ئاوارێن شنگالێ دناڤبەینا ڤەگەرێ و لەیستكێن سیاسی دا
لەیت حسێن 
كۆمكوژیا ئێزدیان یا داویێ ئەوا ل(3/8/2014)ێ ل دەڤەرا شنگالێ روودایی بوو دەرفەت بۆ چەند ئالیێن سیاسی و لەشكەری كو بیێن و دەستهەلاتا خۆ بسەر شنگال و خەلكێ شنگالێ دا ب سەپینن ئەو بوو كو هەتا نهۆ ژی چەند ئالیێن سیاسی ل وێ دەڤەرێ ماینە و بووینە رێگر ل هەمبەر ئاڤاكرنا شنگال و ڤەگەریانا ئاوارەیێن وێ دەڤەرێ،سەرباری روودانێن(16)ێ ئۆكتۆبەرێ كو ملیشیاتێن حەشدا شەعبی و ب پشتەڤانیا پاسدارێن ئیرانێ هێرشی دەڤەرێن كوردستانی یێن ڤەقەتیایی(یێن دەرڤەی ئیدارا هەرێمێ) كر كو شنگال ژی دناڤدا،لەوا هاتنا حەشدا شەعبی ژی بۆ وێ دەڤەرێ بتر رەوش ئالۆزكر كو ئەڤە چەند جارانە شەر و پەڤچۆن دناڤبەینا هەر ئێك ژ حەشدێ و هێزێن سەر ب پەكەكێ یان لەشكەرێ عێراقێ ب جودا جودا ل وێ دەڤەرێ چێدبت،هەلبەت ژی ئەڤ چەندە دبتە ئەگەرێ نەباشكرنا ئێمناهیا دەڤەرێ هەروەسا بتر ترس دكەفتە دلێ خەلكێ دا،ئەڤ ململانێ و لەیستكێن سیاسی یێن ل وێ دەڤەرێ دقەومن بتر خەلكێ شنگالێ دلگران دكت،هەروەسا دروستكرنا ئیدارەكا دی ژئالیێ چەند كەسەكێن بسەر هێز و حزبێن نهۆ دەستهەلاتێ ل ور دكن یا كو هەڤدەم دگەل هەبوونا ئیدارەیا شەرعی یا وێ قەزایێ ئالۆزی زێدەتر لێ كرینە،ژبەر ڤان ململانێ و رەوشا نەجێگر یا وێ دەڤەرێ و نەبوونا خزمەتگۆزاریان و نە پاقژكرنا ناڤچەیێن باشوورێ چیایێ شنگال،هەتا نهۆ زۆربەیا هەرا زۆر یا خەلكێ دەڤەرا شنگالێ ڤەنەگەریاینە جیێن خۆ و ل كەمپێن سنوورێ پارێزگەها دهۆكێ دا ژیانا خۆ دبەنە سەر و ل بتریا كەمپان ژی دا خزمەتگۆزاری بەرەف نەمانێ دچن و رێكخراو ژی ئێدی چ پرۆژە و دەلیڤێن كاری ژی بۆ گەنجان دروست پەیدا ناكن.
تُتاح هذه الصورة أيضا في: کوردی
