كۆچبه‌ریا ئێزدیان هوكار و چاره‌سه‌ری
فه‌همى بابێ رۆژانێ
مخابن كۆچبه‌ریا ئێزدیان ژ به‌ر زۆر ئه‌گه‌ران و رۆژانه یا به‌رده‌وامه و ب رێكێن مه‌ترسیدار و پاره‌كێ زۆر مال و ملك و وه‌لاتێ خوه دهێلن و به‌رێ خوه دده‌نه حه‌لیانێ و كولانێن ئورۆپا و پشتا خوه دده‌نه كولتۆر و وه‌لات و ئاخ و پیرۆزیێن خوه هه‌ر وه‌كی دوژمنێ ل په‌ی وان و ل وی بابێ وی بۆ خوه رێكه‌ك دیت و خوه هاڤێت گه‌لو بۆچی؟؟ راسته كاره‌ساتا جینۆسایدێ ل شنگالێ روو دا و باوه‌ریا ئێزدیان ب ئارامی و ته‌ناهیا وه‌لاتێ خوه نه‌مایه و ب هزاران كج و ژن و زارۆك هاتنه گرتن و كوشتن و فرۆتن ل بازارێن عه‌ره‌بان و هه‌تا نها ئه‌ڤ كریاره یا به‌رده‌وامه.
هه‌تا گه‌هشتیه وێ رادێ مرۆڤ رهێن خوه ژ وه‌لاتێ خوه و جهێ باب و كالێن خوه هلقینه و به‌رێ خوه بده‌ته هانده‌ران! خه‌لك هه‌كه خوه ب خودان وه‌لات بزانیت دڤێت به‌ره‌ڤانیێ ژێ بكه‌ن نه‌ك بهێلن و بچنه كولانێن خه‌لكی و د ناڤ فه‌رهه‌نگا ئورۆپا دا بێنه حه‌لاندن و چ به‌هانه نینن و مرۆڤی پالده‌ن بۆ هێلانا وه‌لاتێ باب و كالان و هه‌كه هنده‌ك هوكار هه‌بن ب دیتنا من نابنه ئه‌گه‌ر مرۆڤ وه‌لاتێ خوه بهێلیت و به‌رێ خوه بده‌ته رێكا حه‌لیانێ و نه‌مانێ، چونكو ب دیتنا من ئه‌و ژی فه‌رمانه‌كا خوه‌دله مخابن نه‌مانا ئێزدیان یا تێدا و هه‌كه ئه‌م بێینه هنده‌ك هوكارێن دكه‌نه گرۆڤه وه‌كی نه‌بوونا دادپه‌روه‌ریێ و نه‌بوونا چاره‌سه‌ریا ژبۆ ئاریشێن ئێزدیان و نه‌بوونا وان د ناڤ رێزێن پارت و لایه‌نێن كوردستانێ و حكوومه‌تا هه‌رێمێ دا ل گۆر رێژا وان و بتایبه‌ت د جهێ بریارێ دا و نوونه‌راتیا وان وه‌ك پێدڤی نینه د دام و ده‌زگه‌هێن حزبی و حكوومی دا كو ئه‌و ژی خوه ببینن د چارچوڤێن كوردستانێ دا وه‌كو وه‌لاتیێ پله ئێك و پشتا خوه پێ گرێ دده‌ت و هیڤی و ئومێد بۆ وان چێ ببیت د وه‌لاتێ وان دا.
به‌لێ هه‌كه ئه‌ڤ هه‌ستكرنا وان راست بیت هه‌ر نابیته هوكار بۆ هێلانا وه‌لاتێ خوه چونكی ئه‌ون خودانێ ڤی وه‌لاتی به‌ری بوونا حه‌زره‌تێ مه‌سیح ب هزاران سالان و هه‌می شوونوارێن هه‌رچار پارچێن كوردستانێ ڤێ چه‌ندێ دچه‌سپینن. هه‌كه ئه‌م دیرۆكا ملله‌تان دخوینین دیار دبیت خه‌لك خوه دكه‌ته گوری وه‌لاتێ خوه و ل سه‌ر ئاخا خوه و ب خوینا خوه به‌ره‌ڤانیێ دكه‌ن نه‌ك بره‌ڤن و پشتا خوه بده‌نه وه‌لات و دۆز و دیرۆكا خوه و بچن بحه‌لیێن د ناڤ ئورۆپا دا و ب دیتنا مه دڤێت هه‌می پارت و لایه‌ن و ب تایبه‌ت حكوومه‌تا هه‌رێمێ ب چاڤه‌كێ مه‌زنتر به‌رێ خوه بده‌نه ڤی ملله‌تێ ره‌سه‌ن و جهێ وی ل گۆر رێژا وان د هه‌می دام و ده‌زگه‌هێن حزبی و حكوومی دا بده‌نێ، چونكی باشتر خوه د چارچوڤێ وه‌لاتی دا ببینن و باوه‌ریا وان موكم ببیت ب وه‌لات و دۆز و دیرۆكا وان بێت و ئێدی نه‌چنه ده‌رڤه‌ی وه‌لاتی هه‌ر چه‌نده كه‌س نینه هنده‌ك ژمالا وان نه‌چووین، لێ ب هیڤیا كێمكرنا كۆچبه‌ریێ و مانا ل وه‌لاتێ خوه ب سه‌ر بلندی و سه‌رفه‌رازی وه‌كو وه‌لاتیێ پله ئێك و وه‌ك هه‌ڤ دگه‌ل ئول و نه‌ته‌وێن دی.
ئه‌ڤ گۆتار ل مالپه‌رێ ئه‌ڤرۆ نيوز،ل 12/10/2016 به‌لاڤ بوويه.
تُتاح هذه الصورة أيضا في: کوردی
