ژیانەكە وێرانكەر
چنار شمو 
دەما كو ئەز بچوك بووم ل گەل دەیك بابیت خۆ و خوشك برایێن خوە دژیام دمالەكە بچوك دە ل شنگالێ ، ژیانەكە سادە و پرخۆشی بوو وكارێن رۆژانە كو دەما سبێ زوو رادبووم لبەر تەنورێ ژنا سلاڤ ل هەڤ دكر و نانێ سبێ دپاتن بۆ تێشتێ ، و خوشك و برایێن من یێن بچوك خۆ ئامادە دكرن و جلكێن قوتابخانێ لبەر خۆ دكرن ومن سەرێ وان جوان شەه دكر و چانتێن وان دملێن وان دكر وبەرب خواندنگەهێ دچۆن ، داكو برایێ من و خوشكا من وەك من نەمینن نەخوێندەوار ، و هەردەم من هیڤی دكرن كو خوشك و برایێ من ب سەركەڤن و ببن نۆژدار و ئەندازیار ومامۆستا،ژبەركو بابێ من ژی نەخوێندەوار بوو ، كارێ خودانكرنا پەزی دكر و دەیكا من كابانیا مالێ بوو ، ژبەر كارێ مالێ و خودانكرنا خوشك و برایێن من یێن بچوك ئەو ژی نەیە خووندەوار بوو.
ل داویێ خوشك و برایێن من كولیژ ب داوی ئینان برایێ من بۆنۆژدار و خوشكامن بۆ مامۆستا و ژیانەكا بەختەوەر دەست پێ كر، بەلێ تشتێ نەی چاڤەرێكری ل رۆژا 3/8/2014 روودا وپاشەرۆژا من و خێزانا من و ئەو كەدا بابێ من و خوشك و برایێ من مینا خەونەكێ لێهات و لگەل دەنگێ چەكان پاشەرۆژا مە هاتە ژناڤبرن و هەریەك ژمە ب ئالیەكی ڤەچوو وفەرمانا گران سەر مە دا هات ،وەكا سەبەقێت قەولێ قیامەتێ دبێژت:رۆژەكێ ژ رۆژان دبی، تەرقین ل عەرشان دبی، خەبارە ل چیان دبی، نە كەسی كەسان دبی، نە بابێ پسان دبی، ئەوێ رۆژێ خەلكێ زالم ل وێێ دبی، ئەو بو رۆژا دژوار دبی، ئەو بو رۆژا هەزیم دبی، خەلك هەموو خەتخوین دبی. دڤێ رۆژێ دە خێزانا من هاتە ژناڤبرن ژ وێ رۆژێ بابێ من و برایێ من ژ مە هاتنە ڤەقتاندن ئەز و دەیكاخۆ و خوشكا خۆ دناڤ دەستێ پیس و چەپەلان دە هاتنە بدەست ڤەدان ، ژ وێ رۆژێدە مالا مە وێران بوو خەونێن خوشك و برایێ من هاتنە ژناڤبرن و پاشەرۆژا مە هەموویان هاتە ونداكرن ، نها ئەز ژ دەستێ داعشێ هاتم رزگاركرن د وان رۆژێن پری نەخۆشی و لێدان نها لڤر دەما سبا ژ خەو رادبم بتنێ ئەو رۆژ دئێن بیرا من لدەما سبێ ئەز و دەیكا خۆ ژ خەو رادبون مە لبەر تەنورێ سلاڤ ل كەس و كارێن خۆ دكر، نها ژخەو رادبم ل چادرەكا بێ سار وگەرم وبێ پێتڤیێت ژیانا ئاسایی دبینم، ئەز دوو جاران هاتمە بریندار كرن برینا ژناڤبرنا خێزانا من وهەرفاندنا مالا من و برینا كریارێن دورندانە یێ هەست وشەرەفا من پێ هاتیە شكاندن وەكو برینەكا هەرە دژوارن دژیانا من دە ، و دەرمانكرنا برینێن مە توو جارا نائێنە دەرمانكرن ، بەلكو ئەز بتر برینداركرمە و رۆژانە پێ دئێمە كوشتن د لەشەكی ساخ دە ، برینا من وێ وی دەمی دئێت دەرمانكرن لدەما ئەز ڤەگەریانا خێزانا خۆ دبینم و جار دن بكەڤم هەمبیزا دەیكا خۆ یا كو من پاشەرۆژا خۆ گۆری هاریكارییا وێ كری.
تێبینی:ئەڤە سەرپێهاتیا كەچەكا خۆراگرا شنكالا منە
تُتاح هذه الصورة أيضا في: کوردی
