جیهان هەموو شەرمێ ژ كۆچۆ ونادیا موراد دكەتن
خالد خدر
چەكدارێت دەولەتا بناڤێ خیلافەتا ئیسلامی (داعش) ب دەهان كۆم كوژیێت مەزن ئەنجامدان ل شنگالێ و كوم كوژییا كۆچۆ ئێك ژوانە ، كۆچۆ گوندەكی ئێزدی نیشین نە سەرب دەڤەرا شنگالێ ڤە یە دكەڤە ئالیێ باشوور و (23)كلم دووری سەنتەرێ شنگالێ یە ، بەلێ ژئەگەرا تەعریبێ ژ ئالیێ ئیداری ڤە رژێما پێشوو یا گۆربەگۆر دابوو سەرب ناوچا بلیج قەزا بەعاج ڤە .
ل 3/8/2014 چەكدارێت رێكخراوا تیرۆرستیا داعش گەهشتنە گوندێ كۆچۆ ،لدەستپێكێ ب شێوازەكی نەرم و جوان رەفتار دگەل خەلكێ گوندی كرن و پترییا وان خەلكێن دەڤەرێ بوون ژ وان عەرەبێت دەردۆرێ گوندێ كۆچۆ كو د بەرنیاس بوون ژ ئالیێ ئێزدیان ڤە ، لدیڤ گۆتنا وان كەسێن رزگاربووین ژ خەلكێ كۆچۆ ل رۆژا ئێكێ ئەمیرێ وان (3) رۆژ مۆلەت دانە وان كو دڤێت ئەو دینێ خۆ بگهۆرن بەلێ ئەو قاییل نەبوون دینێ خۆ بگهۆرن ،و پشتی هەولدانێت داعش سەرنەگریت و بۆرینا مۆلەتا ئێكێ چەكدارێت داعش مۆلەتەكا دی یا (10) رۆژی دانە خەلكێ گوندێ كۆچۆ ب هەول و ناڤبژیڤانیێن خەلكێ گوندی كو رێكێ بدەنە وان ژ گوندی دەركەڤن وهەمی مال وسامانێ خۆ بۆ داعشی بهێلن ،وهەمان رەفتارا دگەل برایێت مەسیحی كرین ل مووسل دگەل وان ژی بكەن ،ل دەستپێكێ ئەوان رەزامەندیا خۆ دیاركرن لسەر ڤێ چەندێ ،ل رۆژا ئینیێ رێكەفتی15ی تەباخا سالا 2014 مۆلەتا وان ب داوی هات كو هیچ لایەكی هەول نەدا خەلكێ گوندێ كۆچۆ رزگار بكەت ژ دوورپێچا هۆڤێن داعش ، ل رۆژا داویێ داعش دیسا دوو هەلبژاردە دانە خەلكێ كۆچۆ ئەو ژی كو دینێ خۆ بگهۆرن و بمینە ل گوندێ خۆدا و یا دی كو هەر كەسێ دینێ خۆ نە گهۆرت چارەنڤیسێ وی كەفتە دمەترسیێ دا ،ئەو بوو هەمی خەلكێ كۆچۆ بڕیارا خۆ پێكڤە دان و ئەو چەندە رەت دكرن كو دینێ خۆ بگهۆرن و ملكەچی خواست و نیازێن پیسێن داعشێ نەبوون ، دئەنجامدا هەمی خەلكێ كۆچۆ كۆم كرن ل قوتابخانا گوندی و ژن و زەلام وزارۆك ژێك جووداكرن ، زەلام هەمی كوشتن و ژن وزارۆك هەمی برن و كرنە دیل و پاشی فرۆتن ل بازارێت نەخاسێ ل مووسل و رەقایێ ، كرێترین و پیسترین رەفتار دگەل ژنا كرن لدیڤ دیدەڤانیا وان كەسێت رزگاربووین، كوم كوژییەكا بێ وێنە ئەنجامدان ل دەرهەقا ئێزدیێن كۆچۆ وب شێوەكی دڕندانە وهۆڤانە رەفتار دگەلداكرن ب هەزارا كەس بوونە قوربانی.
دەربارەیی ڤێ تاوانا هاتی كرن ل دژی كۆچۆ ، میدیاكار و رەوشەنبیرێ ئەرب (عەبدولرەحمان ئەلراشد ) گۆتارەك بەلاڤكریە د رۆژناما شەرق ئەلئەوسەتدا یا ژمارە (13771) لژێر ناڤ ونیشانێت ( نادیا موراد ئەوا ئەم شەرمێ ژێ دكەین ) ،ودبێژیت كچكەكا بچووك ئەندامێت داعش ئەو دگەل كەس وكارێت وێ وكچێن گوندێ وێ (كۆچۆ) و گوندێن ئێزدیێن عێراقێ ،و ئەو وەك گیانەوەرا برن و ل دەرهەقا وان ژنا دا كریارێت دەست درێژیێت ب كۆم ئەنجامدان وئەڤ هەمی دهێتە كرن بناڤێ ئیسلامێ و دروشمێت وێ ،لدەمێ كو هندەك كەسێت تووندڕەو دناڤ مەدا هەنە ب شێوەكی ئاشكەرا پەسنا و سترانا بۆ ڤان تاوانبارا دبێژن و لبن هێجەتێن سەختە، وەك جیهادێ و سەرئێخستنا بوسلمانان،ئێك ژ قوربانیێت وێ نادیا مورادە،هەتا ڤێرێ بلابەسبتن گۆتنا نڤیسەرێ ئەرەب ،ئەز دبێژم جیهان هەمی شەرمێ ژكۆچۆ ونادیا موراد دكەتن،وكۆم كوژییا كۆچۆ هەردێ مینت داخەكا شەرمەزاریێ ل ئەنییا هەمی جیهانێ.
تُتاح هذه الصورة أيضا في: کوردی
