پێكهاتن دناڤبەرا ئێزدیان و ئەرەبان دا
بەختیار قادر
پشتی وێ جینۆسایدا بسەرێ ئێزدیێن شنگالێ دا هاتی لسەر دەستێ درەندەترین رێكخراوا تیرۆرستی بناڤێ داعش و ئەرەبێن هەڤسنوور لگەل شنگال دا،ماوەیەكە بەحسێ پێكهاتنێ دناڤبەرا ئێزدیان و ئەرەبان دا هەیە كو پێكهاتن و ئاشتی چێبت و ب هەڤرا بژینە ڤە، رەنگە ئەڤ پێنگاڤ ل پشت پەردێ بێنە كرن و دڤێت جڤاكێ ئێزدی لسەر هەر جۆرە پێكهاتنەكێ هشیار بت هەتا كو یاسا سەروەر بت و رۆلێ خۆ ببینت و ئەو كەسێن دەست دجینۆسایدێ دا هەی بگەهنە سزایێ خۆ یێ عادیلانە،ل شەڤا(2_3/8/2014)ێ رێكخراوا تیرۆرستی یا داعش و ئەرەبێن هەڤسنوور لگەل شنگال دا هێرشی قەزا شنگال كرن و تاوانێن دژی مرۆڤایەتیێ دەرهەقێ خەلكێ وێ ب تایبەت كوردێن ئێزدی دا ئەنجام دان كو ب سەدان كوشتن و ب هەزاران كچ و ژن و زارۆك و زەلام گرتن و ب هەزاران خەلك دەربەدەر و ئاوارە و كۆچبەربوون و شنگال تالان و وێرانكرن،پشتی رزگاركرنا شنگال چەندین گۆڕێن بكۆم یێن ئێزدیان هاتینە دیتن و هێشتا پتر ژ سێ هەزار كەسێن ئێزدی چارەنڤیسێ وان دیارنینە و ب هەزاران ژ خەلكێ شنگال نەڤەگەریایە سەر جی و مالێن خۆ و ل كەمپان ل سنوورێ پارێزگەها دهۆكێ و چەند دەڤەرێن دی یێن هەرێما كوردستانێ ژیانا خۆ دبەنە سەری،وەك بەرپرس و خەلكێ شنگال ئاشكەراكرین كو ئەرەبێن ل گوندێن دەوربەری شنگال دەست دجینۆسایدێ دا هەیە،لگەل ڤێ هەموویێ هندەك ئەرەب یێن ڤەگەریاین و بزاڤ یێ دئێنە كرن یێن دی ژی ب زڤرنە سەر گوندێن خۆڤە كو دبنەرەت دا تاوان دژی ئێزدیان ئەنجام داینە و خیانەت ل شنگالیان كرینە و ماوەیەكە بەحس یێ دئێتە كرن كو پێكهاتن دناڤبەرا ئەرەبان و ئێزدیان بێتە كرن ئەڤ پێنگاڤە مەحالە بێتە كرن هەتا ئەو كەسێن تاوان كرین دڤێت بگەهنە سزایێ خۆ و بێنە دادگەهكرن،هەروەسان بۆ ڤێ پێكهاتنێ دڤێت ئێزدی هشیار بن و نەئێنە خاپاندن،چنكو هێشتا نە دەمێ چوو پێكهاتنایە لڤی دەمێ هەستیار بێنە كرن چنكو جینۆساید یا بەردەوامە و ئێزدیان باوەری ب ئەرەبان نینە،ئەگەر هاتوو ل داهاتی هەر جۆرە پێكهاتنەك هات كرن ل دەستپێكێ دڤێت رایا گشتی یا خەلكێ شنگالێ و هەموو ئێزدیان لبەر چاڤ بێتە وەرگرتن،هەروەسا هەتا ئەڤ پێكهاتن هەبت دڤێت یاسا بێتە بجهئینان و ئەو ئەرەبێن گوندێن دەوربەرێن شنگال یێن تاوان كرین بێنە دەستەسەركرن و دادگەهكرن و خەلكێ شنگالێ بێتە قەرەبووكرن و گەرەنتی هەبت،پاشی روونشتنێن جڤاكی دەست پێ بكن بۆ ئاشتیێ،ئێزدی مللەتەكی ئاشتیخوازن و هەردەم ئاشتیێ و پێكڤەژیانێ دخوازن،لێ ئیرۆ ب شێوەیەكی گشتی جادا ئێزدی دژی ڤێ پێكهاتنێ یە و نابت هیچ لایەكی ناڤخۆیی یان دەرەكی جۆرە فشارەكی بێختە سەر ئێزدیان كو پێكهاتنێ بێ مەرج و گەرەنتی بكن،لەورا لسەر هەموو جیێن شۆلەژێ یێن ئێزدیان و ب تایبەت یێن شنگالێ هشیاری هەر پلانەكێ ببن و خودان هەلویستەكی ئێكگرتی بن و مافێن قوربانیان و خەلكێ شنگالێ ب یاسایێ بدەستڤەبینن.
تُتاح هذه الصورة أيضا في: کوردی
