خەلكێ دەڤەرا شنگالێ د رەوشەكا خراب را دەرباز دبن ؟؟؟
خالد خدر 
پشتی نەكسا مەزن یا رۆژا(16/10/2017 )وئەو روودانێن دلتەزینێن لپێ خۆ ئانین ب تایبەتی داگیركرنا كەركووكێ و دەڤەرێن دی یێن كوردستانی ژئالییێ هێزێن تائیفەگەریێن حەشدا شەعبی ڤە ،ودەڤەرا شنگالێ ژی ئیك ژوان دەڤەران بوو كو پتریا هەرە پتر ژ روونشتڤانێن وێ پێكهاتییە ژ ئێزدیان ،ژ ئەنجامێ وێ هێرشا درندەیا حەشدا شەعبی لسەر دەڤەرێن كودستانی یێن ژدەرڤەی ئیدارا هەرێما كوردستانێ زیانەكا مەزن گەهشتە جڤاكێ كوردستانی ب شێوەكی گشتی و یێ ئێزدی ب تایبەتی كو دیسان وەك جارێن بەرێ ئێزدی ژی بوونە قووربانییا وان پیلان و نەخشەیێن چەپەل یێن حەشدا شەعبی.
كو ئەو زڤرینە رۆژانێن سەردەمێ رژێما بەعس،ئانكو دەڤەرا شنگالێ هاتە دابڕین ژ كوردستانێ و لالشا نوورانی و هەروەسا نهۆ كێمترین پێتڤیێن ژیانێ نائێنە دابینكرن ل دەڤەرا شنگالێ ژبەركو رێیا دهۆك شنگال هاتیە گرتن و ژئالییەكێ دی ڤە مووسل هێشتا یە خرابەیە ، سەرەرای نەبوونا خزمەتگۆزاریێن گشتی وكارەب و ئاڤا ڤەخوارنێ و نەبوونا پێتڤیێن تەندروستی و ساخلەمی و كێمییا كادرێ ساخلەمییێ ل دەڤەرێ ، هەروەسا نە دابەشكرنا كەلوپەلێن خوارنێ كو بەریا هاتنا حەشدا شەعبی دەزگایێ خێرخوازیێ بارزانی ب ڤی ئەركی هەموویێ رادبوو و پترییا ڤان ئاریشا چارەسەر دكر ب تایبەتی دابەشكرنا كەلوپەلێن خوارنێ و سۆتەمەنییێ لسەر خەلكێ شنگالێ ، ژبلی پێشكێش كرنا خزمەتگۆزاریێن دی یێن جۆراوجۆر ، جیێ داخێ یە ئەڤ چەندە هەموو نەمایە پشتی هێرشا حەشدا شەعبی لسەر دەڤەرا شنگالێ ، خەلكێ دەڤەرا شنگالێ د رەوشەكا زۆر خراب را دەرباز دبن و گەلەك دتەنگاڤن و دنالن ژ رەفتارێن چەكدارێن حەشدا شەعبێ ، ژئالییێ ئەمنی وسیاسی ڤە زۆر ئاستەنگ هەنە ، و تشتێ هەری سەرنج راكێش و مەترسیدار ل دەڤەرا شنگالێ نهۆ دیسا ئەو كەسێن هاریكاری و دەست كیسی دگەل داعش كرین ل هێرشا وان یا تەباخا سالا 2014 لسەر دەڤەرا شنگالێ دیسا دزڤرنەڤە دەڤەرێ ب هاریكاری و پیرۆزباهییا حەشدا شەعبی كو پتریا وان كەسان ئەو بوون یێن بەشداری كرین راستەوخۆ یان نە راستەوخۆ دتاوانێن ل دژی ئێزدیان ب تایبەتی ل رەڤاندنا كچ و ژنان دا ، ژبلی تالانكرنا ملك وسامانێ ئێزدیان و خرابكرن و تێنتیكرنا خانیێن وان ، مخابنی دیسا ئەو تاوانبارێن تیرۆرست ب ئارامی زڤرینەڤە دەڤەرێ لبن سیبەرا حەشدا شەعبی ،هەروەسا بابەتەكێ دیتر یێ زۆر ب مەترسیدار و گەفدار لسەر جڤاكێ ئێزدی ئەو ژی تەعریبكرنا شنگالێ ب رێیا شیعەگەرییێ (التشیع) كو بەریا چەند رۆژان مەزارگەهەكێ بچووك یێ شیعەیێن شنگالێ یێن كو بەری یا نهۆ هاتین خۆ ب ئێزدیان گرتین ل شنگالێ ژ ئالییێ حەشدێ ڤە هاتیە نووژەنكرن وبەرفرەهكرن و قەبارەكی گەلەك گرنگ و مەزن ژێرا دروست كرینە لبن ناڤێ شیعەگەرییێ و سەپاندنا وێ لسەر خەلكێ دەڤەرا شنگالێ ، ژبلی كارێ سیاسی و لەشكەری كارێ مەزهەبی ژی تێتە كرن ل وان دەڤەرێن هاتیە داگیركرن ژئالییێ حەشدا شەعبی ڤە ، نموونە ژی ل شنگالێ كار تێتە كرن ژبۆ بەربەلاڤكرنا تەشیعێ ، نەخاسمە كو بەریا نهۆ ژی رێژەكا شیعە مەزهەبا ل شنگالێ دژیان وەكو مە ئاماژە پێدایی هاتبوون وخۆ ب ئێزدیان گرتبوون و بخۆ مەزارگەهەك ژی چێكرینە.
هیڤی خوازین كو بزوترین دەم شنگال بێتە رزگاركرن لبن دەستێ حەشدا شەعبی،چنكو هندەك كار وكریارێن ترسناك تێنە ئەنجام دان ل پاشەرۆژێ دێ د وێرانكاربن لسەر جڤاكێ ئێزدیان.
تُتاح هذه الصورة أيضا في: کوردی
