سیاسەت و روتین
جوان بەرواری 
د دووبەرەكیا حزب و سیاسەتا هەی دە، چەندین نێرین و تێبینێن گرنگ دئێنە ئازراندن،لەورا ئەگەر لسەر پرسێن رۆژەڤێ ب سەكنین، دێ بینین كو د دەرگۆشا دور هێلێ سیاسی دە، پێویستا مە ب چەند راستی و پرسان هەیە هەتا كو بكارین سیاسەتەكا تەندروست د ناخ و ئەقلێ گەل و جڤاكی دە ئاڤا بكەین.
چاخێ كو تەڤگەرێن كوردی بەرێ خودانێ بۆ حكوم و تێگەهێن سەرهلدانا دیرۆكی دكن، ل وی دەمی هەر تشت ل ژێر ناڤێ دووبەرەكی و حیزبی دئێت تەڤلیهەڤكرن،بنێرە لسەر دەمێن كەڤن دە، تەڤگەرێن كوردی هێزو ئەقلێ خۆ رادەستی ئەدەبیات، شۆرەش، گۆتن و هۆنەردۆستیا ئەرەب، تورك و فارسان دكر،هەتا نهۆ ژی ب هەمان میتۆدێ كورد سەرەدەریێ دگەل دووبارەبوونا تراژیدیێن خۆ دكن،لەورا كورد هەردەم بووینە خوسارەتێن ئێكی لسەر ئاخ و سەروەتێ خۆ،لەورا هەر كریارەكا ئەم درۆژەڤێ دا ئەنجام ددەین،ئەڤە دئێتە وێ واتەیێ كو ئێك ژ فاكتەرێن سیاسەتێ روتینی یە،ئانكو ئەم دبێژینێ دووبارەبوون، ئەڤجا دحكومێ ڤێ دووبارەبوونێ دە، پێویستە، ئەم هندەك پرەنسیپ و گهۆرینان پەیدابكەین.
د رۆژئاڤایێ دە، هەرتشتێ هاتیە ئەنجام دان لسەر تێگەه و سەرهلدانا ئەقل، شۆرەش و میتودێن هزری بوویە،لەورا ژی نەتەوەبوون، زانست، هێز و بەرخودانان جیێ خۆگرتن،هەتا فەیلەسۆف و زانایێن كەڤن ژی، بەحسا دیرۆك، دیمكراسیەت و سیاسەتا رۆژئاڤاكرینە، نیتشە ئێك ژ فەیلەسۆڤان بوو دبێژت:(رەخنە درێیا میتا فیزیكیا رۆژئاڤایێ دە، هەموو دەمان زیندانیێ دوجەمسەران بوو د هزرا فەلسەفە و زانستی دە كو وان بخۆ دروستكرن و دزانیی راستیێ دە یێت هەین،بەلێ هزرا میتافیزیكی چ جاران نەدكاری خۆ ژ وێ بەنداتیێ و زایندانێ رزگاربكت)،واتە هێزا رۆژئاڤا یا هزری و زمانی دكارت پێشوازیا هەر تشتێ بكت و روتینێ ب شێوەكێ ئەكادیمی چارەسەربكت،پاشان لدووڤ ستاندەرت و گونجاندنا دۆخێ راستیا پێشبینكری ژینگەهەكا لێكدایی و ئارام د وێ روتینێ دە پەیدا دكت،نموونە:_ دەمێ ئەم هزر د دسپلینا ئەرینی دە دكەین، پێویستە رژد و بەردەوام بین دسەپاندنا پێشبینیێن خۆ دە داكو بكارین وێ رەفتارا نەخواستی راستڤەكەین و ئەگەر یا پێتڤی بوو،ب تنێ سزایێن دروست و گونجای بكاربینن داكو خۆ ژ روتینا دۆمدرێژ بپارێزین،واتە ب هزرا من، ئەو نیشتمان و نەتەوەیا بكارت هێز و ئەكتیڤیا خۆ ژ ئالیەكی وەربگرت، ئەو چ جاران نكارت ببتە تەڤگەرەك پیڤای بۆ ئەرك و بەرژەوەندا مللەتێ خۆ، چنكو تەڤگەرێن بیانی مینا تەڤگەرا ئەرەب جیێ كو ئەقلێن چاندی ئاڤا بكت، ئەقلێن ڤالا ئاڤاكرن،لەورا هەرتشتێ بوویە ئەگەر كو باندۆر ل تەندروستی، ساخلەمی و دەروونا ئەقلێ كوردی ببت،كورد بخۆ بووینە پاشان دەولەتێن سەردەست،چنكو كوردان دیرۆكا خۆ ب شێوەكی زاتی و تەندروستی نەخواندیە، بەلكو لگۆر هێزا بەرژەوەند و فەرهەنگا فەودالی و قەبیلاتیێ دە خۆ قانع كریە.
ل داویێ دبێژم:مرۆڤێن زانا و هزرمەند هەردەم كارینە رەوشا وەلاتێ خۆ ئاڤا و چارەسەر بكن، بەلێ بۆچی مرۆڤێن نۆرمال نكاریە ببنە بالادەست بۆ ئاڤاكرن و چارەسەركرنا رەوشا خۆ؟ ئەڤە ژی مە رادەستی پرس و هزرێن ڤەكری دكت،دئەینی دەمی دە كوردان ژی قەد جارەكێ هزر دئاڤاكرنا پرۆژەیەكێ خۆزاروی و نەتەوەیی دە نەكریە،ژبەر ڤێ ژی هەتا داوی قۆناغ ژی كەفتینە ل بن گەف و توندییا ئالیێن سەردەست دوژمنێن زلهێزدە.
تُتاح هذه الصورة أيضا في: کوردی
