مووسل ژ تەڤنەكا نەتەوان ومەزهەبان پێكهاتیە
خالد خدر 
دئێتە چاڤەرێكرن كو ل دەمەكی نێزیك شەرێ ئازادكرنا پارێزگەها مووسلێ دێ دەستپێكەت ، ئەو پارێزگەها دووێ یە لسەر ئاستێ عێراقێ ،تیتە زانین كو ئەڤە پتر ژ دووسالایە ئەو باژێرە لبن كۆنترۆل و داگیركرنا چەكدارێن رێخراوا تیرۆرستییا داعش ڤەیە ، هۆسا دئێتە زانین كو ئامادەكارییەكا باش هاتیە كرن ژبۆ ڤی شەری ،ژلایێ حكومەتا عیراقا فیدرال ڤە وب هەماهەنگی دگەل هێزێن هەڤپەیمانیا نێڤ دەولەتی ب سەركردایەتیا وەلاتێن ئێكگرتیێن ئەمریكی.
ل دەڤەرێن سەر ب پارێزگەها مووسلێ ڤە تاوانێت مەزن هاتنە كرن ژلایێ تیرۆرستێن داعشێ ڤە ل دژی پێكهاتەیێن وێ دەڤەرێ ب تایبەتی ل دژی ئێزدیان و توركمانێن شیعە مەزهەب ل تلەعفەرێ ،ومووسل ژ تەڤنەكا نەتەوان ومەزهەبان پێكهاتیە :وەك عەرەب،كورد،توركمان ،شەبەك و ژلایێ مەزهەبی ڤە سوننە، شیعە ،ئێزدی ،مەسیحی،ژبەر ڤێ چەندێ شەرێ ئازادكرنا مووسلێ دێ گەلەك یێ ئالۆز و سەخت بیت ، نەخاسمە كو ئاریشەكا دی سەرهلدایە دڤێ دەربارەیێ دا ئەوژی ئاریشا هەبوونا هێزەكا لەشكەرێ توركی لدەڤەرا باشیكێ ل نێزیك دەوروبەرێ مووسلێ ، ئەڤ چەندە بوویە جهێ نیگەرانی و نەرازیبوونا حكومەتا عێراقا فیدرال ود ئەنجام دا ناكۆكی ئێخستینە دناڤبەراعێراقێ و توركیا وگەلەك جاران لایەنێ عێراقی دلگرانیا خۆ ئانینە زمان ژ لایێ بەرپرسێن خۆ بتایبەتی سەرۆكێ جڤاتا وەزیرێن عێراقا فیدرال حیدر عەبادی ل چەندین هەلكەفتان دا هەبوونا وان هێزێن توركی لسەر ئاخا عێراقێ ب داگیركەر ل قەلەم داینە ، كو ئەو كارە پێشلكرنا سەروەریا ئاخا عێراقێ یە.
بێگومان لایەنێ توركی ژی ل بەرامبەر ڤێ چەندا هەنێ بێدەنگ نەبوویە كو كاربدەستێن كۆماراتوركی هەبوونا هێزێن خۆ لسەر ئاخا عێراقێ و ب تایبەتی ل رەخێ پارێزگەها مووسل ب كارەكی رەوا دبینن ، هەلبەت ئەڤێ چەندێ ژی هژمارەكا ئەگەران هەیە ژوان ( 1- توركیا نیاز و تەماكاری هەنە ل عێراقێ ب تایبەتی ل مووسل وكەركوكێ ژبەر دەولەمند بوونا هەردووان ب پترۆلێ. 2- توركیا هەتا نهۆ چاڤێ وێ ل دووبارە زڤراندنا ویلایەتا مووسلێ یە كو ل سەر دەمێ ئیمپراتۆرییەتا ئۆسمانی ویلایەتەك بوو ژ ویلایەتێن وێ و هێشتا خەونان ب وێ ڤە دبینت .3- هەبوونا رێژەكا بەرچاڤ ژ توركمانێن سوننە مەزهەب ل قەزا تلەعفەر یا سەرب پارێزگەها مووسلێ ڤە وب بەهانەیا پاراستنا وان وهەروەسا پاراستنا سوننەیێن دی ل مووسلێ )، و سەرۆكێ كۆمارا توركی رەجەب تەییب ئەردۆگان دەربارەی ڤێ چەندێ ب راشكاوی گۆت كو ئەو دێ ب هەموو كارینێت خۆ سوننەیێن توركمان و عەرەب ل پارێزگەها مووسلێ پارێزن،ل ڤێدەرێ پسیارەك ؟ دئێتە پێش گەلۆ ئەردۆگان دێ سوننەیان ژ كێ پارێزت ! ، ئەو ئانكو ئەردۆگان باش دزانیت كو سوننەیان ب تایبەتی توركمانێن سوننە پێشوازیەكا گەرم ل چەكدارێن رێكخراوا داعش كرن و پتریا ئەمیرێن داعش توركمان بوون و نە ئەڤە بتنێ بەلكو زۆربەیا زۆرا وان كار وكریارێن پیس و چەپەل و تیرۆرستی هاتینە ئەنجامدان ژلایێ داعش ڤە ل دژی خەلكێ بێگونەه ب تایبەتی ل دژی شیعەیان و ئێزدیان و مەسیحیان ، بگرە ژ كوشتن و رەڤاندنا ژن وكچ وزارۆكان و هەتا داویێ،ژلایەكێ دیڤە توركیا دڤێت بخۆ پێگەهەكی چێكەت ل عێراقێ ب ڤان هەموو بەهانەیان ، كو هەر لایەنەكی دڤێت ناسناڤێ ژناڤبرنا داعشێ بخۆ هەلگرت ، كو ئەڤ چەندە یا گرێدایی شەرێ ئازادكرنا مووسلێ یە و دێ ئێتە ئێك لایكرن.
تُتاح هذه الصورة أيضا في: کوردی
