بەلێ ئەم دلخۆشین ب سەركەفتنا ئیرادا گەلێ توركی بەرامبەر ئینقلاپچیان
مەهدی حەسەن موراد 
خۆڕاگری وبەرخودانا گەلێ توركی بەرامبەر كودەتا كەمالیزمی و تێشكێن فتحوڵە گوڵن ولەشكەرێ فاشیست, هەمی گەلێن ئاشتیخواز ل جیهانێ دلخۆش كرینە نە هەر گەلێ كورد وپارتی بتنێ,ئەڤێن ئەڤ هەوڵە كودەتا مەترسیدار داین خودانێن عەقلیەتەكا توند ڕەو وكەڤنەپەرست بوون ,دخاستن درێژەدانێ ب دەسهەلاتداریا باپیرێن خۆ ئەتاتورك وزۆڕداریا لەشكەرتاریەتا توركی بدەن,كو مەبەستا وان ب دارێ زۆرێ حوكمی بكەن وئەو ئالۆگۆڕێن هاتینە كرن.
ڤان ساڵێن دوماهیكێ لسەر دەستێ ئەردۆغانی وپارتا داد وگەشەپێدان ڕێگریێ لێ بگرن , د خەون و خەیالێن مەزناتیا خۆ دا بژین ,بەلێ بەروڤاژی ئیرادا گەلێ توركی مەزنتر و خورتر بو ژ پیلانێن وان وئەڤ رێكا كودەتا كو بەری نها ژی چەندین جارا ئەنجامدایی و دەستێ خۆ دانایە سەر كورسیكا دەسهەلاتداریێ وشەرعیەت بن دەست كرین, ڤێ جارێ گەلێ توركی ڕێك ل وان دائێخست و ئەو هێلا بەرەڤانیا ئەتاتوركی هاتە شكاندن وژناڤ برن و كەلتۆرێ سیاسی یێ سەد ساڵان وفەرهەنگا ئەتاتورك بن ئاخ بو .وئێدی گەلێ توركی جارەكا دی ژ عەسكەرێ فاشیست ناترسیت,ئەڤرۆكە لەشكەر یێ ب دەستێ خەلكێ سڤیل د هێتە قوتان وئیهانەكرن ئەڤە ژی سەرسورمانەكا جیهانی یە ئەڤ لەشكەرێ ئەڤ هەیبەت هەیی شەرمەزار بیت دەرهەقێ زۆڵم وزۆرداریا كری بەرامبەری هەمی پێكهاتێن ئاینی و نەتەوەیی وئەسەنی, لەوما ئەم دلخۆش بینە ژبەر كو مە ژی وەك گەلێ كورد گەلەك سەربۆر یێن هەین دگەل لەشكەرێ توركی ودەسهەلاتداریا وان ل ڤان سەد ساڵین بۆری دا گەلەك زوڵم و زۆرداریا ل مەللەتێ كورد هاتیە كرن ل سەر دەستێ ڤی لەشكەری بیە,دەمێ ئەم دبێژین تورك د خرابن مافێ مە یە بەس دڤیا ب زانین ئەنجامدەرێن ڤان تاوانا كی بوون, هەر سەر دەمێ ئمبراتوریەتا ئۆسمالی وهەتا دروست بوونا دەولەتا توركی، زوڵم و زۆرداری ل كوردا هاتیە كرن وئینكارا هەبوونا كوردا ل توركیا كری سیاسەتا لەشكەری بوویە,لەوما كەرب وكینێن مللەتێ كورد وەكی داب ونەریتەكی لێ هاتیە نابیت مرۆڤێ كورد بێژیت تورك دباشن و مافێ هەر كەسی یە ژی,بەلێ ئەم گەلێ كوردستانێ چو جارا نەد گەل هندێ دابینە بەرامبەر ئەڤ تاوان و ڕەفتارێن خراب دگەل مە هاتینە كرن ئەم ژی رەفتارێن وەكی وان بكەین ئەم مللەتەكی ئاشتیخوازین وخودان دۆزەكا ڕەواین,ل هەمی شۆڕەش و سەڕهلدانا گەلێ كورد دژی دەسهەلاتداریێ بییە نە دژی گەلێن تورك و عەرب و فارسا بییە,ژبەر كو ئەگەر دەسهەلات كەفتبا دەستێ دیكتاتۆرەكی دێ ناڤ وسمعەتێ گەلێن خۆ ریسوا كەن ,ژبەر هندێ هەر دەم مە ڤیاییە ل ڤان دەولەتێن ئەقلیمی و داگیركەرێن كوردستانێ حوكمەكی دیموكراتی یێ مەدەنی وباوەری ب مافێ مرۆڤی و دۆزا گەلێ كورد هەبیت نە ئەو كەسێن فاشسیت و كەرب و كین دلێ واندا و دژایەتیا گەلێ مە دكەن بنە دەسهەلاتدار.
