شنگال بەرەف چارەنڤیسەكێ نەدیار
ناسر شەهوانی
جینۆسایدا ئێزدیان ل دەڤەرا شنگالێ ل(3/8/2014)ێ یا ژلایێ گرۆپا تیرۆرستیا داعش ڤە وب هاریكاریا خەلكێ دەڤەرێ بسەر مللەتێ ئێزدی دا هاتی و ژ ئەنجامێ وێ ب هەزاران كەس ژ زارۆك و كچ وژن وپیر بوونە قوربانی وب هەزاران هاتنە گرتن،هەتا نهۆ كچێن ئێزدیان ل بازاران تێنە فرۆتن ب نرخەكی گەلەك ئەرزان وهەتا نهۆ ئەڤ كۆمكوژی یا بەردەوامە وب هەزاران گرتی ل دەستێ وان هۆڤان دا ماینە وچارەنڤیسێ وان دیار نینە.
هەر ژ رۆژا كۆمكوژیێ و هەتا نهۆ جڤاكێ نێڤ دەولەتی بەرامبەر ڤێ جینۆسایدێ یا بێ دەنگە و ل بیرەوەریا چارێ یا كۆمكوژیا ئێزدیێن شنگالێ دڤێت ل بیرا خەلكێ دنیایێ هەموویێ بینن ئەڤ كۆمكوژیا وەسا یا مەزن كو بسەرێ ڤی مللەتی هاتی چ جارا و چ جارا نائێتە ژ بیركرن،خەلكێ مە ژی ب تایبەتی ل كەمپا دا سەرەرای ئێش وئازارێن وان یێن رۆژانە دبەرهەڤن،ل بیرەوەریا چارێ دا پرسیارا كو بێتە گۆتن ئەوە چ گهۆرین هاتە روودان ل دەمێ ڤان هەر چار سالان دا لناڤ جڤاكا ئێزدی دا ب شێوەیەكی گشتی ودەڤەرا شنگالێ ب تایبەتی وەكو جیێ سەرەكیێ كۆمكوژیێ ؟؟،ب راستی چ گهۆرینێن باش ل رەوشا دەڤەرا شنگال ب تایبەتی پەیدانەبووینە و رەوش بەرەف خرابیێ دچت بۆ نموونە هەتا نهۆ نێزیكی(360000) مرۆڤێ ئێزدی ژ دەڤەرین خۆ كۆچبەر بوویە وپتریا وان هەتا نهۆ دناڤ خیڤەتان دا ژیانا خۆ ب خرابی ب رێڤەدبەن وئێش وئازارێن وان رۆژانە دبەردەوامن ژنەبوونا خزمەتكاریا ونەبوونا كارەبێ وئاڤێ وپاشڤەچۆنا رێكخراوێن نەحكومی ژ پێشكێشكرنا خزمەتكاریا بۆ خەلكێ كەمپا وخەلكێ مە پشتگوه ڤە هاتیە هاڤێتن،سەبارەت دەڤەرا شنگالێ چ گهۆرینێن باش تێدا پەیدانەبووینە كو جیێ سەرەكیێ كۆمكوژیێ بوو،ژنەبوونا ئەمن وئاساییش وئارامیێ ل دەڤەرێ وكێمبوونا خزمەتكاریا ونەبوونا باوەریێ ژلایێ خەلكێ مە ڤە ب حكومەتا عێراقێ وخەلكێ دەوروبەرێ دەڤەرێ و ژلایێ ژیرخانا ئابووری ڤە هیچ گهۆرینەك نەهاتیە كرن وهەتا نهۆ شنگال كاڤلەك خرابوویە وكەسێ گوهێ خو نەدایێ وچ تشت لێ نەهاتینە ئاڤاكرن وژیان تێدا نابت،هەتا نهۆ گوندێن باشوورێ شنگالێ ژ مین وتەقەمەنیا نەهاتینە پاقژكرن وهەر جار كەسەكی بێ گونەه ژ ئەگەرێ پەقینا مینا ژیانا خۆ ژ دەست ددەت وقوربانی دبەردەوامن.
ل ڤێدەرێ ئەركێ حكومەتێ ب تایبەتی حكومەتا عێراقێ بەرامبەر ڤێ خەلكێ چیە وچاوا دبێژن ئەم دێ خەلكێ ڤەگەرینە جیێن وان بسەر ڤان كێماسیا هەموكێ دا ؟،ب راستی خەلكێ مە گەهشتە وێ باوەریێ كو دەڤەرا شنگال نهۆ بوویە جیێ ململانا سیاسی دناڤبەرا هێز وحزب وپارتێن دەڤەرێ وكەس گوهێ خۆ نادەتە خەلكێ شنگالێ وهەر گرۆپەكی ژ وان لدوڤ بەرژەوەندیێن خۆ دگەرت،ل ڤێدەرێ‌َ پرسیار ئەوە كو هەتا كەنگی خەلكێ مە دێ ئاوارە و كۆچبەر بت وژیانا خۆ دێ ل دەرڤەی دەڤەرا خۆ دەرباز بكە؟ وهەتا كەنگی چارە نڤیسی خەلكێ مە وێ نە دیار بت.
تُتاح هذه الصورة أيضا في: کوردی
