جۆرێن توندوتیژیێ
عزەت برۆ
گەلەك جۆرێن توندوتیژیێ هەنە بەلێ ئەمێ لڤر هەولبدەن لدوڤ پیڤەرێن نێڤ دەولەتی جۆرێن وێ دەست نیشان بكن:
1_توندوتیژیا لەشی،ئەڤە ژ دیارترین جۆرێ توندوتیژیێ یە وەك لێدان، سۆتن،كوشتن ئازاردانا لەشی ب تایبەتی دژی ئافرەتێ،ئەڤ توندوتیژی ب دەست یان ب هەر ئامیرەكێ دی بت مەرەم ژێ ئێشاندن و گەهاندنا ئازارێ یە بۆ كەسی ژ ئالیێ لەشی ڤە،شوونوارێن ڤێ توندوتیژیێ ب ئاشكرایی لسەر لەشی دیار دبن،ئەڤە بەلاڤەترین جۆرێ توندوتیژیێ یە كو هێز تێدا دئێتە بكارئینان بۆ شكاندنا كەرامەتا كەسێ بەرامبەر،لدوڤ ئامارەكێ نێزیكی(15)بۆ (25 %)ژنا ل جیهانێ رووبروی ڤی جۆرێ توندوتیژیێ دبن، ژن ژبەر چەند ئەگەران نەوێرن بەحس بكن و بێ دەنگیێ هەلدبژێرن.
2_توندوتیژیا دەروونی،كارتێكرنێ و زیانێ ب كەرامەتا مرۆڤی دگەهینت دڤی جۆرێ توندوتیژیێ دە چ نیشانێ،دەرەكی نینن بەلێ ناڤخۆیی و دەروونی نە و ڤەشارتی نە چنكو د ناخێ مرۆڤی دا كارتێكرنا وێ بۆ ماوەكی درێژ دمینت و مەترسی ئەوە دبت ل هەمی قۆناغێ ژیانا وی كەسی دا بمینت و ببتە ئەگەرێ شكەستن و دامایی و تووشی چەندین نەخۆشیێن دەروونی بكت وەك خەمۆكی،هەروەسا كارتێكرنێ لسەر ژینگەها وی یا خێزانی و جڤاكی دكت ب تایبەتی د پەروەردەكرنا زارۆكان دا.
3_توندوتیژیا سكسی،پێكهاتیە ژ دەستدرێژیكرنا سكسی بۆ كەسەكی دی بێ كو كەسێ بەرامبەر حەزا ئەنجام دانا كریارا سكسی هەبت،ئەڤ جۆرە دئێتە هژمارتن ب ئازارترین جۆرێ توندوتیژیێ چنكو هەردوو جۆرێن توندوتیژیا دەروونی و لەشی تێدا دئێنە بكارئینان و بكارئینانا هێزێ و هەرەشێ ل دەمێ كریارا سكسی دا و ئازارا دەروونی و جەستەیی پەیدا دكت،بەهرا بتر ئەڤ جۆرێ توندوتیژیێ دئێتە بكارئینان لسەر ژنان و زارۆكان ژلایێ زەلامان ڤە.
4_توندوتیژیا سیاسی،ئالۆزترین جۆرێ توندوتیژیێ یە بتر پەیوەندی ب چاوانیا پێكئینانا دەستهەلاتا سیاسی ڤە هەیە ، ب شێوەیەكی دەستهەلات تاكرەویا ل پێكئینان و رێڤەبرنا وەلاتی دا بكت هندەك ئالی و گرۆپان سەركوت و پشتگوه بهاڤێت ئەڤە ژ هندێ دیاردبت دەمێ گرۆپێ سەركوتكەر هەست پێ دكت وێ هاتیە پشتگوه هاڤێتن و حساب بۆ نەهاتیە كرن و رێك نەدان بۆ بەشداریكرن د رێڤەبرنا وەلاتان دا و نەدانا پۆستان و نەبوونا بریارێ ب پرسێن چارەنڤیس سازدا.
5_توندوتیژیا كۆمەلایەتی،گەلەك جاران ب بەهانەیا لادان ژ داب و نەریتێ جڤاكی یان شەرەف و ناموسێ یان هندەك بیروباوەرێن نەدروست ژن ژئالیێ باب و برا و مێر و كەسوكارێن وێڤە رووبروی توندوتیژیێ دبت و هندەك جارا ژنێ ب توندی دكەنە بن چاڤدێریێ و ئازادیا وێ بەرتەنگ دكن و ناهێلن ژ مال دەركەڤت و هەروەسا پێگیر دكن هندك جلكێن تایبەت لبەرخۆ بكن و گەلەك جارا ژ خووندنێ بێ بار دكن یان شوودانا ب زۆری.
تُتاح هذه الصورة أيضا في: کوردی