دڤیا ب زانین پشتی هاتنا ئەردۆغانی و ئەڤ ئالوگۆڕێن مەزن ل سەر ئاستێ ئەقلیمی ونەخاسمە ل توركیا پەیدابین ب تایبەت پرۆسا سیاسی وەك پێگەهەكی دیار هەبییە,ئەگەر گەلێ مە ل باكوری كوردستانێ ئەكتیف كربا ئەڤ پڕۆسسا دێ وەك دەست كەفتەكا مەزن بۆ كوردا هاتبا تۆماركرن ,ژ لایەكی دیڤا ئەگەر ئەم ئستیغلالا ڤان پەیوەندیا بكەین و درێژە پێ بهێتەدان ئەڤێن نها هەین دگەل دەسهەلاتداریا توركا كێشا مە ل گەل توركا دێ زێدەتر پێشڤەچت وئەم پێتڤی ب ڤێ چەندێ نە, دڤیا مڕۆڤ بزانیت باش و خرابێن مە ل كیژ جهینە,ل توركیا دوو چەمكا سەرێ خۆ هەلدایە ئێك لەشكەرێ فاشیست وپاشمایێ كەمالیزمە خودانێن دیرۆكا ڕەشە, ویێ دوویێ ئەردۆغان وحزبێ داد و گەشەپێدانە ,ئەرێ ژ ڤان هەر دووكا كیژ د پەرژەوەندیا مەدایە,ما نە عەسكەری توركا بو زمانێ كوردی قەدەغەكری ل توركیا وچەندین فەرمان وكوشتن و تاڵان و خرابكرنا گوند و وارێن مە ل سەر دەستێ وان هاتینە ئەنجامدان , باشە مانە ئەردۆغان و پارتا وی بوو پێشمەرگەه دەرباسی كۆبانێ كری وئاڵایێ كوردستانێ ل كۆچكا ئەتاتوركی هاتیە چەقاندن وپێشوازیا سەرۆك بارزانی ب چلێن وبەرگین كوردی هاتیە كرن.
ئەگەر پرسیارەكێ بكەین حالێ حازر كیژ دەرۆك مە هەیە دگەل جیهانێ یی ڤەكری بتر دەرگەهێ براهیم خەلیل یێ كارا , یان كیژ دەسهەڵات بییە هێلایی ئاڵایێ كوردستانێ ل توركا بلند بیت,ڕاستە وەكو پێتڤی مافێ كوردا نەدایە و گەلەك كێماسی و شاشی هەنە وئەم نابێژن ئەردۆغان دێ بۆمە دەولەتێ ئاڤا كەت و ئەو دێ پرسا كوردی ژی چارەسەر كەت, بەس لدیڤ سەربۆرێن شۆڕەشێن كوردی ل دیرۆكا بزاڤا ئازدیخوازا گەلێ مە و سیاسەتا پارتی وبارزانی دگەل دەسهەلادارێن داگیركەرا مفا ژ ڤان جۆرە پەیوەندیا ودان وستاندنا وەرگرین ژ بۆ خزمەتا دۆزا كوردستانێ , ئەگەر ژی بەراورد بكەین حوكمێ ئەردۆغانی دگەل لەشكەری گەلەك جیاوازی هەنە,ئەڤجا بۆچی دێ خۆ ل سەردا بەین ئەڤیا هندەك نەیارێن پارتی دكەن و دبێژن شاشیەكا مەزنە دەرهەقی بزاڤا ئازادیخوازا گەلێ كورد نەمانا ئاكپارتی وهاتنا كۆمەڵەكا چەنەراڵێن سەربازی ئەڤ پەیوەندیێن نها هەین ژی نامینن وپرۆسا دەولەتبونا كوردستانێ دێ هێتە ژناڤبرن.
دڤیا ئەم دیرۆكێ ژێك ڤاڤێرین كی دۆستە وكی دوژمنا هاتنا لەشكەرێ توركی بو سەر حوكمی چەند خرابە ,پارتی وبارزانی دەستێ خۆ نە دایە دەستێ چو كەسی ل سەر چو دەم و بەدیلا ئەگەر ژ بۆ پەرژوەندیا گەلێ مە نەبیت,ئەڤ كودەتا ل توركیا رویدایی جیهان هەمی دژی ڤێ كودەتاێ ڕاوستیا, تەنها ل هندەك جها ئاهنگ بۆ ڤێ كودەتایێ‌َ هاتنە گێران ,ئەڤ جه ژی دیمەشق بوو جهێ دەسهەلاتا بەشار ئەسەدی و ل سلیمانیێ و ل هندەك ناوچێن ژێر دەسهەلاتا گۆڕان و جەلالیا,ئەڤە ژی ژبەر وان پەیوەندیێن پارتی و بارزانی دگەل حكومەتا توركی هەین,كو ئیرۆ رۆَژ گازا مە دناڤ ئاخا توركا دا دەرباس دبیت ئەم هەر دوو لایەن مفادارین ژ بازرگانیێ وپەیوەندێن مە هەین وەك حكومەتا كوردی زۆر دباشن ئەڤ لایەنێن دیتر پێ نەخۆشن,بەلێ مالكی قوتێ زاڕۆك و بەلنگازێن كوردستانێ بری دروستە بهێتە كوردستانێ و پێشوازیا وی بكەن ,و ئەڤ زۆرداریا لەشكەرێ توركا ژبیركرینە كو ئاخفتنا زمانێ كوردی قەدەغە كربو , ژ نو گۆڕانخوازێن سلێمانیێ دگەل جەلالیا گۆڤەند وچەپلە لێدان و تەلقێت خوشیێ دهاڤێتن, بەلێ هەر شكر بۆ خودێ نەگەهشتنا مرازا خۆ وشەرمەزار بون دگەل شكەستنا ئینقلابچیا , وەسا هزر دكرن ئەگەر ئینقلابچی سەركەفتبانا و دەسهەلات كەفتبا دەستێ لەشكەری دا هەر رۆژا دوویێ دا دەولەتا كوردی ئێتە راگەهاندن,كو ژبیر كرن ئەڤ لەشكەرە بییە ئینكارا هەبوونا گەلێ كوردستانێ دكرن و دگۆتن كورد نینن, بەلێ ئەم دووبارە دێ بێژین ئەم كەیف خۆشین بەرامبەر شكەستنا ئینقلاپچیا , بژیت سەرخۆبون و گەلێ ئازاد.
تُتاح هذه الصورة أيضا في: کوردی
