حه‌لاوا مووسلێ؟!
كۆڤان حسێن
مووسل ئه‌و ده‌ڤه‌ره یان ئه‌و باژێرێ ژ هه‌می باژێن دی یێن ڤێ ده‌ڤه‌رێ ناڤێ وی د ناڤ مێژویێ دا هاتی و وه‌ك مه‌یدانه‌كا ململانا (ئه‌نتی) و سیاسی، مووسلێ بۆ كوردستانێ د ڤێ قووناغێ دا ره‌هندێ ئه‌منی و ئابووری یه، مووسلێ پتر ژ (بابه‌كی) هه‌یه، تا نوكه توركیا ب ویلایه‌كا خوه دزانیت، كوردستان پڕانیا مووسلێ ب ره‌هندێ خوه یێ ستراتیژی دزانیت، قورتالبوونا ڤی باژێری ژ ده‌ستێ داعشێ پرسێن ئالۆزێن ڤێ ده‌ڤه‌رێ ب دووماهیك نائێن، كوردێن ئێزدی و مه‌سیحیێن ده‌ڤه‌رێ و شه‌به‌ك و كاكه‌یی د په‌راوێزا ڤی باژێری دا دژین و نوكه ل سه‌ر ناسناما سیاسیا ڤان (ئه‌نتیا) مشت و مره‌كا دژوار هه‌یه.
ئه‌رێ ده‌شتا مووسلێ وه‌لاتێ (كوردێن ئێزدی و شه‌به‌ك و مه‌سیحی و كاكه‌یان) كوردستانه یان نه؟! ئه‌رێ كوردستانێ پرۆژه‌كێ ئاماده بۆ ڤان ده‌ڤه‌را و شنگالێ هه‌یه یان نه؟! چه‌ند بۆ كوردستانێ ئاسانه ده‌ست ژ ڤێ ده‌ڤه‌رێ به‌رده‌ت؟َ! خه‌لكێ ڤێ ده‌ڤه‌رێ ل ڤێ قووناغێ پێدڤیه هه‌لویسته‌كێ زه‌لال هه‌بیت مه‌یلا وان بۆ كوردستانێ یه یان عیراقێ؟، پشتی كه‌ركووكێ مووسل ئالۆزترین پارێزگه‌ها عیراقێ یه ب زه‌نگینیا خوه ژ ئالیێ (ئه‌نتی)ڤه، مووسلێ ئاشكرا بێژین بۆ كوردستانێ گرنگه ژ هه‌می ئالیان ڤه، ده‌رباره‌ی خه‌لكێ ڤێ ده‌ڤه‌رێ كو سه‌رئه‌نجام رایا وان گرنگه كا كوردستانه یان نه؟، لێ كوردستان دڤیا ب ئاسانی ده‌ست به‌رداری ڤێ ده‌ڤه‌رێ نه‌بیت نه‌مازه كوردان هیچ جاره‌كێ داخوازا باژێرێ مووسلێ نه‌كریه كو كوردستانه، لێ ب درێژیا خه‌باتا سیاسی یا كوردی داخوازا مافێ شه‌به‌ك و ئێزدی و مه‌سیحیێن ڤێ ده‌ڤه‌رێ كریه و خاله‌كا بنگه‌هینا خه‌باتا سیاسی و چه‌كداریا كوردستانێ بوویه، فه‌ره كوردستانێ پرۆژه‌كێ موكم هه‌بیت هه‌تا ئه‌م ده‌شتا مووسلێ وه‌ك ره‌هه‌نده‌كێ ستراتیژیێ كوردستانێ و به‌شه‌ك ژ ڤه‌رێژا جوگرافیا كوردستانێ ژ ده‌ست نه‌ده‌ین، نوكه زۆر ده‌لیڤه هه‌نه كوردێن ئێزدی و مه‌سیحیێن مووسلێ ژ كوردستانێ جودا كه‌ن، زۆر پرۆژه هه‌نه بۆ ڤێ مه‌ره‌مێ، لێ تشتێ هندا د ڤی واری دا پرۆژێ كوردستانێ ب خوه‌یه، ئه‌رێ كوردستانێ دڤێت ڤێ ده‌ڤه‌رێ ژده‌ست نه‌ده‌ت؟، ئه‌رێ زه‌نگینیا ڤێ ده‌ڤه‌رێ ژ ئالیێ ئاینی و نه‌ته‌وه‌ی ڤه و پاشی ژ ئالیێ ئابووری و جوگرافی ڤه بۆ كوردستانێ چه‌ند گرنگه؟، وه‌ك دیار مادێ 140 ناهێته بجهكرن، ئه‌رێ ئه‌لترناتیڤا كوردستانێ بۆ ده‌شتا مووسلی و شنگالێ چی یه؟، كه‌نگی وه‌خته كوردستانێ دگه‌ل هێزێن جڤاكی و كه‌سایه‌تیێن ره‌وشه‌نبری و سیاسی و عه‌شائیرێن ڤێ ده‌ڤه‌رێ ئاشكرا بریاره‌كا سه‌روه‌ختا نوكه بده‌ن، ئه‌رێ ژبلی ڤێ كوردستان حازره ڤێ ده‌ڤه‌رێ ژ ده‌ست بده‌ت ؟!
تُتاح هذه الصورة أيضا في: کوردی
